ទីក្រុងយេរូសាឡឹម៖ អ៊ីស្រាអែលប្រហែលជាពិបាកនឹងទទួលយកនូវសម្ដីគ្រោតគ្រាតដូចចោលដឹងទាំងដងរបស់អ៊ីរ៉ង់ណាស់, ហើយក៏ប្រហែលជាស៊ូទ្រាំលេបក្រួសលេបថ្មតទៅទៀតមិនកើតដែរ។ ថ្ងៃនេះ រដ្ឋមន្ត្រីការបរទេសអ៊ីស្រាអែលព្រមានធ្ងន់ៗថាកងទ័ពរបស់ខ្លួននឹងវាយប្រហារអ៊ីរ៉ង់ឱ្យណាណីម្ដង លើកនេះអត់វាយប្រយោលៗទៅរកកូនចៅអ៊ីរ៉ង់ ឬត្រឹមស្ថានកុងស៊ុលអ៊ីរ៉ង់ដូចមុនទេ វាយចំប្រទេសអ៊ីរ៉ង់តែម្ដង។
រដ្ឋមន្ត្រីរូបនេះសង្កត់ធ្ងន់ថាឱ្យតែអ៊ីរ៉ង់ហ៊ានវាយប្រហារចេញពីទឹកដីអ៊ីរ៉ង់ចូលទឹកដីអ៊ីស្រាអែល អ៊ីស្រាអែលគ្មានបង្អង់យូរតទៅទៀតទេ មុខតែដាក់វិញផូងៗតែម្ដង។ នេះជាភាសាដ៏មុតស្រួចចំពេលប្រទេសទាំង២កំពុងមានកំហឹងដាក់គ្នាយ៉ាងពុះកញ្ជ្រោល និងយ៉ាងក្ដៅគគុកដូចទឹកពុះ១០០អស្សា។ តាមត្រូវ អ្នកដែលសមនឹងមានកំហឹងខ្លាំងគឺអ៊ីរ៉ង់ឯណោះទៅវិញទេ។
នៅសុខៗ អ៊ីស្រាអែលបាញ់មីស៊ីលដាក់ស្ថានកុងស៊ុលអ៊ីរ៉ង់នៅប្រទេសស៊ីរី បណ្ដាលឱ្យស្លាប់មនុស្សជាច្រើននាក់។ និយាយឱ្យចំទៅ, មនុស្សនៅក្នុងអគារនោះគ្មាននរណាម្នាក់អាចរួចខ្លួនឡើយ។ បើមិនស្លាប់ក៏រងរបួសស្ទើរស្លាប់ស្ទើររស់ផងដែរ។ ការវាយប្រហាររបស់អ៊ីស្រាអែលនៅក្នុងគ្រានោះបានសម្លាប់ឧត្ដមសេនីយ៍យោធារបស់អ៊ីរ៉ង់លំដាប់មេបញ្ជាការជាន់ខ្ពស់។
រដ្ឋមន្ត្រីការបរទេសអ៊ីស្រាអែលឆ្លៀតបោះពាក្យបោះសម្ដីថែមទៀតថាបើអ៊ីរ៉ង់ហ៊ានវាយប្រហារចេញពីទឹកដីអ៊ីរ៉ង់ អ៊ីស្រាអែលនឹងចាត់វិធានការឆ្លើយតបយ៉ាងទាន់ចិត្ត ហើយនឹងវាយប្រហារ (ដោយគ្រាប់មីស៊ីល) ចូលទឹកដីអ៊ីរ៉ង់តែម្ដង។ អគ្គមគ្គុទ្ទេសក៍អ៊ីរ៉ង់បញ្ជាក់ជាថ្មីថាលោកត្រូវតែសងសឹកទៅលើអ៊ីស្រាអែលវិញនៅក្នុងសំណុំរឿងបាញ់ប្រហារស្ថានកុងស៊ុល។
