រាជធានីភ្នំពេញ ៖ នៅទីបំផុត តារាសម្តែងអ្នកនាង គង់ ច័ន្ទស្រីមុំ បានចេញមុខសុំទោសជាសាធារណៈហើយ បន្ទាប់ពីនាងរងការរិះគន់យ៉ាងចាស់ដៃពីមហាជនខ្មែរ ពាក់ព័ន្ធការបង្ហោះរូបចូលរួមសង្ក្រាន្តឆ្នាំថ្មីលើទឹកដីថៃ ។…
រាជធានីភ្នំពេញ ៖ នៅទីបំផុត តារាសម្តែងអ្នកនាង គង់ ច័ន្ទស្រីមុំ បានចេញមុខសុំទោសជាសាធារណៈហើយ បន្ទាប់ពីនាងរងការរិះគន់យ៉ាងចាស់ដៃពីមហាជនខ្មែរ ពាក់ព័ន្ធការបង្ហោះរូបចូលរួមសង្ក្រាន្តឆ្នាំថ្មីលើទឹកដីថៃ ។ គង់ ច័ន្ទស្រីមុំ បានចាត់ទុកការបង្ហោះរូបរបស់នាងនាពេលនេះ គឺជាកំហុសអចេតនា ដ្បិតនាងមិនបានគិតដល់ទេថា វានាំអោយមហាជនខ្មែរមិនសប្បាយចិត្ត ។
តាមរយៈវីដេអូដែលបានlive តាមបណ្តាញសង្គម កាលពីយប់ថ្ងៃទី១៨ ខែមេសា ឆ្នាំ២០២៤ នេះ គង់ ច័ន្ទស្រីមុំ បានរៀបរាប់ពីដំណើរដើមទងនៃរឿងរ៉ាវខាងលើនេះថា តាមពិតនាងបានចេញដំណើរទៅលេងនៅទឹកដីថៃតាំងពីថ្ងៃទី៨-៩ មកម្ល៉េះ ដោយនាងពុំបានដាក់គោលដៅទៅកំសាន្តនៅទីនោះនាពេលចូលឆ្នាំនោះឡើយ ។ នាងបញ្ជាក់ថា ក្នុងដំណើរកំសាន្តគឺនាងត្រូវជូនមិត្តភក្តិរបស់នាងដែលទើបមកពីអាមេរិក ហើយចង់ទៅលេងកោះមួយនៅប្រទេសថៃ ។
ដោយសារការរាប់អានគ្នាយ៉ាងជិតស្និតនោះ នាងក៏បានលះបង់ពេលវេលាជូនមិត្តភក្តិរបស់នាងទៅកាន់ទីកន្លែងនោះតាមបំណង ដោយត្រូវចំណាយពេលពេញមួយថ្ងៃសម្រាប់ការទៅកំសាន្តនៅទីនោះ ។ នាងបន្តថា ក្រោយពេលត្រឡប់មកវិញ នៅមុនពេលដែលពួកនាងត្រូវចូលសម្រាកនៅសណ្ឋាគារ គាប់ជួនមិត្តភក្តិរបស់នាងក៏បានឃើញ DJ សូដា នៅទីនោះដែរ ជាហេតុធ្វើអោយមិត្តភក្តិរបស់នាងចង់ជួបDj នោះយ៉ាងខ្លាំង ព្រោះគាត់ក៏ជាFan Dj សូដា ម្នាក់ដែរ ។
ដោយសារឃើញបែបនេះ ពួកនាងក៏សម្រេចលុបការហោះហើរទៅស្រុកខ្មែរវិញ ដោយត្រូវរងចាំមើលការសម្តែងរបស់ Dj សូដា ដែលនឹងសម្តែងនៅទីនេះនៅថ្ងៃទី១៤ មេសា ។ អ្នកនាង គង់ ច័ន្ទស្រីមុំ បានលើកឡើងបន្ថែមថា ការសម្តែងរបស់ Dj សូដា គឺប្រារព្ធនៅពីក្រោមសណ្ឋាគារតែម្តង ហើយពួកនាងក៏បានទស្សនាការសម្តែងនោះរហូតដល់ម៉ោង៨កន្លះ ។
