ទីក្រុងបាងកក៖ ក្របីឃ្លៀចមួយក្បាលរបស់ប្រទេសថៃបានបំបែកកំណត់ត្រាពិភពលោកនៅពេលមានគេហ៊ានដេញថ្លៃខ្ពស់កប់ពពកដើម្បីព្យាយាមទិញក្របីនេះឱ្យបាន។ ក្របីឈ្មោះកូមឿងពេជ្រ (Ko Muang Phet) មានម្ចាស់ឈ្មោះដាំរ៉ុងស័ក្ដិ មរកត (Damrongsak Morakot) រស់នៅខេត្តពេជ្របុរី (Phetchburi) បានបង្កការភ្ញាក់ផ្អើល និងផ្ទុះការចាប់អារម្មណ៍យ៉ាងខ្លាំងនៅពេលមានអ្នកហ៊ានទិញយកក្របីនៅក្នុងតម្លៃ១៨លានបាត ឬកន្លះលានដុល្លារ។ ស្ដាប់មួយភ្លែតគ្មាននរណាជឿទេ។
ក្របីនេះមានកេរ្តិ៍ឈ្មោះល្បីដោយសារវាមានរូបរាងឡូយអស្ចារ្យ និងមានមាឌធំដំបង។ ក្របីប្រភេទនេះមានលក្ខណៈពិសេសមួយគឺគេយកមេជីវិតរបស់វាទៅបង្កាត់ពូជ។ ដូច្នេះ គេមិនមែនទិញវាយកទៅព្យួរស្រែទេ។ កាលណាបង្កាត់ពូជជាមួយក្របីនេះ សឹងតែថា៩០%នឹងបង្កាត់បានកូនក្របីឃ្លៀច។ មានន័យថានៅក្នុងចំណោមកូនក្របី១០ក្បាលមាន៩ក្បាលដែលអាចនឹងជាក្របីឃ្លៀច។ ដូច្នេះ ក្របីនេះក្លាយជារបស់ដ៏មានតម្លៃសម្រាប់វិស័យបង្កាត់ពូជសត្វក្របីនៅប្រទេសថៃ។
ក្រៅពីមានកេរ្តិ៍ឈ្មោះល្បី ក្របីឈ្មោះកូមឿងពេជ្រក៏ផ្ទុះការចាប់អារម្មណ៍ខ្លាំងនៅក្នុងចំណោមវិស័យកម្សាន្តផងដែរ។ គេយកវាទៅថតកុនសម្ដែងជាតួអង្គក្របីអៃក្លាវ (Ai Khlaow) នៅក្នុងខ្សែភាពយន្តរឿងម៉ុនរ៉ាក់លូកថាង (Mon Rak Luk Thung)។ ស្ថិតនៅក្នុងវ័យ៥ឆ្នាំ កម្ពស់១៨០សង់ទីម៉ែត្រ កូមឿងពេជ្រត្រូវគេប្រសិទ្ធនាមថាជាក្របីយក្សរបស់ថៃដែលជល់មិនដែលចាញ់គេប៉ុន្មានឆ្នាំចុងក្រោយនេះ។ ប៉ុន្តែឥឡូវនេះ គេលែងយកវាទៅជល់ជាមួយក្របីផ្សេងទៀតហើយ។ គេទុកតែសម្រាប់បង្កាត់ពូជតែមួយមុខគត់។
ថ្មីៗនេះ កសិដ្ឋានបង្កាត់ពូជក្របីឈ្មោះវណ្ណៈសុវណ្ណ (Wanasuwan Farm) នៅខេត្តឆៀងរ៉ាយបានធ្វើឱ្យផ្ទុះការចាប់អារម្មណ៍ខ្លាំងមួយរំពេចនៅពេលកសិដ្ឋាននេះហ៊ានដេញថ្លៃយកក្របីឈ្មោះកូមឿងពេជ្រក្នុងតម្លៃ១៨លានបាត។ នេះជាតម្លៃដ៏ខ្ពស់មិនធ្លាប់មាននៅប្រទេសថៃ។ ពិធីដេញថ្លៃនោះរៀបចំឡើងនៅក្នុងមហោស្រពក្របីថៃលើកទី១២នៅខេត្តឧទ័យធានី (Uthai Thani)។
លោកដាំរ៉ុងស័ក្ដិថ្លែងថាដោយសារតែគាត់ចង់ស្រាវជ្រាវអំពីសក្ដានុពលនៃក្របីរបស់ថៃ ដូចនេះធ្វើឱ្យគាត់ភប់ប្រសព្វនឹងក្របីកូមឿងពេជ្រនេះតែម្ដងទៅ។ គំនិតចាប់ផ្ដើមដំបូងរបស់គាត់គឺទិញយកមកចិញ្ចឹមនូវក្របីធម្មតាសិន។ ក្រោយមកទៀត គាត់ក៏ចាប់ផ្ដើមសាងសង់កសិដ្ឋានបង្កាត់ក្របីដែលមានម៉ាកយីហោមរកតហ្វាម (Morakot Farm) ចំនួន៨កន្លែងនៅស្រុកថាយ៉ាង (Tha Yang) ខេត្តពេជ្របុរី។ ចាប់ពីពេលនោះមក គាត់អាចរកប្រាក់ចំណូលបាន៨លានបាតក្នុងមួយឆ្នាំៗ។
ក្របីឈ្មោះកូមឿងពេជ្រដែលគាត់ចិញ្ចឹមបីបាច់ដោយយកចិត្តទុកដាក់ប្រៀបបាននឹងកូនបង្កើតរបស់គាត់នៅទីបំផុតបានក្លាយជាកំណប់ទ្រព្យដ៏មានតម្លៃប្រចាំកសិដ្ឋានរបស់គាត់។ លោកដាំរ៉ុងស័ក្ដិអាចនឹងលក់ក្របីសំណព្វចិត្តរបស់គាត់ទាំងក្ដីអាឡោះអាល័យ។ ម៉្លោះហើយគាត់សង្ឃឹមថាអ្នកដែលទិញក្របីពីគាត់ទៅនឹងខិតខំលើកស្ទួយការបង្កាត់ពូជក្របីឃ្លៀចនៅប្រទេសថៃឱ្យកាន់តែរីកចម្រើន។ គាត់ស្រមៃថាទៅថ្ងៃមុខប្រទេសថៃអាចនឹងបំផុសឱ្យពិភពលោកស្គាល់ពីក្របីឃ្លៀចរបស់ខ្លួន៕
ប្រភព៖ The Nation Thailand
https://www.nationthailand.com/blogs/thailand/general/40036357
អត្ថបទដទៃទៀតដែលពាក់ព័ន្ធនឹងប្រធានបទនេះ
កសិករថៃប្រកាសលក់ក្របីសំណព្វចិត្តរបស់គាត់តម្លៃជាង១លានដុល្លារ
ចែករំលែកព័តមាននេះ