រហូតមកទល់ពេលនេះ រលកកំដៅនៃការរិះគន់ទៅលើតារាសម្តែងអ្នកនាង គង់ ច័ន្ទស្រីមុំ នៅមិនទាន់រលត់នៅឡើយទេ ពាក់ព័ន្ធជាមួយនឹងការបង្ហោះរូបភាពកាន់កាំភ្លើងបាញ់ទឹកចូលរួមសង្ក្រាន្តឆ្នាំថ្មីនៅក្នុងប្រទេសថៃ ក្នុងពេលដែលតារាស្រីរូបនេះបន្តស្ងាត់ស្ងៀមមិនទាន់ចេញមុខបកស្រាយនៅឡើយ ។
យ៉ាងណា ក្នុងនាមជាអ្នកសិល្បៈដូចគ្នា តារាចម្រៀងនាង ពេជ្រ សូលីកា បានចេញមុខជំនួសដោយនាងបានស្នើសុំទៅកាន់មហាជនអោយបន្ថយការរិះគន់ទៅលើ គង់ ច័ន្ទស្រីមុំ ដើម្បីទុកឱកាសអោយនាងចេញមុខបកស្រាយ ។
តារាចម្រៀងនាង ពេជ្រ សូលីកា បានឆ្លើយតបទៅកាន់មហាជនដែលធ្វើការរិះគន់ គង់ ច័ន្ទស្រីមុំ និងរូបនាងដែលចេញមុខការពារតាមរយៈខមមិនក្នុងបណ្តាញសង្គមថា បងប្អូនប្រុងជាន់គ្នាដល់ស្លាប់មែន ទើបសុខចិត្ត ? យល់ថា បងប្អូនកំពុងខឹងហើយស្អប់ តែសុំបន្ធូរបន្ថយដៃខ្លះទៅ បើជាន់មិនដកជើងចឹង តើគ្នាមានឱកាសឯណាមកបកស្រាយនាងបញ្ជាក់ថា បើមិនមែនជា គង់ ច័ន្ទស្រមុំ ក៏ខ្ញុំនៅតែធ្វើបែបនេះដូចគ្នា ព្រោះខ្ញុំយល់អារម្មណ៍អ្នកដែលកំពុងត្រូវគេជេគេជាន់មិនដកជើង ។
នាងថា ខ្ញុំជួយក្នុងនាមខ្ញុំជាខ្មែរគ្នាខុសហើយ ក៏បន្ធូរដៃខ្លះទៅ ហើយរង់ចាំមើលវិញថាមានអីបន្តទៀត មិនមែនជាន់ៗទាល់តែគ្នាងើបមុខមិនរួចចឹងទេ ។
នាងបន្ថែមថា រៀនទុកឱកាស និងរង់ចាំពេលវេលា ដកខ្លះទៅខ្ញុំសុខចិត្តខុស តែខ្ញុំពិតជាមិនចង់ឃើញបងប្អូនចឹងពិតមែន យល់ថា បងប្អូនស្រលាញ់ស្នេហាជាតិ តែខ្ញុំពិតជាមិនចង់ឃើញជាតិសាសន៍ដូចគ្នាមកជាន់គ្នាឈ្លោះគ្នាពិតមែន ពួកគេនោះកំពុងតាមដានមើលយើងរហូត បើយើងបន្តបែបនេះ គេរឹតតែសើចចំអកយើង ។
បន្ថែមខាងលើនេះ ពេជ្រ សូលីកា ក៏បានបង្ហោះសារនៅលើបណ្តាញសង្គមទៀតថា ក្ដីស្រលាញ់ពិតមិនពិត គឺស្ថិតក្នុងចិត្ត ខ្ញុំអ្នកដឹង អ្នកមិនមែនជាខ្ញុំ ខ្ញុំក៏មិនមែនជាអ្នក «វប្បធម៌ខ្មែរ ល្អ ស្អាត ថ្លៃថ្នូរ» ។
កន្លងមក អ្វីដែលខ្ញុំចង់លើកឡើង គឺពង្សាវតាខ្មែរ គ្មានវប្បធម៌នៃការជេប្រមាថគ្នានោះទេ បើមានអ្នកណាខុសយើងណែនាំអោយបានត្រឹមត្រូវ ខ្ញុំព្រមទទួលកំហុស បើគ្រាន់តែខ្ញុំចង់លុបបំបាត់វប្បធម៌នៃការជេគ្នា លើបណ្ដាញសង្គម ដោយក្នុងនាមខ្ញុំក៏ជាប្រជាជនខ្មែរមួយរូប ហើយក៏ជា ម្ដាយគេម្នាក់ផងដែរ។
ដោយឡែក នៅលើផេកផ្លូវការនៃកម្មវិធី 3fun Channel Cambodia ដែលជាកម្មវិធីមាន គង់ ច័ន្ទស្រីមុំ ជាពិធិការិនីនោះ ក៏បានបញ្ចេញសារខ្លីមួយថា ជូនចំពោះបងប្អូនទាំងអស់គ្នា សូមបងប្អូនស្ងប់អារម្មណ៍បន្តិចណា សុំទុកពេលបន្តិច យើងនឹងធ្វើការឆ្លើយតបបងប្អូនឆាប់ៗនេះ ! ក្នុងស្ថានភាពនេះ សូមបងប្អូនយោគយល់ណា ។
ទោះជាយ៉ាងណា បើទោះបីជាមានការចេញមុខជំនួសពីតារាចម្រៀងនាង ពេជ្រ សូលីកា និងពីកម្មវិធីដែលគង់ ច័ន្ទស្រីមុំ ជាពិធីការិនីខាងលើនេះក៏ដោយ គេឃើញមហាជនជាច្រើននៅតែមិនអាចទទួលយកបាននៅឡើយទេ ខណៈពេលដែលពួកគេនៅតែទទូចអោយ គង់ ច័ន្ទស្រីមុំ ចេញមុខបកស្រាយដោយផ្ទាល់ដដែល ៕
ចែករំលែកព័តមាននេះ