ទីក្រុងប៉ារីស៖ នៅពេលរុស្ស៊ីកំពុងសង្គ្រឺតធ្មេញដាក់អ៊ុយក្រែនជាប់ក្រោយហេតុការណ៍បាញ់ប្រហារនៅកន្លែងប្រគំតន្ត្រីកាលពីយប់ថ្ងៃសុក្រដែលសម្លាប់មនុស្ស១៣៧នាក់ និងរបួសជាង១០០នាក់ លោកម៉ាក្រុង ប្រធានាធិបតីបារាំង ចេញមកបញ្ជាក់ឡើងវិញថារុស្ស៊ីមិនត្រូវខឹងគោវាយរទេះ ឬស្វាស៊ីបាយលាបមាត់ពពែទេ នាំឱ្យអ្នកមិនដឹងអីក្លាយជាជនរងគ្រោះ។
យោងតាមលោកម៉ាក្រុង, លទ្ធផលស្រាវជ្រាវបង្ហាញថាកំហុសគ្រប់យ៉ាងមកតែពីក្រុមអាយស៊ីសទាំងអស់។ ពួកគេជាអ្នកបញ្ជា្ឱ្យបាញ់ប្រហារ។ ដូច្នេះ កុំទៅរករឿងអ៊ុយក្រែន។ គ្នាមិនដឹងអីទេ។ លោកយល់ថាបើរុស្ស៊ីនៅតែចង់រករឿងអ៊ុយក្រែនទៀត មានន័យថាពួកគេប្រកាន់ចរិតមានះ និងបំផ្លាញខ្លួនឯង។ ការថ្លែងដូច្នេះបន្ទាប់ពីរុស្ស៊ីនៅតែមិនព្រមទទួលយកការបកស្រាយរបស់ប្រទេសខ្លះដូចជាអាមេរិកដែលថាក្រុមអាយស៊ីសជាអ្នករៀបចំគម្រោងវាយប្រហារ។
អាមេរិកធ្លាប់ប្រាប់ការណ៍សម្ងាត់ទៅរុស្ស៊ីតាំងពីដើមខែមីនា។ ប៉ុន្តែរុស្ស៊ីយល់ថាអាមេរិកចង់កាន់ជើងអ៊ុយក្រែន និងបិទបាំងទង្វើរបស់អ៊ុយក្រែនបានជានិយាយបែបនេះ។ លោកម៉ាក្រុងថ្លែងថាក្រុមអាយស៊ីសខ្លួនឯងជាអ្នកប្រកាសថានេះជាស្នាដៃរបស់ខ្លួន។ ម៉្យាងទៀត នៅពេលយើងផ្ទៀងផ្ទាត់ព័ត៌មានសម្ងាត់ឃើញថាពិតជាស្នាដៃរបស់ពួកគេមែន។ បើបកស្រាយប៉ុណ្ណឹងហើយនៅតែរុស្ស៊ីស្ដាប់មិនបាន ហើយនៅតែចង់ជះកំហឹងដាក់អ៊ុយក្រែនទៀត មានន័យថារុស្ស៊ីមានចិត្តមានះ។
លោកពូទីនមិនដែលទទួលស្គាល់ថាជនសង្ស័យដែលចាប់បានជាបក្សពួករបស់ក្រុមអាយស៊ីស ឬមានទំនាក់ទំនងជាមួយអាយស៊ីសទេ។ ប៉ុន្តែលោកនិយាយថាពួកនេះប្រុងរត់គេចខ្លួនទៅអ៊ុយក្រែន ខណៈដែលពួកអ៊ុយក្រែនរង់ចាំទទួលពួកគេ។ ប៉ុន្តែសំណាងល្អ សមត្ថកិច្ចរុស្ស៊ីស្ទាក់ចាប់បានតាមផ្លូវ។ អ៊ុយក្រែនធ្លាប់បដិសេធរួចហើយថាខ្លួនគ្មានជាប់ពាក់ព័ន្ធនឹងរឿងនេះទេ។ លោកហ្សេឡិនស្គីយល់ថាលោកពូទីនកំពុងយកបញ្ហានេះធ្វើជាលេសដើម្បីវាយប្រហារអ៊ុយក្រែនកាន់តែខ្លាំង។
អ្នកនាំពាក្យក្រសួងការបរទេសរុស្ស៊ីបានដាក់ជាការសង្ស័យថាតើអាចជឿបានដែរឬទេដែលអាមេរិកបកស្រាយថាក្រុមអាយស៊ីសជាអ្នកវាយប្រហារ។ លោកម៉ាក្រុងថ្លែងថាបក្សពួករបស់អាយស៊ីសនៅអាហ្វហ្កានីស្ថានដែលមានឈ្មោះថាអាយស៊ីសខេ (ISIS-K) ធ្លាប់មានគម្រោងវាយប្រហារប្រទេសបារាំង។ ក្រុមនេះមានផែនការវាយប្រហារកាលពីប៉ុន្មានខែមុននៅលើទឹកដីរបស់យើង។ រដ្ឋាភិបាលបារាំងបង្កើនការប្រុងប្រយ័ត្នដល់កម្រិតខ្ពស់បំផុតបន្ទាប់ពីដឹងថាពួកគេវាយប្រហារទីក្រុងម៉ូស្គូ។
លោកម៉ាក្រុងថ្លែងថាយើងបានបោះដៃទៅរុស្ស៊ី និងប្រទេសជាដៃគូនៅក្នុងតំបន់ដើម្បីបង្កើនកិច្ចសហការគ្នាខាងផ្នែកស៊ើបការណ៍សម្ងាត់។ ធ្វើបែបនេះទើបងាយស្រួលចាប់ជនដៃដល់បានឆាប់រហ័ស។ ហេតុដូច្នេះហើយបានជាយើងអាចប្រយុទ្ធប្រឆាំងនឹងក្រុមភេរវកម្មនេះយ៉ាងមានប្រសិទ្ធភាព ខណៈដែលពួកគេបន្តរៀបគម្រោងវាយប្រហារប្រទេសមួយចំនួនទៀត។
គួរកត់សម្គាល់ថាប្រសាសន៍របស់លោកម៉ាក្រុងធ្វើឡើងនៅក្នុងស្ថានភាពដែលរុស្ស៊ីកំពុងជាប់ដៃនៅក្នុងសង្គ្រាមអ៊ុយក្រែន។ ពួកបស្ចិមប្រទេសកំពុងជួយអ៊ុយក្រែនដើម្បីទប់ទល់នឹងរុស្ស៊ី។ ពេលខ្លះ លោកម៉ាក្រុងបង្ហើបពីគម្រោងបញ្ជូនទ័ពទៅអ៊ុយក្រែនថែមទៀត។ ដូច្នេះ រុស្ស៊ីពិបាកនឹងប្រកាសគាំទ្រជាផ្លូវការនូវព័ត៌មានដែលផ្ដល់ដោយក្រុមបស្ចិមប្រទេស។ យ៉ាងហោចណាស់ រុស្ស៊ីមានកូនចិត្តមួយគិតថាហេតុអ្វីពួកគេធ្វើល្អដាក់រុស្ស៊ីបើភាគីទាំងពីកំពុងតែមើលមុខគ្នាមិនសូវចំបែបនេះ?
ប្រភព៖ Reuters
https://www.reuters.com/world/europe/macron-it-would-be-cynical-counterproductive-russia-pin-moscow-attack-ukraine-2024-03-25/
ចែករំលែកព័តមាននេះ