ខេត្តតាកែវ ៖ ក្រុមប្រជាពលរដ្ឋជាច្រើនគ្រួសារ មកពីភូមិអង្គក្រូច ឃុំបូរីជលសារ ស្រុកបូរីជលសារ ខេត្តតាកែវ នៅព្រឹកថ្ងៃអង្គារ៍ ទី៩ ខែមេសា ឆ្នាំ២០២៤នេះ បានផ្ទុះការតវ៉ានៅមុខតុលាការខេត្តតាកែវ ដោយទាមទារឱ្យតុលាការខេត្តតាកែវ និងបានអំពាវនាវដល់ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងសម្ដេចមហាបវរធិបតី ហ៊ុន ម៉ាណែត ជួយរកយុត្តិធម៌ ជូនពួកគាត់ក្រោយពីអតីតប្រធានការរិយាល័យសុរិយោដីស្រុកបូរីជលសារ បានប្ដឹងពួកគាត់មកកាន់តុលាការខេត្តតាកែវ ពីបទរំលោភដីអាស្រ័យផល ដែលដីទាំងអស់នេះ ពួកកាត់បានរស់នៅជិត៤០ឆ្នាំ កន្លងមកហើយ ។
បើតាមបងប្អូនប្រជាពលរដ្ឋ បានប្រាប់បណ្ដាញសារព័ត៌មាននៅមុខតុលាការខេត្តតាកែវ អោយដឹងថា ឈ្មោះ ញ៉ៅ លី អតីតប្រធានការិយាល័យសុរិយោដីស្រុកបូរីជលសារ បានប្ដឹងចោទបំពានថា ប្រជាពលរដ្ឋបានសង់ផ្ទះរស់នៅ និងអាស្រ័យផល លើដីរបស់គាត់ តែតាមការពិត ប្លង់ដី ដែលបុគ្គលឈ្មោះ ញ៉ៅ លី មាននោះគឺទើបតែធ្វើឆ្នាំ១៩៩៣ ប៉ុណ្ណោះ ចំណែកបងប្អូនប្រជាពលរដ្ឋជាច្រើនគ្រូសារបានមករស់នៅសង់ផ្ទះ អាស្រ័យផល តាំងពីឆ្នាំ១៩៨០មកម្លេះ ហើយការមករស់នៅនេះ មានទាំងបង្កាន់ដៃអាស្រ័យផល ដែលទទួលស្គាល់ដោយលោកមេភូមិ មេឃុំ ថែមទៀតផង ។
បងប្អូនប្រជាពលរដ្ឋ ក៏បានសំណូមពរដល់តុលាការខេត្តតាកែវ ទំលាក់ការចោទប្រកាន់ និងបានសំណូមពរដល់ប្រមុខរាជរដ្ឋាភិបាលជួយអន្តរាគមន៍បញ្ហានេះ ដោយជួយសើរើ ការលួចធ្វើប្លង់ដីរបស់បុគ្គល ញ៉ៅ លី ដែលខ្លួនពីមុនជាប្រធានការរិយាល័យសុរិយោដីស្រុក បានលួចធ្វើប្លង់យកដីប្រជាពលរដ្ឋ ដោយមិនអោយប្រជាពលរដ្ឋបានដឹង ហើយថែមទាំងប្ដឹងប្រជាពលរដ្ឋ មកកាន់តុលាការ ថែមទៀតផង ។
អតីតមេភូមិអង្គក្រូច ស្រុកបូរីជលសារ ដែលបានរៀបចំដី នៅក្នុងភូមិនេះ បានធ្វើការអះអាងថា លោកមិនបានដឹងថា ដីនៅតំបន់នេះមានកម្មសិទ្ធិរបស់បុគ្គលឈ្មោះ ញ៉ៅ លី នោះទេ គឺឃើញថា បងប្អូនប្រជាពលរដ្ឋបានរស់នៅជាយូឆ្នាំមកហើយ ដូច្នោះ សូមថ្នាក់ដឹកនាំជួយអន្តរាគមន៍ដល់បងប្អូនប្រជាពលរដ្ឋ អោយបានកាន់កាប់ដីដោយស្របច្បាប់ផង។ សូមសម្តេចប្រមុខរាជរដ្ឋាភិបាល ជួយដល់ប្រជាពលរដ្ឋយើងផង ៕ ដោយ ៖ សេង សុធា
ចែករំលែកព័តមាននេះ