ADផ្ទាំងផ្សព្វផ្សាយពាណិជ្ជកម្ម

Picture

អ៊ីស្រាអែល​បា.ញ់​មីស៊ីល​ដាក់​ស្ថាន​កុងស៊ុល​អ៊ីរ៉ង់​នៅ​ស៊ីរី​ស្លា.ប់​៧​នាក់

1 អាទិត្យ មុន

ទី​ក្រុង​យេរូសាឡឹម៖ កាល​ពី​យប់​មិញ​ អ៊ី​ស្រាអែល​បើក​ការ​វាយ​ប្រហារ​ធំ​ៗ​ជា​ច្រើន​កន្លែង​ និង​សម្លាប់​មនុស្ស​ជា​ច្រើន​នាក់​រួម​ទាំង​បុគ្គលិក​ផ្ដល់​ជំនួយ​មនុស្ស​ធម៌​ផង​ដែរ​។ ​នៅ​ក្នុង​ករណី​មួយ​ អ៊ីស្រាអែល​បាញ់​​មីស៊ីល​​ជា​ច្រើន​គ្រាប់​ដាក់​​​​ស្ថាន​កុងស៊ុល​អ៊ីរ៉ង់​​នៅប្រទេស​​ស៊ីរី បណ្ដាល​​ឱ្យ​​ស្លាប់​មេ​បញ្ជា​ការ​ជាន់​ខ្ពស់​នៃឆ្មាំ​បដិវត្ត​អ៊ីរ៉ង់​ម្នាក់​ និង​ឧត្ដម​សេនីយ៍​​យោធា​របស់​​​អ៊ីរ៉ង់​ម្នាក់​។ ចំណែក​​​នៅ​តំបន់​ហ្កាហ្សា​ អ៊ីស្រាអែល​​បន្ត​ទម្លាក់​គ្រាប់​បែក​ទៅ​លើ​មូល​ដ្ឋាន​ដែល​ជាប់​សង្ស័យ​ថា​ជា​របស់​ក្រុម​ហាម៉ាស់​…

ទី​ក្រុង​យេរូសាឡឹម៖ កាល​ពី​យប់​មិញ​ អ៊ី​ស្រាអែល​បើក​ការ​វាយ​ប្រហារ​ធំ​ៗ​ជា​ច្រើន​កន្លែង​ និង​សម្លាប់​មនុស្ស​ជា​ច្រើន​នាក់​រួម​ទាំង​បុគ្គលិក​ផ្ដល់​ជំនួយ​មនុស្ស​ធម៌​ផង​ដែរ​។ ​នៅ​ក្នុង​ករណី​មួយ​ អ៊ីស្រាអែល​បាញ់​​មីស៊ីល​​ជា​ច្រើន​គ្រាប់​ដាក់​​​​ស្ថាន​កុងស៊ុល​អ៊ីរ៉ង់​​នៅប្រទេស​​ស៊ីរី បណ្ដាល​​ឱ្យ​​ស្លាប់​មេ​បញ្ជា​ការ​ជាន់​ខ្ពស់​នៃឆ្មាំ​បដិវត្ត​អ៊ីរ៉ង់​ម្នាក់​ និង​ឧត្ដម​សេនីយ៍​​យោធា​របស់​​​អ៊ីរ៉ង់​ម្នាក់​។

ចំណែក​​​នៅ​តំបន់​ហ្កាហ្សា​ អ៊ីស្រាអែល​​បន្ត​ទម្លាក់​គ្រាប់​បែក​ទៅ​លើ​មូល​ដ្ឋាន​ដែល​ជាប់​សង្ស័យ​ថា​ជា​របស់​ក្រុម​ហាម៉ាស់​ ឬ​​ជា​សម្ព័ន្ធ​មិត្ត​របស់​ហាម៉ាស់។ ​ប៉ុន្តែ​កាល​ពី​យប់​មិញ​​ អ៊ីស្រាអែល​បាន​ប្រព្រឹត្ត​ខុស​ធ្ងន់​ណាស់​ ទម្លាក់​គ្រាប់​បែក​ចំ​​​ក្បួន​រថ​យន្ត​ដឹក​បុគ្គលិក​​របស់​អង្គ​ការ​​មនុស្ស​ធម៌​ឈ្មោះ​វើល​.សិនត្រល​.​ឃីត​ឆឹន (World Central Kitchen) បណ្ដាល​ឱ្យ​ស្លាប់​យ៉ាង​តិច​​​​​៧​នាក់។​

