រាជធានីភ្នំពេញ ៖ ទោះបីជាមានមានការអំពាវនាវពីសំណាក់របស់ទណ្ឌិត សម រង្ស៊ី ដែលកំពុងរស់នៅក្រៅប្រទេសឲ្យគណបក្សជំទាស់នៅកម្ពុជារួបរួមគ្នាយ៉ាងណាក្តី ក៏មិនអាចធ្វើអ្វីដល់គណបក្សប្រជាជនកម្ពុជាបានឡើយ ។ នេះបើតាមអ្នកនាំពាក្យគណបក្សប្រជាជនកម្ពុជា ។…
រាជធានីភ្នំពេញ ៖ ទោះបីជាមានមានការអំពាវនាវពីសំណាក់របស់ទណ្ឌិត សម រង្ស៊ី ដែលកំពុងរស់នៅក្រៅប្រទេសឲ្យគណបក្សជំទាស់នៅកម្ពុជារួបរួមគ្នាយ៉ាងណាក្តី ក៏មិនអាចធ្វើអ្វីដល់គណបក្សប្រជាជនកម្ពុជាបានឡើយ ។ នេះបើតាមអ្នកនាំពាក្យគណបក្សប្រជាជនកម្ពុជា ។
ការលើកឡើងនេះ បន្ទាប់ពីទណ្ឌិត សម រង្ស៊ី បានអំពាវនាវឲ្យគណបក្សជំទាស់នៅក្នុងប្រទេសមានគណបក្សភ្លើងទៀន គណបក្សឆន្ទៈខ្មែរ និងកម្លាំងជាតិរួបរួមគ្នា ដើម្បីឲ្យកម្លាំងប្រជាធិបតីមានការប្រមូលផ្តុំគ្នា ដើម្បីយកឈ្នះគណបក្សកាន់អំណាច ។
ឯកឧត្តម សុខ ឥសាន អ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី២៦ ខែមីនា ឆ្នាំ២០២៤ យ៉ាងដូច្នេះថា ៖ «តាមយោបល់ខ្ញុំការអំពាវនាវរបស់ទណ្ឌិត សម រង្ស៊ី នេះអត់មានប្រសិទ្ធភាពទេ ហើយអត់មាន គឺចេញជាលទ្ធផលជាក់ស្តែងនៅក្នុងការបោះឆ្នោត ជ្រើសតាំងសមាជិកព្រឹទ្ធសភាកន្លងមករួចហើយ ។ ការអំពាវនាវនេះអត់មានបានរួបរួមទេពីព្រោះសមាជិក ឬសកម្មរបស់ខ្លួនអត់ធ្វើតាម និងស្តាប់មេទេ» ។
ឯកឧត្តមអ្នកនាំពាក្យបានចំអកថា ការអំពាវនាវ បើមេគិតតែនៅក្រៅហើយសកម្មជនកំពុងនៅក្នុងស្រុកដូច្នេះហើយវាផ្ទុយបរិបទជាមួយគ្នារវាងប្រធាន និងសមាជិក ។ អីញ្ចឹងទេ រាល់ការអំពាវនាវរបស់មេហ្នឹងមិនអាចធ្វើឲ្យសមាជិក ឬសកម្មជនខ្លួនស្តាប់ និងអនុវត្តតាមនោះទេ ។
ទាក់ទង និងការអំពាវនាវរបស់ទណ្ឌិតសម រង្ស៊ីនេះដែរ នៅពេលកន្លងមកក្រសួងមហាផ្ទៃក៏បានចេញសេចក្តីព្រមានមួយដល់គណបក្សនយោបាយណាដែលមានការពាក់ព័ន្ធនឹងទណ្ឌិតសម រង្ស៊ីផងដែរនឹងរងទោសតាមច្បាប់កំណត់ ។ ត្រង់ចំណុចនេះ ឯកឧត្តមអ្នកនាំពាក្យគណបក្សកាន់អំណាចបានអះអាងថា ទោះបីជាទណ្ឌិតសម រង្ស៊ីយ៉ាងក្តីតែគណបក្សប្រជាជនកម្ពុជាមិនមែនយកតាមការអះអាងតាមសម្តីធ្វើជាគោលនោះទេ គឺយើងយកតាមអំពើប្រព្រឹត្តិដែលពាក់ព័ន្ធនឹងផ្លូវច្បាប់ ។ ហើយការព្រមានរបស់ក្រសួងមហាផ្ទៃ គឺអនុវត្តបានត្រឹមត្រូវខ្លឹមសារដែលមានចែងក្នុងច្បាប់ស្តីពីគណបក្សនយោបាយ ។
ឯកឧត្តមគូសបញ្ជាក់ថា៖«អីចឹងទេ ទោះបីទណ្ឌិតអំពាវនាវយ៉ាងណាក្តី ឬបែបណាក្តីក៏មិនអាចគេចរួចអំពីផ្លូវច្បាប់ដែរ បើសិនណាទង្វើ និងសកម្មភាពរបស់គាត់អនុវត្តន៍ផ្ទុយពីគោលការណ៍ច្បាប់» ។
អ្នកនាំពាក្យបានអះអាងថា ចំពោះការអំពាវនាវរបស់ទណ្ឌិត សម រង្ស៊ីឲ្យគណបក្សក្នុងស្រុករួបរួមបែបនេះ គឺជាដែនសមត្ថកិច្ចរបស់ក្រសួងមហាផ្ទៃដែលជាអ្នកគ្រប់គ្រងគណបក្សនយោបាយនានាដែលបានចុះបញ្ជីនៅក្រសួងមហាផ្ទៃ ។ បើសិនក្រសួងមហាផ្ទៃរកឃើញថា ទណ្ឌិត ឬគណបក្សណាពាក់ព័ន្ធនឹងទណ្ឌិតមានការពាក់ព័ន្ធជាមួយនោះ ក្រសួងមហាផ្ទៃមានសិទ្ធិស្នើទៅតុលាការកំពូលពិនិត្យករណីនេះដែរមានចែងក្នុងច្បាប់ ៕
ចែករំលែកព័តមាននេះ