បុរសខ្មែរមួយរូបមានស្រុកកំណើតនៅខេត្តបាត់ដំបង ដែលមានមាឌមាំពោរពេញដោយ ថាមពល បានធ្វើជាអតីតកងការពារប្រធានាធិបតីអាមេរិករហូតដល់ទៅ៤ជំនាន់ ។
បុរសម្នាក់នេះ ត្រូវបានគេដឹងថា គឺលោក អូន ប៊ុនឡឺត ដែលជាអតីតកុមារកម្ពុជា ដែលកើតនៅក្នុងត្រកូលជាមន្ត្រីយោធា ហើយឪពុកត្រូវបានសម្លា.ប់ដោយខ្មែរក្រហម និងមានឱកាសអាចធ្វើដំណើរមករស់នៅសហរដ្ឋអាមេរិកដំបូង នៅក្នុងឆ្នាំ១៩៨៣ ដោយបាតដៃទទេរ ហើយសូម្បីតែភាសាអង់គ្លេសក៏លោកមិនចេះផងដែរ ។ បុរសអាមេរិកកាំងដើមកំណើតខ្មែររូបនេះ ត្រូវបានគេដឹងថា បានបម្រើជាកងការពារប្រធានាធិបតីអាមេរិកចំនួន៤ សម័យកាល រហូតដល់លោកចូលនិវត្តន៍ កាលពីចុងឆ្នាំ២០២៣ កន្លងទៅ ដោយបម្រើការងារបែបនេះអស់រយៈពេលជាង២០ឆ្នាំ ។
លោកធ្លាប់បានអះអាងប្រាប់អ្នកសារព័ត៌មាននៅក្រៅប្រទេសថា លោកបានចូលរួមចំណែក ការពារប្រធានាធិបតីអាមេរិក៤រូប ដែលរួមមាន លោក ចច ដាប់បែលយូ ប៊ូស, លោក បារ៉ាក់ អូបាម៉ា, លោក ដូណាល់ ត្រាំ និងចុងក្រោយដែលលោកចូលនិវត្តន៍ គឺលោក ចូ បៃដិន ។
លោក អូន ប៊ុនឡឺត ក៏ធ្លាប់បានអះអាងផងដែរថា លោកមានបំណងចង់យកបទពិសោធន៍ និងចំណេះដឹងដែលលោកទទួលបានពីការងាររបស់លោក ដើម្បីមកជួយស្រុកកំណើតដោយធ្លាប់បានបម្រើកិច្ចការសង្គមដែលធ្វើការជាមួយនឹងក្រុមក្មេងជនជាតិមកពីអាស៊ី និងនៅក្រសួងយុត្តិធម៌អាមេរិក ហើយក៏ធ្លាប់ស្ម័គ្រចិត្តធ្វើទាហាន ប៉ុន្តែមិនជាប់បែរជាជាប់មកធ្វើជាកងការពារលោកប្រធានាធិបតីសហរដ្ឋអាមេរិក ។
ពាក់ព័ន្ធនឹងគោលបំណងនេះ កាលពីពេលថ្មីៗកន្លងទៅ លោក អួន ប៊ុនឡឺត ក៏បានធ្វើដំណើរ មកកាន់ប្រទេសកម្ពុជា ហើយលោកក៏បានយកថវិកាមួយចំនួនដែលលោកសន្សំ និងប្រមូល បានពីការលក់សៀវភៅដែលលោកសរសេរអំពីជីវិតរបស់លោកមកជួយកុមារងាយរងគ្រោះ នៅកម្ពុជា ។ សៀវភៅដែលលោកបានចងក្រងនេះ លោកសរសេរជាភាសាអង់គ្លេសដែលមានចំណងជើងថា «A REFUGEE’S AMERICAN DREAM: From the Killing Fields of Cambodia to the U.S. Secret Service» ហើយបច្ចុប្បន្ន គឺកំពុងតែរកអ្នកបកប្រែជាភាសាខ្មែរ និងភាសាជប៉ុន ពីព្រោះទីនោះក៏មានបងប្អូនខ្មែរច្រើនរស់នៅដែរ ។
លោកបានប្រាប់សារព័ត៌មានកន្លងមកថា ពាក់ព័ន្ធនឹងដំណើរជីវិតរបស់លោកនេះ គឺមានក្រុម ហ៊ុនផលិតភាពយន្តអាមេរិក ដូចជា Netflix ជាដើមចាប់អារម្មណ៍ចង់យកផលិតជាខ្សែរភាពយន្ត ។ នៅក្នុងដំណើររបស់លោកមកកាន់កម្ពុជានោះ កាលពីខែកុម្ភៈ ឆ្នាំ២០២៤ កន្លងទៅថ្មីៗលោកក៏មានឱកាសចូលជួប លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ។
ក្នុងជំនួបសម្ដែងការគួរសមនេះ អតីតកងការពារប្រធានាធិបតីអាមេរិករូបនេះក៏បានជម្រាបជូនលោក ឧបនាយករដ្ឋមន្ត្រីនូវគោលបំណង និងឆន្ទៈក្នុងការវិលត្រឡប់មកប្រទេសកម្ពុជាវិញមកទាំងចំណេះដឹង និងបទពិសោធន៍ដែលលោកមានយកមកជួយប្រទេសកម្ពុជាតាមដែលអាចធ្វើទៅបាន ។ ជីវិតការងាររបស់លោកបានបង្ហាញថា ជនជាតិខ្មែរ គឺមិនអន់ទេ។ ពេលខ្លះ វាគ្រាន់តែជាបញ្ហាឱកាសតែប៉ុណ្ណោះ ៕ ដោយៈ ហេង ចេស្តារ
ចែករំលែកព័តមាននេះ