ទីក្រុងហាណូយ៖ នៅទីបញ្ចប់ ប្រធានរដ្ឋសភាវៀតណាមត្រូវអស់តំណែងម្នាក់ទៀតហើយបន្ទាប់ពីបក្សកុម្មុយនិស្តវៀតណាមដកតំណែងប្រធានាធិបតីវ៉ូវ៉ាន់ធឿងបានត្រឹមតែប៉ុន្មានសប្ដាហ៍ប៉ុណ្ណោះ។ បក្សកុម្មុយនិស្តបានទទួលយកលិខិតលាលែងពីតំណែងរបស់លោកវឿងឌិញវេ (Vuong Dinh Hue) រួចហើយនៅថ្ងៃនេះពីបទ «ប្រព្រឹត្តកំហុស និងអសមត្ថភាព»។…
ទីក្រុងហាណូយ៖ នៅទីបញ្ចប់ ប្រធានរដ្ឋសភាវៀតណាមត្រូវអស់តំណែងម្នាក់ទៀតហើយបន្ទាប់ពីបក្សកុម្មុយនិស្តវៀតណាមដកតំណែងប្រធានាធិបតីវ៉ូវ៉ាន់ធឿងបានត្រឹមតែប៉ុន្មានសប្ដាហ៍ប៉ុណ្ណោះ។ បក្សកុម្មុយនិស្តបានទទួលយកលិខិតលាលែងពីតំណែងរបស់លោកវឿងឌិញវេ (Vuong Dinh Hue) រួចហើយនៅថ្ងៃនេះពីបទ «ប្រព្រឹត្តកំហុស និងអសមត្ថភាព»។ នេះបើយោងតាមការផ្សព្វផ្សាយរបស់រដ្ឋាភិបាលវៀតណាមនៅថ្ងៃទី២៦ ខែមេសានេះផ្ទាល់តែម្ដង។
មុខតំណែងប្រធានរដ្ឋសភាថ្វីដ្បិតមិនមានអំណាចកម្រិតកំពូល ប៉ុន្តែជាផ្នែកមួយនៃសសរស្ដម្ភអំណាចកំពូលទាំងបួននៅវៀតណាមដែលមានអគ្គលេខាធិការបក្សមានអំណាចធំជាងគេ, បន្ទាប់មកនាយករដ្ឋមន្ត្រី, ប្រធានរដ្ឋសភា និងប្រធានាធិបតី។ គេធ្លាប់គិតថាទៅថ្ងៃមុខ តំណែងអគ្គលេខាធិការបក្សអាចនឹងធ្លាក់ទៅក្នុងដៃរបស់ប្រធានរដ្ឋសភារូបនេះ។ គេហទំព័ររដ្ឋាភិបាលវៀតណាមចេញផ្សាយសេចក្ដីថ្លែងការណ៍របស់គណៈមជ្ឈិមបក្សកុម្មុយនិស្តវៀតណាមថា «ដោយសារសមមិត្តវឿងឌិញវេប្រព្រឹត្តកំហុស និងអសមត្ថភាពធ្វើឱ្យសាធារណជនសម្លឹងក្នុងផ្លូវអវិជ្ជមាន និងប៉ះពាល់កិត្តិយសរបស់បក្ស, កិត្តិយសរបស់រដ្ឋ និងកិត្តិយសរបស់រូបគាត់ផ្ទាល់»។
សេចក្ដីថ្លែងការណ៍នោះរៀបរាប់ថាបក្សកុម្មុយនិស្តវៀតណាមបានទទួលយករួចហើយនូវលិខិតសូមលាលែងពីតំណែងរបស់លោកវឿងឌិញវេ ហើយបក្សនឹងដកហូតមុខតំណែង និងតួនាទីគ្រប់យ៉ាង។ មិនត្រឹមតែតំណែងប្រធានរដ្ឋសភាទេ សូម្បីតែតំណែង និងតួនាទីនៅក្នុងគណៈមជ្ឈិមបក្ស និងការិយាល័យនយោបាយក៏ត្រូវដកហូតផងដែរ។ ដូច្នេះ ការខិតខំកសាងកេរ្តិ៍ឈ្មោះទម្រាំមានថ្ងៃនេះត្រូវរលាយបាត់ត្រឹម១ប៉ប្រិចភ្នែក។ សេចក្ដីថ្លែងការណ៍មិនបានបញ្ជាក់ថាគាត់ខុសរឿងអ្វីទេ។
