ទីក្រុងរ៉ង់ហ្គូន៖ របបសឹកភូមាក្រោមការដឹកនាំរបស់លោកមីនអុងឡាំងបង្ហើបឱ្យដឹងពីគម្រោងរៀបចំការបោះឆ្នោតជ្រើសរើសអ្នកតំណាងរាស្ត្រនាពេលខាងមុខ។ សំខាន់ឱ្យតែប្រទេសជាតិមានសន្តិភាព និងស្ថិរភាពជាមុនសិន។ ម៉្យាងទៀត ការបោះឆ្នោតលើកនេះប្រហែលជាមិនអាចរៀបចំឡើងឱ្យបានទូលំទូលាយទូទាំងប្រទេសបានទេ។ ខាងលើនេះជាប្រសាសន៍របស់នាយឧត្ដមសេនីយ៍មីនអុងឡាំង។ នៅពេលនេះ របបសឹកត្រូវរ៉ាប់រងវាយប្រយុទ្ធទល់នឹងពួកបះបោរពីគ្រប់មុខព្រួញ។
របបសឹកដែលបន្តកាន់អំណាចជាងបីឆ្នាំមកហើយចាប់តាំងពីខែកុម្ភៈឆ្នាំ២០២១នៅតែចិញ្ចឹមចិត្តថានឹងរៀបចំការបោះឆ្នោតតាមគន្លងប្រជាធិបតេយ្យដើម្បីកាន់អំណាចឱ្យបានពេញមុខពេញមាត់ និងទទួលស្គាល់ពីសហគមន៍អន្តរជាតិ។ ជាពិសេសទទួលស្គាល់ពីសំណាក់ក្រុមប្រទេសសេរីនិយម និងប្រជាធិបតេយ្យនិយម។
ឧត្ដមសេនីយ៍មីនអុងឡាំងទំនងជាទទួលស្គាល់ថារបបដឹកនាំរបស់លោកមិនប្រជាធិបតេយ្យទេព្រោះនៅក្នុងអ្វីដែលលោកថ្លែងប្រាប់ទីភ្នាក់ងារព័ត៌មានរុស្ស៊ីតាស់ (TASS) លោកថ្លែងថាលោកមានផែនការនាំប្រទេសជាតិវិលទៅរកគន្លងប្រជាធិបតេយ្យឡើងវិញ។ នេះបើយោងតាមសេចក្ដីប្រែសម្រួលបទសម្ភាសដែលផ្សព្វផ្សាយដោយសារព័ត៌មាននៅប្រទេសភូមា។
សព្វថ្ងៃនេះ ថ្នាក់ដឹកនាំកំពូលៗនៃរបបសឹកមីនអុងឡាំងប្រឈមនឹងបញ្ហាក្ដៅគគុកមិនធ្លាប់មានចាប់តាំងប្រទេសនេះទទួលបានឯករាជ្យពីអាណានិគមអង់គ្លេសកាលពីឆ្នាំ១៩៦២។ ក្រោយរដ្ឋប្រហារឆ្នាំ២០២១ ក្រុមប្រឆាំងហែបាតុកម្មតវ៉ា។ ប៉ុន្តែនៅពេលតវ៉ាយូរៗទៅត្រូវក្រុមយោធាបង្ក្រាបខ្លាំងពេក ពួកគេងាកទៅប្រឆាំងលោកមីនអុងឡាំងដោយកម្លាំងប្រដាប់អាវុធវិញម្ដង។ ពួកគេរួមកម្លាំងគ្នាជាមួយពួកបះបោរ និងពួកឧទ្ទាមដែលតស៊ូរាប់ទសវត្សមកហើយដូចជាចលនាអារ៉ាខាន់, ពួកកុលសម្ព័ន្ធការ៉េន និងពួកបំបែកទឹកដីនៅរដ្ឋសាន (Shan)។ ពួកគេឱ្យឈ្មោះថាសម្ព័ន្ធភាតរភាពត្រីភាគី (Three Brotherhood)។
គេគិតថាលោកមីនអុងឡាំងមិនអាចនៅសុខៗបញ្ចេញសារនយោបាយបែបនេះចេញមកទេ។ លោកប្រាកដជាទទួលរងសម្ពាធនយោបាយ សេដ្ឋកិច្ច និងយោធាជាមិនខាន។ នៅក្នុងបទសម្ភាសនោះ លោកមីនអុងឡាំងថ្លែងថាបើប្រទេសជាតិមានសន្តិភាព និងស្ថិរភាព, យើង (របបសឹក) មានគម្រោងរៀបចំការបោះឆ្នោតនៅក្នុងតំបន់ដែលយើងគិតថាអាចធ្វើទៅបាន។ លោកថ្លែងថាបើមិនអាចរៀបចំការបោះឆ្នោតឱ្យបានទូទាំងប្រទេសទេ យើងអាចរៀបចំបានប៉ុណ្ណាយកប៉ុណ្ណឹង។
របបសឹករបស់លោកបានបន្តដាក់ប្រទេសជាតិនៅក្នុងគ្រាអាសន្នជាច្រើនដងហើយ ដោយអនុវត្តរៀងរាល់៦ខែម្ដង។ លោកថ្លែងថាត្រូវតែអនុវត្តវិធីនេះ (ដាក់ក្នុងគ្រាអាសន្ន) ដោយខានពុំបានដើម្បីស្ដារស្ថិរភាពជាតិ និងវាយកម្ទេចពួកប្រឆាំងដែលលោកចាត់ទុកជាពួកភេរវកម្ម។ របបសឹកបានដាក់ពង្រាយកាំភ្លើងធំ និងយន្តហោះចម្បាំងដើម្បីបង្ក្រាបពួកទាហានប្រឆាំងដែលចងសម្ព័ន្ធភាពជាមួយរដ្ឋាភិបាលស្រមោលរបស់អ្នកគាំទ្រលោកស្រីស៊ូជី និងជាមួយពួកបះបោរជនជាតិភាគតិច។
យោងតាមរបាយការណ៍របស់អង្គការសហប្រជាជាតិ, ការប្រយុទ្ធគ្នាចាប់តាំងពីក្រោយរដ្ឋប្រហារឆ្នាំ២០២១ធ្វើឱ្យជនស៊ីវិលជាង២លាន ៣សែននាក់រត់ចោលផ្ទះសម្បែងដើម្បីគេចចេញពីសង្គ្រាម។ ក្រុមអ្នករិះគន់ និងក្រុមបស្ចិមប្រទេសយល់ថាគម្រោងរៀបចំការបោះឆ្នោតនេះធ្វើឡើងឱ្យល្អមើលប៉ុណ្ណោះព្រោះបក្សនយោបាយជាង៤០ត្រូវបានរំលាយចោល ឬហាមធ្វើនយោបាយ។ ដូច្នេះ គ្មានគណបក្សនយោបាយពិតប្រាកដប្រកួតប្រជែងជាមួយរបបសឹករបស់លោកមីនអុងឡាំងទេ៕
ប្រភព៖ Reuters
https://www.reuters.com/world/asia-pacific/myanmars-next-election-may-not-be-nationwide-junta-chief-says-2024-03-25/
ចែករំលែកព័តមាននេះ