ទីក្រុងប៊ែឡាំង៖ ជិតបោះឆ្នោតជ្រើសរើសសមាជិកសភាអឺរ៉ុប អាល្លឺម៉ង់ផ្ទុះរឿងអាស្រូវតែម្ដង។ នៅថ្ងៃនេះ សមត្ថកិច្ចអាឡឺម៉ង់ចាប់ខ្លួនជំនួយការរបស់សមាជិកសភាអឺរ៉ុបម្នាក់របស់គណបក្សស្តាំនិយមជ្រុលអេអែហ្វឌី (AfD) ពីបទសង្ស័យថាជំនួយការនោះលួចការណ៍សម្ងាត់ទៅឱ្យប្រទេសចិន។ បុរសដែលគេស្គាល់ថាឈ្មោះជានគួ (Jian G.)…
ទីក្រុងប៊ែឡាំង៖ ជិតបោះឆ្នោតជ្រើសរើសសមាជិកសភាអឺរ៉ុប អាល្លឺម៉ង់ផ្ទុះរឿងអាស្រូវតែម្ដង។ នៅថ្ងៃនេះ សមត្ថកិច្ចអាឡឺម៉ង់ចាប់ខ្លួនជំនួយការរបស់សមាជិកសភាអឺរ៉ុបម្នាក់របស់គណបក្សស្តាំនិយមជ្រុលអេអែហ្វឌី (AfD) ពីបទសង្ស័យថាជំនួយការនោះលួចការណ៍សម្ងាត់ទៅឱ្យប្រទេសចិន។ បុរសដែលគេស្គាល់ថាឈ្មោះជានគួ (Jian G.) ធ្លាប់ធ្វើការឱ្យសមាជិកសភាអឺរ៉ុបម៉ាក់ស៊ីមីលានក្រា (Maximilian Krah) ជាបេក្ខជនតំណាងរាស្ត្រនៃសភាអឺរ៉ុបដែលនឹងចូលប្រកួតប្រជែងនាខែមិថុនា។
រដ្ឋអាជ្ញាអាល្លឺម៉ង់ចេញសេចក្តីថ្លែងការណ៍ថាបុគ្គលឈ្មោះជានគួរជាភ្នាក់ងារសម្ងាត់ចិន។ ការចាប់ខ្លួនដ៏គួរឱ្យភ្ញាក់ផ្អើលនេះធ្វើឱ្យសមាជិកសភាអឺរ៉ុបយល់ថាបញ្ហានេះមិនអាចលេងសើចបានឡើយ។ គួរតែចាត់វិធានការបោសសម្អាតមនុស្សបង្កប់របស់ចិន និងរុស្ស៊ីដែលកំពុងស៊ីរូងផ្ទៃក្នុងសហភាពអឺរ៉ុប។ នៅបែលហ្សិច សមត្ថកិច្ចស៊ើបអង្កេតករណីសង្ស័យថាក្រុមអ្នកនយោបាយអឺរ៉ុប និងសមាជិកសភាអឺរ៉ុបខ្លះទទួលប្រាក់ពីពួកអ៊ុយក្រែនគាំទ្ររុស្ស៊ី។ ប្រទេសឡាតវីស៊ើបអង្កេតអ្នកតំណាងរាស្ត្ររបស់ខ្លួននៅសភាអឺរ៉ុបពីបទចូលដៃជាមួយក្រុមសម្ងាត់រុស្ស៊ី។
នៅក្នុងករណីជំនួយការរបស់អ្នកតំណាងរាស្ត្រអាល្លឺម៉ង់ឈ្មោះក្រាស់នៅសភាអឺរ៉ុបនោះ រដ្ឋអាជ្ញាថ្លែងថាបុគ្គលរូបនេះជាប់សង្ស័យពីបទលួចព័ត៌មានកិច្ចប្រជុំផ្ទៃក្នុងរបស់សភាអឺរ៉ុបទៅឱ្យភ្នាក់ងារសម្ងាត់ចិន។ រដ្ឋអាជ្ញាបានចោទប្រកាន់គាត់មួយករណីទៀតពីបទស៊ើបការណ៍ពីជនជាតិចិនប្រឆាំងនឹងរដ្ឋាភិបាលទីក្រុងប៉េកាំង និងដែលធ្វើសកម្មភាពប្រឆាំងនៅលើទឹកដីអាល្លឺម៉ង់។
អ្នកតំណាងរាស្ត្រអាល្លឺម៉ង់ឈ្មោះក្រាស់ (Krah) ដែលជំនួយការរបស់គាត់ត្រូវគេចាប់ខ្លួននោះបានបដិសេធថាគាត់មិនបានដឹងថាជំនួយការរូបនេះបានចូលរួមនៅក្នុងអំពើចារកម្ម។ គាត់ប្រាប់ថាទើបតែព្រឹកមិញនេះគាត់អានកាសែតក៏ឃើញថាសមត្ថកិច្ចចាប់ខ្លួនជំនួយការឈ្មោះជានគួរ (Jain Guo)។ អ្នកនាំពាក្យសភាអឺរ៉ុបប្រកាសថាដោយសាររឿងនេះជារឿងធំ ដូច្នេះ សភាសម្រេចចិត្តព្យួរការងាររបស់ជំនួយការលោកក្រាស់ជាបន្ទាន់។
ឥឡូវនេះ ល្បីរឿងយកការណ៍សម្ងាត់ទៅឱ្យចិនខ្លាំងមែនទែន។ នៅអាល្លឺម៉ង់ដដែល សមត្ថកិច្ចទើបតែចាប់ខ្លួនមនុស្ស៣នាក់ផ្សេងទៀតពីបទសង្ស័យលួចព័ត៌មានសម្ងាត់យោធាទៅឱ្យប្រទេសចិន។ នៅអង់គ្លេស កាលពីថ្ងៃចន្ទ ព្រះរាជអាជ្ញាប្ដឹងអ្នកសិក្សាស្រាវជ្រាវនៅក្នុងសភាអង់គ្លេសម្នាក់ពីបទសង្ស័យលួចយកការណ៍សម្ងាត់ទៅឱ្យប្រទេសចិន។
ពីទីក្រុងប៉េកាំង អ្នកនាំពាក្យក្រសួងការបរទេសចិនច្រានចោលការចោទប្រកាន់របស់អាល្លឺម៉ង់។ ចិនសូមឱ្យអាល្លឺម៉ង់ឈប់ប្រើស្ទីលសង្គ្រាមត្រជាក់តទៅទៀត។ ចិនយល់ថានេះជាចេតនាបង្ខូចកេរ្តិ៍ឈ្មោះរបស់ប្រទេសចិន ហើយធ្វើឱ្យខូចបរិយាកាសដែលចិន និងអឺរ៉ុបកំពុងព្យាយាមបង្កើនកិច្ចសហប្រតិបត្តិការជាមួយគ្នា។ អ្នកនាំពាក្យចិនសូមឱ្យអាល្លឺម៉ង់ឈប់លេងល្បែងនយោបាយប្រឆាំងនឹងចិនតទៅទៀត៕
ចែករំលែកព័តមាននេះ