រាជធានីភ្នំពេញ ៖ អតីតតារាភាពយន្ត លោកជា ណូបូ បានចេញមុខការពារខ្លួនបង្ហាញភាពត្រឹមត្រូវ ក្រោយរូបលោកបានរងនូវការចោទប្រកាន់ពីនារីម្នាក់ ពាក់ព័ន្ធការបោកប្រាស់លុយជាង១ម៉ឺនដុល្លារក្នុងការចូលគ្នាទិញដីមួយកន្លែង ។ នារីម្នាក់បានអះអាងប្រាប់បណ្តាញសារព័ត៌មានក្នុងស្រុកមួយថា…
រាជធានីភ្នំពេញ ៖ អតីតតារាភាពយន្ត លោកជា ណូបូ បានចេញមុខការពារខ្លួនបង្ហាញភាពត្រឹមត្រូវ ក្រោយរូបលោកបានរងនូវការចោទប្រកាន់ពីនារីម្នាក់ ពាក់ព័ន្ធការបោកប្រាស់លុយជាង១ម៉ឺនដុល្លារក្នុងការចូលគ្នាទិញដីមួយកន្លែង ។
នារីម្នាក់បានអះអាងប្រាប់បណ្តាញសារព័ត៌មានក្នុងស្រុកមួយថា ខ្លួនបានចាញ់ការបោកប្រាស់លោកជា ណូបូ នូវទឹកប្រាក់ជាង១ម៉ឺនដុល្លារពីការលក់កេរ្តិ៍អាករជីដូនរបស់នាង ហើយយកលុយទាំងអស់នោះមកទិញដីចូលគ្នាជាមួយលោក ជា ណូបូ ។
នារីខាងលើបានបញ្ជាក់ថា ក្រោយបានទិញដីរួចហើយ លោក ជា ណូបូ ក៏បានដាក់ឈ្មោះលោកតែម្នាក់ឯង ដោយមានបំណងចង់ក្រសោបយកដីនោះតែម្នាក់ឯង ទើបនាងសម្រេចចេញមុខស្នើសុំដល់អជ្ញាធរពាក់ព័ន្ធជួយស្វែងរកយុត្តិធម៌ចំពោះរឿងនេះដល់រូបនាងផង ។
យ៉ាងណា ជុំវិញបញ្ហាខាងលើនេះ អតីតតារាសម្តែងលោក ជា ណូបូ បានចេញមុខបដិសេធ ដោយបានការពារខ្លួនដោយភាពស្អាតស្អំ និងបានចាត់ទុកការចោទប្រកាន់ពីនារីខាងលើនេះ គឺការបង្កើតសាច់រឿងដើម្បីបង្ខូចកេរ្តិ៍ឈ្មោះលោក ខណៈពេលដែលលោកគឺជាជនរងគ្រោះពីនារីខាងលើនេះ ។
លោកជា ណូបូ បានបង្ហោះសារលើបណ្តាញសង្គមថា សូមឲ្យម្ចាស់ផេកដែលចុះផ្សាយស្តាប់តែមួយខាង មិនបានមកសួរនាំរកហេតុផលពីខ្ញុំឲ្យបានច្បាស់លាស់ដែរ ខ្ញុំជាអ្នករងគ្រោះទៅវិញ ហ៊ានថាខ្ញុំជាអ្នកបោកពេញៗម៉ាត់។
លោកបញ្ជាក់ថា ការពិតនារីនោះ ជាអ្នកបង្កើតសាច់រឿងចោទប្រកាន់ នារីហ្នឹងមានល្បិចកល់អាក្រក់ សួរថា គាត់មានលុយពីណាមកច្រើនម្ល៉េះ គាត់គ្រាន់តែជាអ្នកមកសុំធ្វើការតែប៉ុណ្ណឹង…ថែមទាំងនាំគ្នាគាត់មកលួចទ្រព្យខ្ញុំថែមទៀត។
លោកថា ហេតុផលណា ឯកសារណា ដែលបញ្ជាក់ថា ខ្ញុំបោកគាត់ គាត់មិនមែនក្មេងឯណា គាត់ទេដែលបោកទំនុកចិត្តខ្ញុំ ខ្ញុំចង់ប្តឹងគាត់យូរហើយ ដែលគាត់មកបំផ្លាញកិត្តិយសខ្ញុំ តែខ្ញុំទុកពេលឲ្យគាត់គិតទៅវិញ..ដែលខ្ញុំមិនបែងចែកអ្នកធ្វើកាងារចាត់ទុកជាប្អូន គាត់រត់ចេញពីការងារ ទៅតាមគ្នាគាត់ដែលគាត់មកជួយធ្វើការថាជាបងប្អូន ដែលមកលួចទ្រព្យខ្ញុំ ខ្ញុំមានសាក្សី ហើយខ្ញុំបានអង្វរគាត់ឲ្យមកវិញតែគាត់មិនមកទេ ពេលនោះ កូវីដកំពុងតែខ្លាំង តែទីបំផុតបែរជាមកបង្កើតសាច់បែបនេះទៅវិញ ។
