ខេត្តកំពង់ស្ពឺ ៖ បែកធ្លាយរឿងលោក សោម សុធា អនុប្រធានមន្ទីរសាធារណការ និងដឹកជញ្ជូនខេត្តកំពង់ស្ពឺ និងជាប្រធានស្ថានីយជញ្ជីងថ្លឹងរថយន្តគ្រប់ប្រភេទ នៅតាមបណ្តោយផ្លូវជាតិលេខ៤ ស្ថិតនៅក្នុងសង្កាត់កណ្តោលដុំ…
ខេត្តកំពង់ស្ពឺ ៖ បែកធ្លាយរឿងលោក សោម សុធា អនុប្រធានមន្ទីរសាធារណការ និងដឹកជញ្ជូនខេត្តកំពង់ស្ពឺ និងជាប្រធានស្ថានីយជញ្ជីងថ្លឹងរថយន្តគ្រប់ប្រភេទ នៅតាមបណ្តោយផ្លូវជាតិលេខ៤ ស្ថិតនៅក្នុងសង្កាត់កណ្តោលដុំ ក្រុងច្បារមន ខេត្តកំពង់ស្ពឺ ថា បានទទួលលុយប្រចាំខែ ពីក្រុមរថយន្តដឹកលើសទម្ងន់ ដោយបើកដៃឲ្យរថយន្តទាំងនោះមិនចូលថ្លឹងទម្ងន់ហើយបើកបង្ហួសស្ថានីយតែម្តង ។
តាមប្រភពព័ត៌មានបានបង្ហើបឱ្យដឹងថា លោក សោម សុធា អនុប្រធានមន្ទីរសាធារណការនិងដឹកជញ្ជូនខេត្តកំពង់ស្ពឺ និងជាប្រធានគ្រប់គ្រងជញ្ជីងថ្លឹងរថយន្តក្នុងខេត្តកំពង់ស្ពឺ ជារៀងរាល់ថ្ងៃ កំពុងតែកើបលុយរាប់លានរៀលក្នុងមួយថ្ងៃៗ ។ ដោយសារតែលោក សោម សុធា កំពុងតែប្រើអំណាចទៅលើរថយន្តដឹកលើសទម្ងន់កត់សម្គាល់ផ្លាកលេខ ហើយតម្រូវឱ្យម្ចាស់រថយន្តទាំងអស់នោះត្រូវបង់លុយក្បាលឡានវិញ តែក៏មានខ្លះបង់ប្រចាំខែក៏មានដូចបានកេរធ្លាក់ពីលើមេឃ ។
ដោយឡែក ក្រុមម្ចាស់រថយន្តមួយចំនួនដែលមានរថយន្តរត់ឆ្លងកាត់ជញ្ជីងកណ្ដាលដុំនេះបាននិយាយថា រាប់ពីរាល់ថ្ងៃហាក់បីដូចជា រកស៊ីចិញ្ចឹមគ្រួសារគេដូច្នោះដែរ ព្រោះថា បើមិនបង់លុយទេច្បាស់ជារកស៊ីលែងបានហើយ ដូចពាក្យថា ចូលស្ទឹងតាមបទ ។
ពាក់ព័ន្ធនឹងប្រភពខាងលើនេះដែរ អ្នកយកព័ត៌មានយើងបានទំនាក់ទំនងទៅលោកសោមសុធា ប្រធានស្ថានីយ ដើម្បីសុំការពន្យល់បកស្រាយដោយលោកបានប្រាប់ថា ជាប់រវល់សូមទំនាក់ទំនងជាមួយអនុប្រធានស្ថានីយវិញនោះ គឺលោក អ៊ាម ជោតិវិត្យា ។
