ដូចការប្តេជ្ញារបស់លោកពូទីនដែលថា ឈាមសងដោយឈាម ភេរវករ៤នាក់ដែលបាញ់ប្រហារក្នុងព្រឹត្តការណ៍ប្រគុំតន្ត្រីនោះទទួលរងទណ្ឌកម្មយ៉ាងចាស់ដៃ ដើម្បីសួរចម្លើយរកឱ្យមេខ្លោងនៅពីក្រោយ ។ នៅថ្ងៃទី២៥ ខែមីនា ឆ្នាំ២០២៤ សារព័ត៌មានទូទាំងពិភពលោក ផ្តោតការចាប់អារម្មណ៍ទៅលើស្ថានភាព…
ដូចការប្តេជ្ញារបស់លោកពូទីនដែលថា ឈាមសងដោយឈាម ភេរវករ៤នាក់ដែលបាញ់ប្រហារក្នុងព្រឹត្តការណ៍ប្រគុំតន្ត្រីនោះទទួលរងទណ្ឌកម្មយ៉ាងចាស់ដៃ ដើម្បីសួរចម្លើយរកឱ្យមេខ្លោងនៅពីក្រោយ ។
នៅថ្ងៃទី២៥ ខែមីនា ឆ្នាំ២០២៤ សារព័ត៌មានទូទាំងពិភពលោក ផ្តោតការចាប់អារម្មណ៍ទៅលើស្ថានភាព ទ្រុឌទ្រោមមើលមិនយល់ក្នុងសភាពមនុស្សមិនចំជាមនុស្សនៃខ្មាន់កាំភ្លើងទាំង៤នាក់នៅពេលពួកគេត្រូវបានកងកម្លាំងរុស្ស៊ីក្រៀកនាំយកមកបង្ហាញខ្លួនក្នុងសវនាការ ។
បុរស៤នាក់ដែលត្រូវបានចោទប្រកាន់ពីបទរៀបចំការវាយប្រហារភេរវកម្មលើសាលប្រគុំតន្ត្រីត្រូវបានបង្ហាញខ្លួននៅចំពោះមុខតុលាការក្រុងម៉ូស្គូកាលពីថ្ងៃអាទិត្យចំពេលដែលប្រទេសរុស្ស៊ីបានប្រារព្ធទិវាជាតិនៃការកាន់ទុក្ខសម្រាប់ការវាយប្រហារកាលពីថ្ងៃសុក្រនៅលើកន្លែងប្រគុំតន្ត្រីនៅជាយក្រុង Crocus City Hall ដែលបានសម្លាប់មនុស្សយ៉ាងហោចណាស់១៣៧នាក់ និងរបួស១៨២នាក់ ។
ប្រព័ន្ធផ្សព្វផ្សាយរុស្ស៊ីបានរាយការណ៍ថា ពួកគេត្រូវបានគេធ្វើទារុណកម្មយដំយ៉ាងដំណំ អំឡុងពេលសួរចម្លើយដោយកងកម្លាំងរុស្ស៊ី ដោយមុខមាត់ដងខ្លួនពោរពេញទៅដោយស្នាកស្នាមនិងហើមជាំ ។ ប្រព័ន្ធផ្សព្វផ្សាយរុស្ស៊ីបាននិយាយកាលពីថ្ងៃសៅរ៍ថា ជនសង្ស័យម្នាក់ត្រូវបានគេកាត់ត្រចៀកក្នុងអំឡុងពេលសួរចម្លើយ ហើយនៅក្នុងសវនាការគេ ឃើញគាត់ រុំបង់ត្រង់ត្រចៀក ។ ជនសង្ស័យម្នាក់ទៀត ត្រូវបានគេនាំពីមន្ទីរពេទ្យមកកាន់តុលាការដោយជិះលើរទេះរុញ ហាក់បីដូចជាមនុស្សរុក្ខជាតិទៅហើយ ក្នុងអំឡុងពេលដែលសវនាការកំពុងប្រព្រឹត្តទៅ ហើយគាត់ត្រូវបានគេឃើញ មានស្នាមវះ ស្នាមចុះ ស្នាមកាត់លើដងខ្លួនជាច្រើនកន្លែង ។
សេចក្តីថ្លែងការណ៍របស់តុលាការបាននិយាយថា ជនសង្ស័យពីរនាក់ក្នុងចំណោមជនសង្ស័យបានសារភាពកំហុស បន្ទាប់ពីរងទណ្ឌកម្មសួរចម្លើយ ប៉ុន្តែបើតាមប្រព័ន្ធផ្សព្វផ្សាយរុស្ស៊ីមួយចំនួនទៀតបានអះអាងថាពួកគេទាំង៤នាក់បានសារភាពពីពិរុទ្ធភាព ។ តុលាការខណ្ឌ Basmanny នៃទីក្រុងមូស្គូ បានចោទប្រកាន់ជាផ្លូវការទៅលើភេរវករទាំង៤ រួមមាន Dalerdzhon Mirzoyev អាយុ ៣២ ឆ្នាំ; Saidakrami Rachabalizoda អាយុ ៣០ឆ្នាំ; Shamsidin Fariduni អាយុ២៥ឆ្នាំ និង Mukhammadsobir Faizov អាយុ១៩ឆ្នាំ ពីបទវាយប្រហារភេរវករជាក្រុមដែលបណ្តាលឱ្យស្លាប់អ្នកដទៃ ដោយបទល្មើសនេះត្រូវផ្តន្ទាទោសដាក់ពន្ធនាគារអស់មួយជីវិត ។
