រាជធានីភ្នំពេញ ៖ ម៉ូតូសណ្ដោងរ៉ឺម៉ក ដឹកអីវ៉ាន់រោងចក្រ ១គ្រឿង បើកលឿនជ្រុលទៅបុកពីក្រោយរថយន្តស្តារិច ១គ្រឿង ពេញទំហឹង បណ្ដាលឲ្យធ្លាក់ផ្លូវក្រឡាប់ស្ទើរធ្លាក់ចូលប្រឡាយ រងរបួសធ្ងន់១នាក់ ស្រាល១នាក់។ បន្ទាប់មក ក៏ស្រាប់តែមានម៉ូតូសណ្ដោង រ៉ឺម៉ក ដឹកអីវ៉ាន់រោងចក្រ ជាមួយគ្នា ១គ្រឿងទៀត បើកបរក្នុងល្បឿនលឿនដូចគ្នា ទៅដល់បុកពីក្រោយរថយន្តដដែលនោះ ១តង់ទៀត បណ្ដាលឲ្យរងរបួសធ្ងន់ ១នាក់ និងស្រាល ២នាក់បន្ថែមទៀត ហើយរថយន្ត រងការខូចខាតធ្ងន់ធ្ងរ ។
ឧប្បត្តិហេតុនេះបានកើតឡើងកាលពីវេលាម៉ោង១១និង២០នាទីព្រឹកថ្ងៃទី១៥ ខែមីនា ឆ្នាំ២០២៤ នៅតាមផ្លូវក្រវ៉ាត់ក្រុងទី៣ ស្ថិតនៅក្នុងភូមិគោកខ្សាច់ សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
ម៉ូតូសណ្ដោងរ៉ឺម៉កទាំង២គ្រឿងនោះ ម៉ាកហុងដាវ៉េវ ដែលក្នុងនោះ ១គ្រឿង ពណ៍ស បើកដោយបុរសម្នាក់ឈ្មោះ ជឹម រ៉ា អាយុ២៨ឆ្នាំ មុខរបរកម្មករ ដឹកអ៊ីវ៉ាន់រោងចក្រ រងរបួសធ្ងន់ ហើយរួមដំណើរជាមួយប្អូនប្រុសជីដូនមួយម្នាក់ទៀត រងរបួសស្រាល ។
ចំណែកឯ ១គ្រឿងទៀត ពណ៍ក្រហម បើកដោយយុវជនម្នាក់ឈ្មោះ ជឹម សាន់ឌី អាយុ១៨ឆ្នាំ មុខរបរកម្មកររោងចក្រ របួសជើងស្រាល រួមដំណើរជាមួយប្អូនប្រុសបង្កើត ឈ្មោះ ជឹម ដាវ អាយុ១៦ឆ្នាំ មុខរបរកម្មកររោងចក្រ រងរបួសធ្ងន់ បាក់ជើងឆ្វេង និងរបួសទ្រូង រីឯប្អូនប្រុសជីដូនមួយម្នាក់ទៀត របួសស្រាល ។
ជនរងគ្រោះ ទាំង៥នាក់បងប្អូន គឺជាកម្មករដឹកជញ្ជូន អ៊ីវ៉ាន់រោងចក្រ ស្នាក់នៅភូមិកន្ទោកជើង សង្កាត់កន្ទោក ខណ្ឌកំបូល និងមានស្រុកកំណើតនៅស្រុកកំពង់លែង ខេត្តកំពង់ឆ្នាំង ។
ដោយឡែក រថយន្តម៉ាកស្តារិច ពណ៌ទឹកប្រាក់ ពាក់ស្លាកលេខ ភ្នំពេញ 2BU-7015 បើកដោយបុរសម្នាក់ឈ្មោះ ផាន់ ឈាង អាយុ៣៣ឆ្នាំ មានទីលំនៅភូមិប្រកា សង្កាត់ព្រៃស ខណ្ឌដង្កោ ។
តាមប្រភពព័ត៌មាន បានឲ្យដឹងថា នៅមុនពេលកើតហេតុ រថយន្តម៉ាកស្តារិច បានបើកបរធ្វើដំណើរក្នុងទិសដៅ ពីត្បូងទៅជើង លុះពេលទៅដល់ត្រង់ចំណុចកើតហេតុ មានម៉ូតូ ១គ្គ្រឿង បើកបរក្នុងទិសដៅបញ្ច្រាស់ទិសដៅចរាចរណ៍ ឆ្លងផ្លូវកាត់មុខ ខណៈនោះ រថយន្តក៏បានបន្ថយល្បឿន ព្រោះខ្លាចបុកម៉ូតូនោះ ហើយក៏ត្រូវម៉ូតូវ៉េវ ពណ៍ស សណ្ដោងរ៉ឺម៉កបើកបរស្របគ្នា ក្នុងល្បឿនលឿន ទៅដល់បុកពីក្រោយពេញទំហឹងតែម្តង ។
ប្រភពដដែល បានប្រាប់ឲ្យដឹងទៀតថា ពេលនោះ បណ្ដាលឲ្យរថយន្តក្រពឹតខាងក្រោយយ៉ាងដំណំ ហើយម៉ូតូសណ្ដោងរ៉ឺម៉កនោះ រេចង្កូតធ្លាក់ផ្លូវបត់.ក វិះនឹងធ្លាក់ចូលប្រឡាយទើបនឹងជីកថ្មីថែមទៀត រងរបួសធ្ងន់ ១នាក់ និងស្រាល១នាក់។ ស្របពេលនោះ ម៉ូតូហុងដាវ៉េវ ពណ៍ក្រហមបើកបរស្របគ្នា ក្នុងល្បឿនលឿនដែរ ជ្រុលទៅបុកពីក្រោយរថយន្តចំកន្លែងក្រពឹតដដែលនោះ ១តង់ទៀត បណ្ដាលរងរបួសធ្ងន់១នាក់ និងស្រាល២នាក់ ហើយរថយន្ត ក្រពឹតកាន់តែខ្លាំង ។
ក្រោយពេលកើតហេតុ រថយន្តសង្គ្រោះរបស់អង្គភាព៧១១ បានដឹកបញ្ជូនអ្នករងរបួសធ្ងន់ ទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ។
បន្ទាប់មកកម្លាំងនគរបាល ចុះទៅដល់ទីកន្លែងកើតហេតុនោះ និងឲ្យភាគីទាំងអស់សម្របសម្រួលគ្នា ហើយថៅកែរោងចក្រជនជាតិចិន បានចេញសំណងថ្លៃជួសជុលរថយន្ត ស្តារិច ដើម្បីបញ្ចប់រឿង ៕
ចែករំលែកព័តមាននេះ