រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានគូសបញ្ជាក់ថា រាជរដ្ឋាភិបាលបានយកចិត្តទុកដាក់ ក្នុងការធ្វើហេដ្ឋរចតនាសម្ព័ន្ធ ជូនប្រជាពលរដ្ឋ ដែលបច្ចុប្បន្ននេះ ផ្លូវជនបទ បានកំពុងជួយសម្រួលដល់ពលរដ្ឋក្នុងការដឹកទំនិញ ទៅកាន់ទីផ្សារបានស្រួល ខណៈផ្លូវជនបទមានជាង៥ម៉ឺនគីឡូម៉ែត្រ ។
ថ្លែងក្នុងពិធីបិទសន្និបាតរបស់ក្រសួងអភិវឌ្ឍន៍ជនបទ នៅរសៀលថ្ងៃទី២០ ខែមីនា ឆ្នាំ២០២៤ សម្តេចធិបតី នាយករដ្ឋមន្ត្រី បានលើកឡើងថា ផ្លូវជនបទកម្ពុជា មានជាង៥ម៉ឺនគីឡូម៉ែត្រ ស្មើ៧៤% នៃផ្លូវសរុប នៅទូទាំងប្រទេស ដែលជាពិតណាស់ វាមិនទាន់ក្លាយជាផ្លូវ ដែលគ្របដោយបេតុង ឬកៅស៊ូ វាមានផ្លូវជាច្រើនជាផ្លូវលំ ដីក្រហម នៅឡើយ ។
សម្តេចធិបតី បានគូសបញ្ជាក់ថា ៖ «ផ្លូវជនបទ ដែលតភ្ជាប់ជាង៥ម៉ឺនគីឡូម៉ែត្រនេះ បានធ្វើឲ្យប្រជាពលរដ្ឋ ធ្វើសកម្មភាពសេដ្ឋកិច្ច រួចហើយ។ ប្រជាពលរដ្ឋ អាចដឹកកសិផលរកទីផ្សារ ធ្វើដំណើរឆ្លងកាត់ទទួលបានសេវាសុខាភិបាល រៀនសូត្រ ភ្ជាប់ពីតំបន់ដាច់ស្រយាលទៅ ទីក្រុង។ អ៊ីចឹងការធ្វើជាង ៥ម៉ឺនគីឡូនេះ មិនតិចទេ! អាហ្នឹង បើជុំវិញផែនដីចង់មួយជុំហើយ» ។
ជាមួយគ្នានោះដែរ សម្តេចធិបតី នាយករដ្ឋមន្ត្រី បានលើកឡើងថា ជាការពិតណាស់ ផ្លូវត្រូវបានធ្វើជាកង់ៗ ក្នុងការដោះស្រាយជូនប្រជាពលរដ្ឋ ហើយនៅពេលខាងមុខទៀត ពោលគឺនៅពេលមានលទ្ធភាពជាក់ស្តែង នឹងធ្វើជាបន្តបន្ទាប់ទៀត ។
សម្តេចបានបញ្ជាក់ថា ៖ «នៅពេលយើងមានលទ្ធភាពយើងប្រែក្លាយធ្វើផ្លូវជាពីដីក្រហម ទៅជាផ្លូវកៅស៊ូ ឬផ្លូវបេតុង ហើយកន្លែងខ្លះពលរដ្ឋគាត់អត់សុំផ្លូវកៅស៊ូទេ គាត់សុំផ្លូវបេតុងតែម្តង ព្រោះវាមានភាពធន់បានយូរ» ។
សម្តេចធិបតី បានអះអាងថា ទាំងសមិទ្ធិផល ដែលមានកន្លងមក និងសមិទ្ធិផលរ បស់ពេល៦ខែមកនេះ រាជរដ្ឋាភិបាល នឹងខិតខំធ្វើបន្ថែមទៀត។ ព្រោះថា តម្រូវការមានច្រើន ជាពិសេសនោះ នៅតំបន់ថ្មីៗ ដែលទើបនឹងបើកឲ្យដំណើរការ។ ជាក់ស្តែងនោះ តំបន់ដែលធ្លាប់ជាកន្លែងសមរភូមិ ហើយបានដោះមីនរួច យើងត្រូវធ្វើហេដ្ឋារចនាសម្ព័ន្ធឲ្យស្អាត ។
សម្តេចបន្ថែមថា ធ្វើការអភិវឌ្ឍន៍នោះ ត្រូវតែផ្តោតលើបញ្ហាទឹកស្អាត និងអនាម័យ។ កិច្ចការងារនេះ ធ្វើបានច្រើននាពេលកន្លងមក គ្រាន់តែរបាយការណ៍របស់រដ្ឋមន្ត្រី ក្រសួងអភិវឌ្ឍន៍ជនបទ មានអណ្តូងស្នប់មានជាង ៦៣ម៉ឺនអណ្តូងស្នប់ ស្រះទឹកសហគមន៍ មានជាង១ម៉ឺនកន្លែង ស្ថានីយ៍ផលិតទឹកសម្រាប់សហគមន៍មានចំនួន១៤០កន្លែង ប្រព័ន្ធចែកចាយទឹកស្អាត អាងទឹកភ្លៀង និងកន្លែងផ្សេងៗទៀតសម្រាប់ជួយ ប្រជាពលរដ្ឋមានទឹកស្អាត ប្រើប្រាស់ផងដែរ ៕
ចែករំលែកព័តមាននេះ