ក្រោយការទស្សនាចប់ ពួកនាងក៏បានចេញមករកអ្វីញាំ ហើយពេលនោះហើយដែលនាងគិតថា ចូលឆ្នាំហើយឃើញគេបង្ហោះរូបព្រោងព្រាត ដូច្នេះនាងក៏សម្រេចហៅមិត្តភក្តិមកថតរូបហើយផុសរូបមួយនេះតែម្តង ។ នាងបញ្ជាក់ថា ការផុសរូបភាពមួយនេះ នាងមិនបានសរសេរអ្វីច្រើនឡើយ ដោយនាងគ្រាន់តែសសេរថា រីករាយថ្ងៃចូលឆ្នាំថ្មី ។
នាងបន្តថា ក្រោយផុសរូបនាងរួចហើយ នាងក៏បានចូលសម្រាកព្រោះយប់ជ្រៅទៅហើយ ប៉ុន្តែបន្ទាប់ពីភ្ញាក់ពីគេងវិញនាងក៏បានឃើញអេតមីន និងអ្នកគាំទ្ររបស់នាងបានថតបង្ហាញពីការរិះគន់មិនសប្បាយចិត្តចំពោះបងប្អូនខ្មែរចំពោះរូបភាពដែលនាងបានបង្ហោះនាពេលនេះ ។
នាងបន្ថែមថា ពេលនោះ នាងក៏ចាប់ផ្តើមឆ្ងល់ថា តើរូបភាពមួយនេះ ម៉េចក៏មានការប្រតិកម្មខ្លាំងម្ល៉េះ ពេលនោះនាងក៏ចាប់ផ្តើមរកដើមហេតុនៃរឿងមួយនេះ ។
នាងថា ពេលនោះនាងក៏បានឃើញមានបុរសម្នាក់បានមកនិយាយមិនល្អមកលើប្រទេសខ្មែររបស់យើង ហើយរូបនាងផ្ទាល់ក៏ដូចជាបងប្អូនខ្មែរ គឺមានការឈឺចាប់ដូចគ្នា ហេតុនេះនាងយល់ថា បងប្អូនមានប្រតិកម្មមកលើរូបដែលនាងបានផុសនោះ គឺមិនខុសទេ ។ នាងបញ្ជាក់ថា ក្រោយដឹងរឿងហេតុបែបនេះ នាងក៏សម្រេចលុបរូបភាពរបស់នាងចោលវិញ ព្រោះរូបភាពនោះធ្វើអោយបងប្អូនខ្មែរមិនសប្បាយចិត្ត ដោយរួមនឹងនាងផងដែរ ។
នាងគិតថា ហេតុអ្វីបានជានាងសាងរូបភាពមួយនេះឡើងមិនត្រូវតាមកាលះទេសះ ប៉ុន្តែកំហុសមួយនេះគឺជាកំហុសអចេតនា ដោយនាងគ្មានបំណងធ្វើអោយបងប្អូនខឹងមកលើរូបនាងឡើយ ខណៈពេលកន្លងមក នាងបានសាងតែភាពសប្បាយរីករាយលើបណ្តាញសង្គមសម្រាប់បងប្អូនគាំទ្រប៉ុណ្ណោះ ។
យ៉ាងណា បើតាមអ្នកនាង គង់ ច័ន្ទស្រីមុំ នាងទទួលស្គាល់កំហុសដោយអចេតនាមួយនេះ ហើយនាងមិនមានចេតនាណាមួយជួយបំផុសបំផលពិធីចូលឆ្នាំស្រុកគេជាងស្រុកខ្លួនឯងនោះឡើយ ។
នាងបញ្ជាក់ថា មូលហេតុដែលនាងមិនព្រមចេញមុខបកស្រាយជុំវិញរឿងរ៉ាវមួយនេះ គឺដោយសារតែរឿងហេតុមួយនេះ វាកើតឡើងភ្លាមៗពេកដែលធ្វើអោយនាងទទួលយកមិនបាន ហេតុនេះនាងត្រូវរងចាំអោយមានការត្រជាក់ចិត្តសិន ។
យ៉ាងណា នាងសុំអោយមហាជនសូមយោគយល់ចំពោះនាងសម្រាប់កំហុសដោយអចេតនាមួយនេះ ខណៈពេលដែលនាងស្នើអោយទស្សនិកជនមេត្តារិះគន់មកលើរូបនាងក្នុងន័យស្ថាបនា ជាជាងបន្ទោសបង្អាប់ដោយពាក្យសម្តីមិនល្អ ក្នុងពេលដែលនាងតែងតែបើកទូលាយទទួលយកនូវមតិរិះគន់ពីសំណាក់បងប្អូន ៕
ចែករំលែកព័តមាននេះ