ការលាលែងពីតំណែងនេះធ្វើឱ្យគេខ្វាយខ្វល់អំពីបញ្ហាស្ថិរភាពនយោបាយនៅប្រទេសវៀតណាមក្នុងនាមជាមជ្ឈមណ្ឌលផលិតដ៏ធំមួយនៅអាស៊ីអាគ្នេយ៍ ហើយជាប្រទេសដែលពឹងផ្អែកខ្លាំងទៅលើការវិនិយោគផ្ទាល់ពីបរទេស និងការនាំទំនិញទៅលក់នៅក្រៅស្រុក។ បើនយោបាយវៀតណាមយ៉ាងម៉េចយ៉ាងម៉ាទៅ វានឹងប៉ះពាល់ទឹកចិត្តរបស់អ្នកវិនិយោគ។
ការស្ទង់មតិរបស់សភាពាណិជ្ជកម្មវៀតណាមទៅលើថ្នាក់ដឹកនាំធុរកិច្ចជាង៦៥០នាក់បង្ហាញថាមូលហេតុធំដែលក្រុមហ៊ុនបរទេសចង់ទៅវិនិយោគនៅវៀតណាមដោយសារវៀតណាមមានស្ថិរភាពនយោបាយ។ នៅក្នុងយុទ្ធនាការបោសសម្អាតអំពើពុករលួយដែលដឹកនាំ-បញ្ជាផ្ទាល់ដោយអគ្គលេខាបក្សកុម្មុយនិស្តវៀតណាម លោកវៀងហ៊្វូជុង មនុស្សមិនតិចនាក់ទេត្រូវដកហូតតំណែង ចាប់ខ្លួន និងនាំទៅកាត់ទោសនៅតុលាការ។ មន្ត្រីខ្លះត្រូវគេទុកមុខឱ្យត្រឹមបណ្ដេញចេញពីតំណែងក្រោមរូបភាពខាងក្រៅជាការលាលែងពីតំណែង។ ប៉ុន្តែអ្នកខ្លះទៀតត្រូវតុលាការកាត់ទោសឱ្យជាប់ពន្ធនាគារជាច្រើនឆ្នាំ។
លោកវឿងឌិញវេបានទៅបំពេញទស្សនកិច្ចនៅប៉េកាំងកាលពីថ្ងៃទី៨ ខែមេសា និងជួបប្រធានាធិបតីចិន។ នៅពេលលោកជាប់រវល់នៅក្រៅប្រទេស ជំនួយការរបស់លោកម្នាក់ត្រូវសមត្ថកិច្ចចាប់ខ្លួនពីបទទទួលសំណូកពីក្រុមហ៊ុនទទួលម៉ៅការសាងសង់។ ចាប់ខ្លួនជំនួយការរូបនោះបាន២សប្ដាហ៍ទើបសមត្ថកិច្ចប្រកាសជាចំហថាពិតជាមានការចាប់ខ្លួន និងឃុំខ្លួនមែន។
កាលពីដើមខែមេសា សេដ្ឋីអចលនទ្រព្យដ៏ល្បីល្បាញម្នាក់ឈ្មោះទ្រឿងមីឡានត្រូវតុលាការសាលាដំបូងទីក្រុងហូជីមិញកាត់ទោសប្រហារជីវិតពីបទឆបោកនៅក្នុងគម្រោងវិនិយោគខ្យល់ដែលធ្វើឱ្យបាត់បង់ប្រាក់រាប់សិបពាន់លានដុល្លារ។ រឿងនេះមានជាប់ពាក់ព័ន្ធនឹងមន្ត្រីធំៗរបស់វៀតណាមដែលឃុបឃិតគ្នាជាប្រព័ន្ធ និងសុខចិត្តបិទភ្នែកបិទច្រមុះទទួលប្រាក់សំណូកដើម្បីធ្វើមានធ្វើបានតែម្នាក់ឯង។ តាមមើលទៅ សំណុំរឿងឆបោកនេះអាចនឹងរាលដាលទៅដល់មន្ត្រីជាច្រើនទៀត៕
ចែករំលែកព័តមាននេះ