ជួបជាមួយអ្នកយកព័ត៌មានយើងលោក អ៊ាម ជោតិវិត្យា អនុប្រធានស្ថានីយ បានប្រាប់ថាជាគោលការជញ្ជីង រាល់រថយន្តដឹកលើសទម្ងន់លើកទី១ ធ្វើកិច្ចសន្យាតាមបច្ចេកទេសត្រូវពិន័យពួកគាត់ ប៉ុន្តែពេលខ្លះពួកគាត់មិនស្តាប់ដែរ ។ លោកបានប្រៀបធៀបថា ជញ្ជីងប្រើល្បឿនផ្សេង ប៉ុន្តែជញ្ជីងនៅកណ្តោលដុំ ប្រសិនបើម្ចាស់រថយន្ត និងក្រុមហ៊ុនមិនសុខចិត្ត រឿងទម្ងន់អាចថ្លឹងម្តងទៀត ហើយថតរូបទុកទៅ ។
ពាក់ព័ន្ធទៅនឹងសំណួរដែលថា ក្រុមលោកបានទទួលប្រាក់ប្រចាំខែ និងរាប់ក្បាលឡានដែលដឹកលើសទម្ងន់ពីក្រុមរថយន្តដែលមិនចូលថ្លឹង ។ លោកបានបញ្ជាក់ប្រាប់ផងដែរ «អត់ដែលបានទទួលការបង់លុយជាក្បាលឡាន ឬជាខែជាអីនោះទេ ឱ្យតែការណែនាំ ចំពោះរថយន្តសណ្ដោង ភ្លៅ៥ ទម្ងន់៤០តោន មានឡានខ្លះអាចដឹកលើសដល់ ៤៥តោនក៏មាន ពេលខ្លះដោយសារតែមានការយោគយល់ក៏ចេះតែសម្របសម្រួលគ្នាថ្លៃបាយម្ហូបទៅតាមស្ថានការណ៍ជាក់ស្ដែង និងអនុគ្រោះទៅ ។
ចំណែកឡានតូច ដែលលើសពីបីតោន បើចរចាសុំការអនុគ្រោះ ពេលខ្លះពួកគាត់ ជូនលុយតិចតួច ចេះតែយោគយល់ ជួនកាលអ្នកខ្លះមិនឱ្យក៏មាន ។ ទាក់ទិនទៅនឹងការលើកឡើងថា មានការសម្លុតគំរាមនោះ ទទួលស្គាល់ជួនកាលមន្ត្រីខ្លះសម្លុតគំរាមតៃកុងរថយន្តក៏មាន ។ លោកបានបញ្ជាក់ថា នៅក្នុងច្បាប់ចែងថា លើស១០០គីឡូ ត្រូវតែផាកពិន័យហើយ ។
លោក អ៊ាម ជោតិវិត្យា បន្តថា នៅស្ថានីយមានដាក់កាមេរាទាំងក្នុង និងក្រៅ ។ ចំណែករថយន្តដែលដឹកលើស១០តោន ៥តោន ពិន័យ១លានរៀល ។ លោកទទួលស្គាល់ថា មានរថយន្តខ្លះរត់គេចជញ្ជីងមែន ម្តងម្កាល ប៉ុន្តែមិនញឹកញាប់នោះទេ ។ នៅទីនោះមានសមត្ថកិច្ចចម្រុះ ការពារសុវត្ថិភាពតែប៉ុណ្ណោះ ។
មានការលើកឡើងផងដែរថា បញ្ហាអស់ទាំងនេះ គួរណាស់តែថ្នាក់ដឹកនាំក្រសួងសាធារណការចាត់បញ្ជូនក្រុមជំនាញឲ្យមកធ្វើការត្រួតពិនិត្យទៅលើក្រុមមន្ត្រីនៅស្ថានីយជញ្ជីងកណ្ដោលដុំនេះម្ដងហើយ បើបណ្តែតបណ្ដោយតទៅទៀត ទាំងប្រធាន និងអនុប្រធានច្បាស់ជាបានចិត្ត ហើយបន្តជិះសេះលែងដៃជាក់ជាមិនខាន ៕
ចែករំលែកព័តមាននេះ