ថ្មីៗនេះ សត្វក្របីឃ្លៀចរបស់ថៃតម្លៃកន្លះលានដុល្លារផ្ទុះការចាប់អារម្មណ៍ខ្លាំង។ ល្បីខ្លាំងមែនទែនសូម្បីតែនាយករដ្ឋមន្ត្រីថៃ លោកសេដ្ឋាថាក់វិស៊ីន ក៏បានអញ្ជើញទៅមើលក្របីនេះដោយផ្ទាល់ផងដែរ។ នៅប្រទេសថៃ ត្រឹមតែក្របីខ្មៅធម្មតាក៏មានតម្លៃបាត់ទៅហើយនៅក្នុងចំណោមប្រជាកសិករថៃដែលភ្ជួរស្រែនឹងក្របីមួយក្បាល។ បើជាក្របីឃ្លៀចមានមាឌធំថែមទៀតរឹតតែល្បី។
ទីក្រុងបាងកក៖ ថ្មីៗនេះ នាយករដ្ឋមន្ត្រីថៃ លោកសេដ្ឋា ថាក់វិស៊ីន ស្វាគមន៍សត្វក្របីឃ្លៀចឈ្មោះកូមឿងពេជ្រដែលគេដឹកទៅដល់បរិវេណវិមានរដ្ឋាភិបាលនៅទីក្រុងបាងកក។ ក្របីមួយក្បាលនេះផ្ទុះការចាប់អារម្មណ៍ខ្លាំងនៅក្នុងចំណោមកសិករថៃ និងមជ្ឈដ្ឋានអ្នកនិយមចូលចិត្តជួញ-ដូរក្របីថ្លៃៗសម្រាប់បង្កាត់ពូជ។ ក្របីនេះត្រូវសារព័ត៌មានផ្សព្វផ្សាយព្រោងព្រាតកាលពីសប្ដាហ៍មុន ហើយត្រូវរាជរដ្ឋាភិបាលអនុញ្ញាតឱ្យដឹកចូលទៅក្នុងបរិវេណវិមានរដ្ឋាភិបាលដើម្បីបង្ហាញខ្លួននៅចំពោះមុខនាយករដ្ឋមន្ត្រីដោយផ្ទាល់។
កូមឿងពេជ្រជាក្របីរាងខ្ពស់ស្រឡះកម្ពស់១៨០សង់ទីម៉ែត្រ មានស្រុកកំណើតនៅខេត្តពេជ្របុរី មានទម្ងន់១,៤តោន មានន័យថាជាក្របីឃ្លៀចយក្សដែលធំលើសក្របីឃ្លៀចទូទៅរហូតដល់បីដង។ កូមឿងពេជ្រមានលក្ខណៈពិសេសជាច្រើន។ វាធ្លាប់ត្រូវគេយកទៅថតខ្សែភាពយន្តដែលចាក់ផ្សាយតាមទូរទស្សន៍។ លោកសេដ្ឋា ថាក់វិស៊ីនក៏មិនណយប៉ុន្មានដែរអាចស៊ីសងគ្នាជាមួយក្របីឃ្លៀចនេះ ព្រោះលោកមានកម្ពស់១៩២សង់ទីម៉ែត្រ។ លោកបានយកច្រមុះទៅញល់នឹងច្រមុះកូមឿងពេជ្រនៅមុខវិមានរដ្ឋាភិបាល។
លោកសេដ្ឋាប្រាប់អ្នកសារព័ត៌មានថា លោកមិនដែលនឹកស្មានថាប្រទេសថៃមានក្របីដ៏ស្រស់ឆើតឆាយដល់ថ្នាក់នេះ។ លោកនិយាយបណ្ដើរយកដៃចាប់កាន់ស្នែងរបស់ក្របីឃ្លៀចនេះបណ្ដើរ។ លោកដាក់ជាសំណួរថាតើមានក្របីណាដែលល្អដូចក្របីនេះទៀត? នៅប្រទេសថៃ ត្រឹមតែក្របីឃ្លៀចធម្មតាក៏ផ្ទុះការចាប់អារម្មណ៍បាត់ទៅហើយព្រោះវាជាប្រភេទសត្វកម្រ។ យូរៗទើបមានក្របីឃ្លៀចមួយ។ ក្រៅពីនេះសុទ្ធតែក្របីខ្មៅស្ទើរតែទាំងអស់។
រឹតតែពិសេសទៅទៀតនោះ ក្របីនេះមិនត្រឹមតែឃ្លៀចទេ ប៉ុន្តែមានមាឌធំដំបង។ ដូច្នេះ គេអាចចាត់ទុកជាក្របីឃ្លៀចយក្ស។ នៅប្រទេសថៃដោយសារជាប្រទេសកសិកម្ម ដូច្នេះ ក្របីដែលមានមាឌធំដំបងបែបនេះត្រូវគេឱ្យតម្លៃខ្លាំង។ កាលពីឆ្នាំ២០២៣ កសិករម្នាក់រស់នៅខេត្តពិសានុលោក (Phitsanulok) លក់ក្របីសំណព្វចិត្តរបស់គាត់មួយក្បាលទម្ងន់១,៤តោនបានជាង១លាន ៤សែនដុល្លារ (១,៤៥លាន)។
លោកសេដ្ឋាបង្ហោះនៅលើទ្វីតថឺថា «សមាគមអ្នកចិញ្ចឹមក្របីថៃ» បានស្នើសុំឱ្យរាជរដ្ឋាភិបាលជួយផ្សព្វផ្សាយលើកកម្ពស់ (promote) សត្វក្របីផងដោយចាត់ទុកជាផ្នែកមួយនៃការលើកកម្ពស់អំណាចទន់ (soft power) តាមកម្មវិធីនយោបាយរបស់រាជរដ្ឋាភិបាល។ គ្រាន់តែទទួលដំណឹងនេះភ្លាម ម្ចាស់ក្របីឃ្លៀចប្រកាសគាំទ្រយ៉ាងពេញទំហឹង។
លោកសេដ្ឋាថ្លែងថាគាត់ចង់ឱ្យមនុស្សទូទៅស្គាល់ក្របីកាន់តែច្រើនថែមទៀត។ ប្រជារាស្ត្រថៃធ្លាប់មានជីវិតផ្សារភ្ជាប់នឹងកសិកម្ម និងសត្វក្របី។ ប៉ុន្តែបែបផែនរស់នៅនាពេលបច្ចុប្បន្នធ្វើឱ្យយើងឃ្លាតឆ្ងាយពីសត្វក្របី។ លោកសន្យាថានៅអំឡុងបុណ្យចូលឆ្នាំថ្មី ឬសង្ក្រាន្តឆ្នាំថ្មី អាជ្ញាធរនឹងនាំយកសត្វក្របីឃ្លៀចយក្សនេះទៅតំបន់ពេញនិយមរបស់អ្នកទេសចរជាតិ និងអន្តរជាតិដើម្បីឱ្យពួកគេបានទស្សនា៕
ប្រភព៖ Channel News Asia
https://www.channelnewsasia.com/asia/thai-pm-meets-us500000-buffalo-albino-soft-power-4208106
អត្ថបទដទៃទៀតដែលពាក់ព័ន្ធនឹងប្រធានបទនេះ
ញា.ក់សា.ច់នឹងក្របីឃ្លៀច១ក្បាលរបស់ថៃលក់បានកន្លះលានដុល្លារ
ចែករំលែកព័តមាននេះ