ខេត្តកំពត ៖ បើតាមលោកឧត្តមសេនីយ៍ត្រី លក ញ៉ាវ ស្នងការរងទទួលផែនព្រហ្មទណ្ឌបានឱ្យដឹងថា ក្រោយពីមានព័ត៌មានករណីចោរលួចកាត់ខ្សែភ្លើងជាច្រើនកន្លែងតាមបង្គោលត្រង់ស្វ័រ ស្ថិតក្នុងភូមិសាស្ត្រខេត្តកំពត នាពេលកន្លងមក ក៏បានដាក់បញ្ជាឱ្យកងកម្លាំងនគរបាលក្រុងកំពត,…
ខេត្តកំពត ៖ បើតាមលោកឧត្តមសេនីយ៍ត្រី លក ញ៉ាវ ស្នងការរងទទួលផែនព្រហ្មទណ្ឌបានឱ្យដឹងថា ក្រោយពីមានព័ត៌មានករណីចោរលួចកាត់ខ្សែភ្លើងជាច្រើនកន្លែងតាមបង្គោលត្រង់ស្វ័រ ស្ថិតក្នុងភូមិសាស្ត្រខេត្តកំពត នាពេលកន្លងមក ក៏បានដាក់បញ្ជាឱ្យកងកម្លាំងនគរបាលក្រុងកំពត, ក្រុងបូកគោ និងស្រុកទឹកឈូ ចេញល្បាតជាប្រចាំតាមគោលដៅ ដែលមានត្រង់ស្វ័រ ក្នុងស្រុកក្រុងទាំង៣ខាងលើ ។
លុះនៅថ្ងៃទី១៦ ខែមីនា ឆ្នាំ២០២៤ កម្លាំងអធិការនគរបាលក្រុងកំពតក៏ប្រទះឃើញជនសង្ស័យម្នាក់កំពុងរៀបចំកាត់ខ្សែភ្លើងនៅត្រង់ហ្វរមួយកន្លែងមែន ស្ថិតត្រង់ចំណុចសាលាអនុវិទ្យាល័យឌីបុក មហាសាមគ្គីក្នុងភូមិកំពង់បាយខាងត្បូង សង្កាត់កំពុងបាយ ក្រុងកំពត ក៏បានឃាត់ខ្លួនជនសង្ស័យ រួមនិងវត្ថុតាងសម្រាប់ធ្វើសកម្មភាពកាត់ខ្សែភ្លើង ដើម្បីយកមកសាកសួរនៅអធិការដ្ឋាននគរបាលក្រុងកំពត ។
ប្រភពព័ត៌មានពីការិយាល័យព្រហ្មទណ្ឌខេត្តបានឱ្យដឹងទៀតថា ក្រោយសមត្ថកិច្ចសាកសួរជនសង្ស័យបានសារភាពប្រាប់សមត្ថកិច្ចថា កន្លងមក រូបគេបានធ្វើសកម្មភាពលួចកាត់ខ្សែភ្លើងនៅតាមត្រង់ហ្វ័រនៅទីក្រុងភ្នំពេញជាច្រើនកន្លែងស្ទើរតែរាប់ភ្លេចទៅហើយ តែដោយសារបច្ចុប្បន្ននៅក្រុងភ្នំពេញកម្លាំងនគរបាលរាជធានីច្រើនពេក ខ្លួនពិបាកលួចកាត់ខ្សែភ្លើងក៏ចេញមកលួចកាត់តាមខេត្តទៅ ដូចជាខេត្តតាកែវ ខេត្តព្រះសីហនុ និងក្រោយមកទើបចូលទៅលួចកាត់ខ្សែភ្លើងតាមត្រង់ស្វ័រ ក្នុងស្រុកទឹកឈូ និងក្រុងកំពត នាពេលថ្មីៗនេះសរុបចំនួន១១លើករួចមកហើយ ។
ពេលនោះ សមត្ថកិច្ចក៏បាននាំជនសង្ស័យទៅចង្អុលនៅចំណុចបង្គោលត្រង់ស្វ័រដែលខ្លួនគេបានធ្វើសកម្មភាពកាត់ខ្សែភ្លើងទាំង១១ករណី នៅក្នុងស្រុកទឹកឈូនិងក្រុងកំពតផងដែរ ។ ក្រោយមក ជនសង្ស័យបានសារភាពប្រាប់សមត្ថកិច្ចទៀតថា នៅពេលខ្លួនកំពុងរៀបចំបម្រុងកាត់ខ្សែភ្លើងជិតសាលាអនុវិទ្យាល័យមួយក្នុងក្រុងកំពត ក៏ត្រូវកម្លាំងសមត្ថកិច្ចក្រុងកំពតចាប់ឃាត់ខ្លួនបានតែម្ដង ។
ប្រភពពីការិយាល័យព្រហ្មទណ្ឌនៃស្នងការនគរបាលខេត្តឱ្យដឹងទៀតថា ជនសង្ស័យដែលមានជំនាញលួចកាត់ខ្សែភ្លើងយ៉ាងសកម្មនៅក្រុងភ្នំពេញនិងខេត្តកំពតនេះ មានឈ្មោះ ម៉ៅ ព្រឹក ភេទប្រុស អាយុ២៨ឆ្នាំ នៅភូមិជម្ពូវ័ន្តសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ។
ចំពោះវត្ថុតាងដែលសមត្ថកិច្ចរឹបអូសមានម៉ូតូម៉ាកនិច, ពណ៌.សមួយគ្រឿង, កន្ត្រៃកាត់ដែកមួយ, កាំបិតផ្លែឡាមមួយ ក្រោយពីសាកសួរសមត្ថកិច្ចបានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធី ។
ចែករំលែកព័តមាននេះ