ជា​ដំបូង​ យើង​ងាក​ទៅ​ចាប់​អារម្មណ៍​ព្រឹត្តិ​ការណ៍​នៅ​អ៊ីរ៉ង់ និង​ស៊ីរី។ ​រដ្ឋាភិបាល​អ៊ីរ៉ង់ និង​ស៊ីរី​ប្រកាស​ថ្កោល​ទោស​ជា​ទម្ងន់​ចំពោះ​ការ​វាយ​ប្រហារ​របស់​អ៊ីស្រាអែល​ទៅ​លើ​​ស្ថាន​កុង​ស៊ុល​នៅ​ទី​ក្រុង​ដាម៉ាស់។ ទី​​នេះ​ស្ថិត​នៅ​មិន​ឆ្ងាយ​ប៉ុន្មាន​ពី​ស្ថាន​ទូត​អ៊ីរ៉ង់​ប្រចាំ​ប្រទេស​ស៊ីរី​​។ កង​ទ័ព​អ៊ីស្រាអែល​មុន​ដំបូង​មិន​ធ្វើ​អត្ថា​ធិប្បាយ​វែង​ឆ្ងាយ​​ទេ​។ ប៉ុន្តែ​ក្រោយ​មក​ទទួល​ស្គាល់​ថា​​ប៉ុន្មាន​ឆ្នាំ​ចុង​ក្រោយ​នេះ ខ្លួន​​ពិត​ជា​បាន​​​វាយ​ប្រហារ​គោល​ដៅ​រាប់​រយ​កន្លែង​នៅ​ប្រទេស​ស៊ីរី​​។

អ៊ីស្រាអែល​អះអាង​ថា​ទី​នេះ​ជា​​មូល​ដ្ឋាន​របស់​​ក្រុម​សម្ព័ន្ធ​មិត្ត​​​អ៊ីរ៉ង់ ឬ​​កង​កម្លាំង​​​ប្រដាប់​អាវុធ​ដែល​ទទួល​​ការ​ឧបត្ថម្ភ​គាំទ្រ​ពី​​ឆ្មាំ​បដិវត្ត​អ៊ីរ៉ង់​។ គេ​គិត​ថា​ការ​វាយ​ប្រហារ​កាល​ពី​យប់​មិញ​នោះ​អាច​នឹង​ធ្វើ​​ឱ្យ​​សង្គ្រាម​នៅ​តំបន់​ហ្កាហ្សា​មិន​មែន​ថយ​ចុះ​ទេ ប៉ុន្តែ​​ផ្ទុះ​ឡើង​កាន់​តែ​ខ្លាំង​​​។ ​ហេងស៊យ​នេះ​ក៏​ជា​អ្វី​ដែល​អ៊ីស្រាអែល​ប្រាថ្នា​ចង់​បាន​ផង​ដែរ​។ បើ​មិន​អីចឹង​ទេ​អ៊ីស្រាអែល​អាច​នឹង​​​បន្ធូរ​ដៃ​ខ្លះ​ហើយ​។ មិន​មែន​វាយ​ប្រហារ​ចេញ​​ទៅ​គ្រប់​មុខ​ព្រួញ​បែប​នេះ​ទេ​។

នេះ​អាច​ជា​យុទ្ធ​សាស្ត្រ​បញ្ឆោត​ពស់​ឱ្យ​ចេញ​ពីរូង​​ ឬ​យុទ្ធ​សាស្ត្រ​អូស​ទាញ​អ្នក​ដទៃ​ឱ្យ​ចូល​ពាក់​ព័ន្ធ​នឹង​ជម្លោះ​នៅ​ហ្កាហ្សា​។ អ្នក​ខ្លះ​គិត​ថា​អ៊ីស្រាអែល​​កំពុង​ធ្វើ​តេស្ត​ចង់​ដឹង​ថា​តើ​​​អ៊ីរ៉ង់​ និង​សម្ព័ន្ធ​មិត្ត​របស់​អ៊ីរ៉ង់​អាច​ស៊ូ​ទ្រាំ​ដល់​កម្រិត​ណា​មិន​ហក់​ចូល​ក្នុង​ជម្លោះ​អ៊ីស្រាអែល​-​ហាម៉ាស់​​។ អ៊ីស្រាអែល​ចង់​ដាក់​សម្ពាធ​កាន់​តែ​ខ្លាំង​លើ​ក្រុម​បច្ចា​មិត្ត​។ ចំ​ពោះ​ការ​​បាញ់​ប្រហារ​​ចូល​ទឹក​ដី​ស៊ីរី​កាល​ពី​យប់​មិញ​​នោះ​ កង​ទ័ព​ស៊ីរី​បាញ់​ទម្លាក់​គ្រាប់​មីស៊ីល​របស់​អ៊ីស្រាអែល​បាន១​​ចំនួន​ដែរ​​ ប៉ុន្តែ​មិន​ទាំង​អស់​ទេ​​។