តុលាការរុស្ស៊ីបានបង្គាប់ឱ្យឃុំខ្លួនបុរសទាំង៤ នោះដែលសុទ្ធសឹងជាពលរដ្ឋនៃប្រទេសតាជីគីស្ថាន ហើយពួកគេត្រូវឃុំខ្លួនបណ្តោះអាសន្នរហូតដល់ថ្ងៃទី២២ ឧសភាខាងមុខ។ សារព័ត៌មានរដ្ឋរុស្ស៊ីបានឱ្យដឹងថា ព្រឹត្តិការណ៍សំខាន់ៗត្រូវបានលុបចោលកាលពីថ្ងៃអាទិត្យ ទង់ជាតិត្រូវបង្ហូតពាក់កណ្តាលដង ហើយការកម្សាន្តតាមទូរទស្សន៍ និងការផ្សាយពាណិជ្ជកម្មត្រូវបានផ្អាក។ ពលរដ្ឋរុស្ស៊ី នាំ គ្នាទៅដាក់កម្រងផ្កាដើម្បីគោរពវិញ្ញាណក្ខន្ធអ្នកស្លាប់ ។
ក្រុមអ្នកជួយសង្គ្រោះនៅតែបន្តស្វែងរករកឃើញសាកសពជនរងគ្រោះកាន់តែច្រើននៅកន្លែងកើតហេតុ ដែលធ្វើឱ្យចំនួនអ្នកស្លាប់បន្តកើនឡើង ខណៈដែលក្រុមគ្រួសារសាច់ញាត់នៃអ្នកបាត់ខ្លួនមួយចំនួនកំពុងរង់ចាំព័ត៌មាន។ នាយកដ្ឋានសុខាភិបាលរបស់ទីក្រុងម៉ូស្គូបាននិយាយកាលពីថ្ងៃអាទិត្យថា ខ្លួនបានចាប់ផ្តើមកំណត់អត្តសញ្ញាណសាកសពនៃអ្នកស្លាប់តាមរយៈការធ្វើតេស្ត DNA ដោយនិយាយថាដំណើរការនេះ នឹងចំណាយពេលយ៉ាងហោចណាស់ពីរសប្តាហ៍។
ការវាយប្រហារភេរវកម្មដែលត្រូវបានក្រុមរដ្ឋឥស្លាម ISIS ចេញមុខមកទទួលខុសត្រូវ គឺជាការវាយប្រហារដ៏សាហាវបំផុតនៅលើទឹកដីរុស្ស៊ីក្នុងរយៈពេលជាច្រើនឆ្នាំមកនេះ។ លោកពូទីនបានហៅការវាយប្រហារនេះថា ជា «អំពើភេរវករដ៏ឃោរឃៅ និងព្រៃផ្សៃ»។ លោក ពូទីន មិនបានលើកឡើងពីក្រុមអាយស៊ីសនៅក្នុងសុន្ទរកថារបស់គាត់ទៅកាន់ប្រជាជាតិនោះទេ ដែលធ្វើឱ្យអ៊ុយក្រែន លើកឡើងថា មេដឹកនាំរុស្ស៊ីបានភ្ជាប់អ៊ុយក្រែន ដើម្បីបានលេសឈ្លានពាន ។ ការវាយប្រហារនេះ ត្រូវបានមន្ត្រីចារកម្មអាមេរិកអះអាងថា ក្រុមISISគឺជាទទួលខុសត្រូវទាំងស្រុង។
អ្នកនាំពាក្យក្រុមប្រឹក្សាសន្តិសុខជាតិ អាមេរិកបាននិយាយនៅក្នុងសេចក្តីថ្លែងការណ៍មួយថា មិនមានការពាក់ព័ន្ធរបស់អ៊ុយក្រែនណាមួយនោះទេ។ ហើយថា សហរដ្ឋអាមេរិកបានចែករំលែកព័ត៌មានជាមួយរុស្ស៊ីកាលពីដើមខែមីនា អំពីគម្រោងវាយប្រហារភេរវកម្មនៅទីក្រុងមូស្គូ ហើយបានចេញការព្រមានជាសាធារណៈដល់ប្រជាជនអាមេរិកនៅក្នុងប្រទេសរុស្ស៊ីឱ្យប្រយ័ត្ន ។
ការវាយឆ្មក់នេះ គឺជាការអាម៉ាស់ដ៏ធំមួយសម្រាប់លោក ពូទីន ដែលវាកើតឡើងតែប៉ុន្មានថ្ងៃបន្ទាប់ពីលោកទើបតែជោគជ័យក្នុងការបោះឆ្នោត ដើម្បីបន្តកាន់កាប់ប្រទេសរុស្ស៊ីសម្រាប់រយៈពេល៦ឆ្នាំទៀត។ ក្រុមISISបានចេញសេចក្តីថ្លែងការណ៍ថ្មីមួយកាលពីថ្ងៃសៅរ៍នៅ ដោយនិយាយថា ការវាយប្រហារនេះត្រូវបានធ្វើឡើងដោយបុរសបួននាក់ដែលប្រើកាំភ្លើងស្វ័យប្រវត្តិ កាំភ្លើងខ្លី កាំបិត និងគ្រាប់បែក។ កាលពីខែតុលាឆ្នាំ២០១៥ គ្រាប់បែកដែលដាក់ដោយក្រុមISISបានទម្លាក់យន្តហោះដឹកអ្នកដំណើររុស្ស៊ីនៅលើកោះ Sinai ដោយបានសម្លាប់មនុស្សទាំងអស់នៅលើយន្តហោះចំនួន ២២៤នាក់៕ ដោយ៖អោម ចែតច័ន្ទណារ៉ា
ចែករំលែកព័តមាននេះ