រាជធានីភ្នំពេញ ៖ អនុវត្តតាមបទដ្ឋានគោលនយោបាយ ភូមិ-ឃុំ-សង្កាត់មានសុវត្ថិភាព កាលពីថ្ងៃទី១៧ខែមីនា ឆ្នាំ២០២៤ សមត្ថកិច្ចក្រសួងមហាផ្ទៃចេញប្រតិបត្តិការបង្ក្រាបបទល្មើសទូទៅបាន៣៥ករណី ដោយឃាត់ខ្លួនអ្នកពាក់ព័ន្ធ ចំនួន៧៥នាក់ ចាត់នីតិវិធីតាមច្បាប់បន្ត ។ នេះបើតាមអ្នកនាំពាក្យរងក្រសួងមហាផ្ទៃ ។
លោក ទូច សុឃៈ អ្នកនាំពាក្យរងក្រសួងមហាផ្ទៃបញ្ជាក់តាមបញ្តាញសង្គមតេឡេក្រាម នៅថ្ងៃទី១៨ ខែមីនា ឆ្នាំ២០២៤ ថា សមត្ថកិច្ចបានចេញប្រតិបត្តិការបង្ក្រាបបទល្មើសទូទៅបាន៣៥ករណី ដោយឃាត់ខ្លួនអ្នកពាក់ព័ន្ធចំនួន៧៥នាក់ចាត់នីតិវិធីតាមច្បាប់បន្ត ។ ករណីព្រហ្មទណ្ឌបង្ក្រាបបានចំនួន១០ករណី ឃាត់ខ្លួនបាន១៣នាក់ ។
ករណីព្រហ្មទណ្ឌ រួមមានលួច ឆបោក និងអំពើហិង្សាជាដើម ។ ជាការកត់សម្គាល់ ជាកម្រិតបទល្មើសមជ្ឈឹមពុំមានបទល្មើសថ្នាក់ឧក្រិដ្ឋទេ ។ ចំណែកឯករណីគ្រឿងញៀនវិញ អ្នកនាំពាក្យរងបន្តថា ក្នុងយុទ្ធនាការបោសសម្អាតគ្រឿងញៀន សមត្ថកិច្ចបង្ក្រាបបាន១៥ករណី ឃាត់ខ្លួនបាន៣៣នាក់ និងរឹបអូសសារធាតុសង្ស័យគ្រឿងញៀនចំនួន២០០,០៨ក្រាម ។
អ្នកនាំពាក្យបានបន្តថា ទន្ទឹមនេះ បង្ក្រាបក្មេងទំនើងបាន៣ករណីឃាត់ខ្លួន៦នាក់ ដោយចាត់វិធានការរដ្ឋបាល ពោលគឺអប់រំណែនាំធ្វើកិច្ចសន្យាបញ្ឈប់សកម្ម ។ នៅថ្ងៃដដែលនេះដែរ នគរបាលជាតិ ក៏បានបង្ក្រាបល្បែងស៊ីសងខុសច្បាប់ចំនួន៤ករណី ឃាត់ខ្លួន១៨នាក់ ប៉ុន្តែមិនកសាងសំណុំរឿងទៅតុលាការទេ ត្រឹមចាត់វិធានការរដ្ឋបាល ពោលគឺអប់រំណែនាំនិងធ្វើកិច្ចសន្យាបញ្ឈប់សកម្មប្រព្រឹត្តិ ។
ការបង្ក្រាបបទល្មើសទូទៅ គឺជាទិសដៅអាទិភាពក្នុងចំណោមទិសដៅអាទិភាពទាំង៦ ដែល លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានដាក់ចេញកាលពីដើមអាណត្តិទី
៧នេះ តាមគោលការណ៍ «សម្អាតផ្ទះយើង» របស់សម្ដេចធិបតីនាយករដ្ឋមន្ត្រី និងទស្សនៈរបស់លោកឧបនាយករដ្ឋមន្ត្រី «អ្វីៗធ្វើដើម្បីផ្ដល់ភាពកក់ក្ដៅជូនប្រជាពលរដ្ឋ» ៕
ចែករំលែកព័តមាននេះ