គ្រាប់​មីស៊ីល​ខ្លះ​នៅ​តែ​អាច​ឆ្លង​កាត់​ខែល​ការ​ពារ​ដែន​អាកាស ហើយ​អាច​​វាយ​ប្រហារ​​បាន​ចំ​​គោល​ដៅ​ល្អ​ណាស់​​។ ក្រសួង​ការ​ពារ​ជាតិស៊ី​រីថ្លែង​ថា​គ្រាប់​មីស៊ីល​អ៊ី​ស្រាអែល​បាញ់​ខ្ទេច​អគារ​មួយ​ខ្នង​។ ​ដូច្នេះ មនុស្ស​ទាំង​អស់​នៅ​ក្នុង​អគារ​នោះ​គ្មាន​នរណា​ម្នាក់​​រួច​ខ្លួន​ទេ​ ​​​បើ​មិន​ស្លាប់​ ក៏​រង​របួស​​ដែរ​​។ ​​ឯក​អគ្គ​រដ្ឋ​ទូត​អ៊ីរ៉ង់​ប្រចាំ​ប្រទេស​ស៊ីរី​ប្រាប់​ថា​​យន្ត​ហោះ​អែហ្វ​សាម​ប្រាំ (F-35) របស់​អ៊ីស្រាអែល​​​ចង់​វាយ​ប្រហារ​អគារ​ស្នាក់​នៅ​របស់​គាត់​, ស្ថាន​កុង​ស៊ុល និង​ទី​ស្នាក់​ការ​របស់​សេនា​នុព័ន្ធ​យោធា​ប្រចាំ​ស្ថាន​ទូត​អ៊ីរ៉ង់​នៅ​ស៊ី​រី​ថែម​ទៀត​ ហើយ​បាន​សម្លាប់​​មនុស្ស​ពី​៥​ទៅ​៧​នាក់​​។ សូម្បី​តែ​​ក្រុ​មអ្នក​ការទូត​​មួយ​ចំនួន​​ក៏​បាន​ស្លាប់​ផង​ដែរ​។

ងាក​មក​មើល​ព្រឹត្តិ​ការណ៍​នៅ​តំបន់​ហ្កាហ្សា​វិញ​ម្ដង​។ ​​អង្គ​ការ​មនុស្ស​ធម៌​ឈ្មោះ​ WCK ​​កើត​ទុក្ខ​មិន​សុខ​ចិត្ត​ចំពោះ​ករណី​ទម្លាក់​គ្រាប់​បែក​ទៅ​លើ​រថ​យន្ត​ដឹក​ជញ្ជូន​បុគ្គលិក​របស់​ខ្លួន​​។ អ៊ីស្រាអែល​អាច​នឹង​វាយ​ប្រហារ​ច្រឡំ​ ឬ​យ៉ាង​ណា​​នៅ​មិន​ទាន់​ដឹង​នៅ​ឡើយ​ទេ​​។ ប៉ុន្តែ​​គេ​ដឹង​ថា​​​​បុគ្គលិក​​មនុស្ស​ធម៌​យ៉ាង​តិច​៧​នាក់បាន​ស្លាប់​​​។ ក្នុង​​នោះ​ក៏​មាន​បុគ្គលិក​ជា​ជន​ជាតិ​អូស្ត្រាលី​ម្នាក់​ផង​ដែរ​។ ឥឡូវ​នេះ រដ្ឋាភិបាល​អូស្ត្រាលី​ទាម​ទារ​​ឱ្យ​​ជន​ដៃ​ដល់​ត្រូវ​តែ​ទទួល​ខុស​ត្រូវ​នៅ​ចំពោះ​មុខ​ច្បាប់​។

អង្គ​ការ​ WCK ថ្លែងថា​មុន​ពេល​កើតហេតុ, ខ្លួន​បាន​ដឹក​ស្បៀង​អាហារមួយ​​រយ​តោន​យក​ទៅ​រក្សា​ទុក​នៅ​ក្នុង​ឃ្លាំង​​។ នៅ​ពេល​រថ​យន្ត​​ដឹក​បុគ្គលិក​​ត្រឡប់​មក​វិញ​​ក៏​ត្រូវ​អ៊ីស្រាអែល​ទម្លាក់​គ្រាប់​បែក​ពី​លើ​តែ​ម្ដង​​​។ ដូច្នេះ អង្គ​ការ​សម្រេច​ចិត្ត​ផ្អាក​ការ​ងារ​ជា​បន្ទាន់​។ ​អង្គ​ការ​​បញ្ជាក់​ថា​ខ្លួន​បាន​ជម្រាប​​អ៊ីស្រាអែល​រួច​ហើយ​​អំពី​ផ្លូវ​ធ្វើ​ដំណើរ​របស់​បុគ្គលិក​​ខ្លួន។​​ ប៉ុន្តែ​​មិន​ដឹង​យ៉ាង​ម៉េច​បាន​ជា​ពួក​គេ​ចូល​ចិត្ត​វាយ​ប្រហារ​​ដូច្នេះ​​​​។ អ៊ីស្រាអែល​កំពុង​ពិនិត្យ​មើល​ឡើង​វិញ​ទៅ​លើ​ករណី​នេះ​ដើម្បី​ស្វែង​រក​ការ​ពិត​៕

ប្រភព៖​ BBC
https://www.bbc.com/news/world-middle-east-68708923

អត្ថបទសរសេរ ដោយ

កែសម្រួលដោយ