ខេត្តកំពង់ឆ្នាំង ៖ ទីតាំងម៉ាស៊ីនកិនកម្ទេចឈើខ្នាតធំខុសច្បាប់មួយកន្លែង ត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្តកំពង់ឆ្នាំងចុះស្រាវជ្រាវឃើញកាលពីវេលាម៉ោង១1 និង30នាទី រសៀលថ្ងៃទី28 ខែមីនា ឆ្នាំ2024 នៅភូមិក្រាំងស្គាត្បូង ឃុំក្រាំងស្គា…
ខេត្តកំពង់ឆ្នាំង ៖ ទីតាំងម៉ាស៊ីនកិនកម្ទេចឈើខ្នាតធំខុសច្បាប់មួយកន្លែង ត្រូវបានសមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្តកំពង់ឆ្នាំងចុះស្រាវជ្រាវឃើញកាលពីវេលាម៉ោង១1 និង30នាទី រសៀលថ្ងៃទី28 ខែមីនា ឆ្នាំ2024 នៅភូមិក្រាំងស្គាត្បូង ឃុំក្រាំងស្គា ស្រុកទឹកផុស ។
លោកឧត្តមសេនីយ៍ត្រី ចាប ចន្ថា ស្នងការរងនគរបាលខេត្តកំពង់ឆ្នាំងបានឲ្យដឹងថា មុនពេលចុះស្រាវជ្រាវប្រទះឃើញទីតាំងលួចលាក់កិនកម្ទេចឈើដ៏ធំមួយកន្លែងនេះ ដោយសារកាលពីថ្ងៃទី27 ខែមីនា សមត្ថកិច្ចនគរបាលប្រឆាំងបទល្មើសសេដ្ឋកិច្ចខេត្ត បានចាប់ឃាត់រថយន្តធុនធំមួយគ្រឿងបានដឹកកម្ទេចឈើនេះប្រមាណជា28តោន នៅចំណុចឃុំឈូកស ស្រុកកំពង់ត្រឡាច គោលដៅដឹកទៅខេត្តកំពត។
ក្រោយការចាប់រថយន្តដឹកកម្ទេចឈើខុសច្បាប់ខាងលើ លោកឧត្តមសេនីយ៍ទោ ខូវ លី ស្នងការនគរបាលខេត្តកំពង់ឆ្នាំង បានបានបញ្ជារឲ្យកម្លាំងសមត្ថកិច្ច នគរបាល ចុះស្រាវជ្រាវរកទីតាំងខាងលើ ដោយមានការសម្របសម្រួលពីលោក កែវ វន្នី ព្រះរាជអាជ្ញារងអមសាលាដំបូងខេត្ត ។
ជាលទ្ធផលរបស់ក្រុមសមត្ថកិច្ចនគរបាលបានរកទីតាំងដាក់ម៉ាស៊ីនកិនកម្ទេចឈើមួយកន្លែង ស្ថិតនៅក្នុងទីតាំងក្រុមហ៊ុន ហ្គ្រេនរីសត ដោយបានប្រទះឃើញម៉ាស៊ីនកិនកម្ទេចឈើទំនើប2គ្រឿងគំនរកំទេចឈើរាប់រយតោនចំនួន3កន្លែង គ្រឿងចក្រសម្រាប់លើកដើមឈើ២គ្រឿង ។ ដោយឡែកកម្មករ និងមេការ នៅក្នុងទីតាំងខាងលើបានរត់គេចខ្លួនអស់ ។ បើតាមការបញ្ជាក់របស់លោកមេភូមិក្រាំងស្គាត្បូងបានឲ្យដឹងថា ទីតាំងកិនកម្ទេចឈើខាងលើនេះ បានកើតឡើងតាំងពីខែកក្កដាមកម្ល៉េះ ។
ចំពោះវត្ថុតាងមានម៉ាស៊ីនគ្រឿងចក្រខាងលើ ត្រូវបានប្រគល់ជូនសមត្ថកិច្ចនគរបាលសេដ្ឋកិច្ចស្នងការនគរបាលខេត្ត សហការជាមួយនឹងសមត្ថកិច្ច មូលដ្ឋានយាមការពារ ដើម្បីបន្តនីតិវិធីនៅថ្ងៃទី 29 ខែមីនានេះបន្តទៀត ៕
ចែករំលែកព័តមាននេះ