រដ្ឋាភិបាលទីក្រុងតេអេរ៉ង់ប្រកាសឱ្យអ៊ីស្រាអែលទទួលខុសត្រូវនៅក្នុងរឿងនេះព្រោះស្លាប់មនុស្សអស់ច្រើនគួរសមដែររហូតដល់១២នាក់។ អ៊ីស្រាអែលមិនទាន់ប្រកាសទទួលស្គាល់ថានេះជាស្នាដៃរបស់ខ្លួនទេ ហើយក៏មិនបានថាខ្លួនជាប់ពាក់ព័ន្ធនឹងការបាញ់ប្រហារនេះដែរ។ ប៉ុន្តែបើអ៊ីរ៉ង់ហ៊ានហក់ជាមួយអ៊ីស្រាអែល អ៊ីស្រាអែលថ្លែងថាខ្លួនអាចកំដរបាន។ ចាប់តាំងពីបច្ចាមិត្តទាំងពីរធ្វើសង្គ្រាមប្រយោលជាមួយគ្នាជាហូរហែមក គេអាចចាត់ទុកថានេះជាការសង្គ្រឺតធ្មេញដាក់គ្នាដ៏ខ្លាំងក្លាបំផុត។
គេដឹងថាឧត្ដមសេនីយ៍អ៊ីរ៉ង់ម្នាក់ដែលជាមនុស្សសំខាន់នៃឆ្មាំបដិវត្តអ៊ីរ៉ង់ក៏បានក្ស័យសង្ខារដោយសារគ្រាប់មីស៊ីលរបស់អ៊ីស្រាអែលបាញ់ចូលស្ថានកុងស៊ុលផងដែរ។ ឧត្ដមសេនីយ៍រូបនេះធ្លាប់ដឹកនាំកម្លាំងវាយប្រហារនៅលីបង់ និងស៊ីរីរហូតដល់ឆ្នាំ២០១៦។ នៅក្នុងចំណោមអ្នកស្លាប់១១នាក់ទៀតមានឆ្មាំបដិវត្តអ៊ីរ៉ង់៦នាក់, ជនជាតិស៊ីរី៤នាក់ និងក្រុមហេស្បូឡាម្នាក់។
គេកត់សម្គាល់ថារយៈពេលប៉ុន្មានឆ្នាំចុងក្រោយនេះ អ៊ីស្រាអែលវាយប្រហារមូលដ្ឋានដែលមានទំនាក់ទំនងជាមួយអ៊ីរ៉ង់នៅប្រទេសស៊ីរី។ មើលទៅអ៊ីស្រាអែលទំនងជាចង់រំខានការផ្ទេរអាវុធ និងការធ្វើសកម្មភាពរបស់គូបដិបក្សជាមួយក្រុមហេស្បូឡា។ អ៊ីស្រាអែលច្រើនមានទម្លាប់១។ វាយប្រហាររួចហើយរក្សាភាពស្ងប់ស្ងាត់បានល្អណាស់។ ចាប់តាំងពីសង្គ្រាមអ៊ីស្រាអែលផ្ទុះឡើងកាលពីថ្ងៃទី៧ ខែតុលា ឆ្នាំ២០២៣ អ៊ីស្រាអែល និងក្រុមហេស្បូឡាប៉ះទង្គិចគ្នារប៉េះរប៉ោះសឹងតែរៀងរាល់ថ្ងៃ។
បើនិយាយទៅ កូនចៅអ៊ីរ៉ង់មានច្រើន គ្រាន់តែមិនអាចធ្វើអ្វីអ៊ីស្រាអែលកើត។ សូម្បីតែមេធំៗរបស់ក្រុមហាម៉ាស់ក៏ជាកូនចៅរបស់អ៊ីរ៉ង់ និងទទួលការឧបត្ថម្ភគាំទ្រពីអ៊ីរ៉ង់ផងដែរ។ អគ្គមគ្គុទ្ទេសក៍អ៊ីរ៉ង់ប្រកាសសងសឹកអ៊ីស្រាអែលដូចខាងលើនេះនៅឯពិធីសូត្រធម៌។ លោកថ្លែងថាការដែលអ៊ីស្រាអែលវាយប្រហារស្ថានកុងស៊ុលរបស់អ៊ីរ៉ង់មានន័យស្មើនឹងវាយប្រហារប្រទេសអ៊ីរ៉ង់។ លោកយល់ថាគេមិនអាចបណ្ដោយឱ្យរបបយង់ឃ្នងនេះរួចខ្លួនទេ។ យើងត្រូវតែប្រដៅពួកគេឱ្យស្គាល់ដៃម្ដង៕
ប្រភព៖ AP
ចែករំលែកព័តមាននេះ