បើតាមលោកជា ណូបូ ដោយសារតែពួកគាត់ហ្នឹងហើយធ្វើឲ្យខ្ញុំវន័ករមកដល់សព្វថ្ងៃ ដូច្នេះខ្ញុំសុំឲ្យអ្នកដែលសំភាសន៍គាត់ដែលស្តាប់តែម្ខាងមកជួបខ្ញុំដើម្បីដឹងរឿងពិត បើស្តាប់តែម្ខាងៗហ្នឹងងាប់គេអស់ហើយ ។
ដោយឡែក បន្ថែមលើអ្វីដែលបានបង្ហោះខាងលើនេះ លោកជា ណូបូ ក៏បានអះអាងប្រាប់កោះសន្តិភាពតាមសារអេឡិចត្រូនិចថា នារីខាងលើនេះ គឺបានមកសុំលោកធ្វើការជាមួយនៅក្នុងកសិដ្ឋានចញ្ចឹមមាន់របស់លោក ហើយរូបលោកក៏មានការទុកចិត្តចំពោះនារីម្នាក់នោះ ដោយចាត់ទុកនាងដូចជាប្អូនបង្កើត ។
លោកបញ្ជាក់ថា ក្រោយមកដោយសារមានបំណងចង់រកទីតាំងដីមួយកន្លែងនាខេត្តកំពង់ស្ពឺលោកក៏បាននាំនារីខាងលើដើររកទិញដីដោយនៅអំឡុងពេលជំងឺកូវីដកំពុងមានវាយលុយខ្លាំងនោះលោកមិនបានទុកចិត្តអ្នកណាម្នាក់ក្រៅពីនារីម្នាក់នេះឡើយ។
លោកបន្តថា បន្ទាប់ពីរកទិញដីបានហើយនោះលោកក៏បានធ្វើលិខិតស្នាមដោយបានដាក់ឈ្មោះនារីរូបនេះដែរ ដោយសារលោកចង់បញ្ជាក់ពីចិត្តលោកឲ្យនារីនោះដឹងថា លោកចាត់ទុកនាងដូចជាប្អូនស្រីម្នាក់កុំអោយនាងគិតថា មិនទុកចិត្ត មានការបែកចែក និងបោកប្រាស់ ព្រោះដីនេះទិញដើម្បីបើកកសិដ្ឋានចិញ្ចឹមមាន់ ដើម្បីរកប្រាក់កម្រៃចែកគ្នារស់ ។
ទោះជាយ៉ាងណា អ្វីមិនមែនដូចជាការគិតឡើយ ដោយសារនារីខាងលើបានរត់ចោលលោកកណ្តាលទី ដោយសារមានការខឹងលោកដេញបុរសម្នាក់ដែលធ្វើការជាមួយគ្នា បន្ទាប់បីបុរសរូបនេះមិនធ្វើតាមអ្វីដែលលោកប្រាប់ និងបានលួចពងមាន់របស់លោកយកទៅលក់ថែមទៀត ។
លោកថា បើសិនជានារីនោះមិនរត់ចោលលោកកណ្តាលទី ហើយនាំបក្សពួកមកបំផ្លាញលោកនោះ ប្រហែលជាកសិដ្ឋានចញ្ចឹមមាន់ដំណើរការល្អ អាចរកចំណូលបានច្រើនសម្រាប់ពួកគាត់ដែរ តែមិននឹកស្មានថា នាពេលនេះពួកគាត់បែរជាមកប្រឌិតរឿងធ្វើបាបលោកទៅវិញ ។
យ៉ាងណា បើតាមលោក ជា ណូបូ លោកនៅតែមិនយល់ថាតើហេតុអ្វីបានជានារីម្នាក់នោះមានលុយដល់ម៉ឺនដុល្លារទិញដី ហេតុអ្វីក៏គេអោយមកផ្តឹតមេដាយធ្វើសាក្សីទៅវិញ ហើយមានឯកសារផ្លូវការណាដែលជាភស្តុតាងបញ្ជាក់ថា នាងពិតយកលុយមកចូលហ៊ុនទិញដីជាមួយលោក ជាពិសេស បើនារីនោះមានលុយហេតុអ្វីចាំបាច់មកសុំលោកធ្វើការប្រាក់ខែតិចតួចបែបនេះ យកលុយចងការប្រាក់គេក៏បានច្រើនជាងនេះដែរ ។
លោក ជា ណូបូ បន្ថែមថា ប្រសិនបើនារីម្នាក់នោះមានឯកសារច្បាស់លាស់បញ្ជាក់ថា លោកពិតជាបានប្រព្រឹត្តរឿងបែបនេះមែន មិនចាំបាច់ប្តឹងដល់ណាទេ លោកនឹងយល់ព្រមកាត់ឲ្យទាំងអស់ ព្រោះលោកជាមនុស្សមានគុណធម៌ដែរ ដោយមិនចាំបាច់ប្រឌិតរឿងនាំឲ្យខូចកេរ្តិ៍ឈ្មោះលោកបែបនេះឡើយ ៕
ចែករំលែកព័តមាននេះ