ខេត្តព្រៃវែង ៖ ដោយបានការដឹកនាំពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋបាលខេត្តព្រៃវែង សហការជាមួយនឹងសហភាពសហព័ន្ធយុវជនកម្ពុជា បានរៀបចំ…
ខេត្តព្រៃវែង ៖ ដោយបានការដឹកនាំពីឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រដ្ឋបាលខេត្តព្រៃវែង សហការជាមួយនឹងសហភាពសហព័ន្ធយុវជនកម្ពុជា បានរៀបចំ នូវព្រឹត្តិការណ៍សង្ក្រាន្តព្រៃវែង ឆ្នាំ២០២៤ ដើម្បីបង្កភាពសប្បាយរីករាយ ជូនបងប្អូនប្រជាពលរដ្ឋនៅក្នុងខេត្តព្រៃវែង ។
ក្នុងនោះ បងប្អូនប្រជាពលរដ្ឋក្មេងចាស់ប្រុសស្រី បាននាំគ្នាមកលេងកម្សាន្ត យ៉ាងសប្បាយរីករាយជាទីបំផុត នៅក្នុងព្រឹត្តិការណ៍សង្ក្រាន្តព្រៃវែង ដែលមានរយៈពេល ៥ថ្ងៃ ដោយគិតចាប់ពីថ្ងៃទី១២ រហូតដល់ថ្ងៃទី១៦ ខែមេសា ឆ្នាំ២០២៤ ក្នុងនោះទាំងភ្ញៀវទេសចរណ៍ជាតិ និងអន្តរជាតិ សរុបមានចំនួន ២,៣៤០,០០០នាក់ នេះបើយោងតាមរបាយការណ៍របស់រដ្ឋបាលខេត្ត ដែលនេះជាតួលេខមួយដ៏ខ្ពស់បំផុតពុំធ្លាប់មាន នៅក្នុងខេត្តព្រៃវែង បើប្រៀបធៀបទៅនឹងឆ្នាំមុនៗ ។
នៅក្នុងព្រឹត្តិការណ៍ នៃការរៀបចំសង្ក្រាន្តព្រៃវែង ឆ្នាំ២០២៤នេះ បងប្អូនប្រជាពលរដ្ឋ ដែលអញ្ជើញមកលេងកម្សាន្ត បានសម្ដែងអារម្មណ៍មិនខុសគ្នាប៉ុន្មាននោះទេ ដោយលើកឡើងថា ឆ្នាំនេះ មានសភាពប្លែក ការរៀបចំធំ និងតុបតែងភ្លើងពណ៌លម្អស្រស់ស្អាត ប្លែកជាងបណ្តាឆ្នាំកន្លងទៅ ។
ជាមួយគ្នានេះដែរ នៅក្នុងព្រឹត្តិការណ៍ចូលឆ្នាំថ្មីប្រពៃណីជាតិខ្មែររយៈពេល ៣ថ្ងៃ គិតចាប់ពីថ្ងៃទី ១៤-១៥ និង១៦ មេសា ខេត្តព្រៃវែង បានកើតមានហេតុការណ៍គ្រោះថ្នាក់ចរាចរណ៍ ចំនួន៦ករណី ដោយបានបណ្ដាលឲ្យមានមនុស្សក្មេងចាស់ប្រុសស្រីចំនួន ១៣នាក់ បានរងរបួសធ្ងន់និងស្រាល ខូចខាតម៉ូតូចំនួន ១១គ្រឿង។ ដោយឡែកករណីអំពើហិង្សា អំពើចោរកម្មលួចប្លន់ផ្សេងៗ គឺមិនមានកើតឡើងនោះទេ នៅក្នុងទឹកដីខេត្តព្រៃវែង នេះបើយោងតាមរបាយការណ៍របស់ស្នងការដ្ឋាននគរបាលខេត្តព្រៃវែង ៕
ចែករំលែកព័តមាននេះ