រាជធានីភ្នំពេញ ៖ ដឹងការពិតហើយ ករណីកម្លាំងគណៈបញ្ជាការឯកភាពខណ្ឌពោធិ៍សែនជ័យ បានចុះចាប់យកតុក្កតាដាក់លើរថយន្ត ដែលតុក្កតាទាំងនោះ ត្រូវបានស្ត្រីម្នាក់ដាក់តាំងលក់នៅមុខអកាសយានដ្ឋានអន្តរជាតិភ្នំពេញ ខណៈនៅថ្ងៃទី២៧ មីនា ២០២៤នេះ…
រាជធានីភ្នំពេញ ៖ ដឹងការពិតហើយ ករណីកម្លាំងគណៈបញ្ជាការឯកភាពខណ្ឌពោធិ៍សែនជ័យ បានចុះចាប់យកតុក្កតាដាក់លើរថយន្ត ដែលតុក្កតាទាំងនោះ ត្រូវបានស្ត្រីម្នាក់ដាក់តាំងលក់នៅមុខអកាសយានដ្ឋានអន្តរជាតិភ្នំពេញ ខណៈនៅថ្ងៃទី២៧ មីនា ២០២៤នេះ មានក្បួនថ្នាក់ដឹកនាំឆ្លងកាត់ ហើយសមត្ថកិច្ចបានប្រាប់ឲ្យផ្អាកលក់ជាបណ្ដោះអាសន្ន ប៉ុន្តែស្ត្រីអ្នកលក់ គាត់មិនព្រមស្ដាប់ ទើបចាប់យកទៅទុកនៅសាលាខណ្ឌ ពេលចប់ក្បួនថ្នាក់ដឹកនាំឆ្លងកាត់ ទើបប្រគល់ឲ្យគាត់វិញ ។
បើតាមវីដេអូឃ្លីប ដែលបង្ហោះចាកចាយនៅលើបណ្ដាញសង្គម បានបង្ហាញថា តុក្កតាជាច្រើនម៉ូដ មានតូចមានធំ ត្រូវបានកម្លាំងគណៈបញ្ជាការឯកភាពខណ្ឌពោធិ៍សែនជ័យ ចុះទៅចាប់ដកហូតយកពីស្ត្រីម្នាក់ កាលពីវេលាម៉ោងជាង៨ព្រឹក ថ្ងៃទី២៧ ខែមីនា ឆ្នាំ២០២៤ ខណៈដែលស្ត្រីរូបនោះ បានក្រាលកៅស៊ូតង់ ដាក់លក់លើសាបនៅមុខដីឡូត៌មួយកន្លែង ស្ថិតនៅត្រង់ចំណុចមុខអាកាសយានដ្ឋានអន្តរជាតិភ្នំពេញ ស្ថិតតាមបណ្ដោយមហាវិថីសហព័ន្ធរុស្ស៊ី ភូមិក្បាលដំរី១ សង្កាត់កាកាបទី២ ខណ្ឌពោធិ៍សែនជ័យ រាជធានីភ្នំពេញ ។
នៅក្នុងពេលសមត្ថកិច្ចខាងលើ ចាប់យកតុក្កតារបស់គាត់ ដាក់លើរថយន្ត ដឹកនាំយកទៅកាន់សាលាខណ្ឌពោធិ៍សែនជ័យ ស្ត្រីអ្នកលក់រូបនោះ បានទាញទូរសព្ទថតរូបភាពវីដេអូ ពីសកម្មភាពនោះ។ ត្រូវបានកម្លាំងសណ្ដាប់ធ្នាប់សាលាខណ្ឌពោធិ៍សែនជ័យ ប្រាប់មិនឲ្យគាត់ថតទេ ប៉ុន្តែគាត់នៅតែថត និងបាននិយាយថា ខ្ញុំថតរូបទុក ខ្លាចបាត់តុក្កតារបស់ខ្ញុំ ហើយបើបាត់តុក្កតារបស់ខ្ញុំ តើគិតយ៉ាងម៉េច ? ហើយសមត្ថកិច្ចថា ការដាក់លក់លើចញ្ចើមផ្លូវបែបនេះគឺខុស ។
ស្ត្រីអ្នកលក់ បាននិយាយបន្តទៀតថា ខ្ញុំអត់ខុសអីសោះ ហេតុអ្វី បានជាចាប់យកតុក្កតារបស់ខ្ញុំបែបនេះ ? ខ្ញុំអត់យល់ទេ ខ្ញុំលក់ ត្រូវច្បាប់សោះ ម៉េចបានមកចាប់របស់ខ្ញុំ ? ខ្ញុំទិញតុក្កតាអស់លុយច្រើន ខ្ញុំជំពាក់លុយគេ សូមបងប្អូនជួយគិតមើលផង ហើយខ្ញុំខុសច្បាប់ត្រង់ណា ? ខ្ញុំបានសុំ ដីគេដាក់លក់ ហើយខ្ញុំ អត់មានដាក់លក់លើចិញ្ចើមថ្នល់ផងហ្នឹង ?
ទាក់ទិននឹងរឿងរ៉ាវនោះ កម្លាំងសមត្ថកិច្ចខាងលើ បាននិយាយថា ស្ត្រីរូបនោះ បានក្រាលតង់កៅស៊ូ ដាក់លក់តុក្កតានៅលើចិញ្ចើមផ្លូវ គឺខុសហើយ ប៉ុន្តែដោយសារ សមត្ថកិច្ចគាត់មានការយោគយល់អធ្យាស្រ័យ ទើបគាត់លក់ម៉េច ក៏លក់ទៅរាល់ថ្ងៃ ប៉ុន្តែនៅថ្ងៃនេះ សមត្ថកិច្ច បានហាមឃាត់តាំងពីព្រឹក ដោយសារមានក្បួនថ្នាក់ដឹកនាំ ឆ្លងកាត់ ចូលទៅកាន់អាកាសយានដ្ឋានអន្តរជាតិភ្នំពេញ ។
ប្រភពដដែល បានឲ្យដឹងទៀតថា ហើយបានប្រាប់គាត់៤ ទៅ៥ដង ស្ត្រីអ្នកលក់គាត់មិនស្ដាប់ ព្រោះក្បួនថ្នាក់ដឹកនាំកំពុងតែរៀបចំឆ្លងកាត់ គេបិទផ្លូវគ្រប់កន្លែង គេដឹងទាំងអស់ហើយ ប្រាប់គាត់ហើយ គាត់មិនស្ដាប់ដដែល នៅតែដាក់លក់ទៀត។ ទើបកម្លាំងគណៈបញ្ជាការឯកភាពខណ្ឌពោធិ៍សែនជ័យ ចុះទៅចាប់ដកហូត នាំយកទៅរក្សាទុកនៅសាលាខណ្ឌពោធិ៍សែនជ័យ ហើយក្រោយពេលចប់ក្បួនថ្នាក់ដឹកនាំ ទើបប្រគល់តុក្កតាទាំងនោះឲ្យគាត់វិញ និងបានចប់សព្វគ្រប់អស់ហើយ នៅព្រឹកថ្ងៃដដែលនោះ អត់មានអីទៀតទេ ៕
ចែករំលែកព័តមាននេះ