ព្រៃវែង ៖ រថយន្តកែច្នៃមួយគ្រឿង ដែលដឹកជញ្ជូនធ្យូងប្រមាណជាង ៥តោន ត្រូវបានកម្លាំងកងរាជអាវុធហត្ថលើផ្ទៃប្រទេសចាប់ឃាត់ ដោយសង្ស័យថា ក្រុមឈ្មួញមានបំណងនាំចេញទៅប្រទេសវៀតណាម ។
ការចាប់ឃាត់នេះបានធ្វើឡើង នៅចន្លោះម៉ោង២ទៅម៉ោង ៣ទាបភ្លឺ ឈានចូលព្រឹកថ្ងៃទី១៤ មីនា នៅលើផ្លូវជាតិលេខ៣១០ ក្នុងឃុំអ្នកលឿង ស្រុកពាមរក ខេត្តព្រៃវែង ។
ក្រោយពីចាប់ឃាត់រថយន្តដឹកធ្យូងខាងលើនេះបានហើយ កម្លាំងកងរាជ អាវុធហត្ថលើផ្ទៃប្រទេស បានប្រគល់រថយន្តនោះទៅឲ្យមន្ត្រីជំនាញ សង្កាត់រដ្ឋបាលព្រៃឈើអ្នកលឿង ចាត់ការបន្តទៅតាមនិតិវិធី នៅព្រឹកថ្ងៃដដែលនោះ ។
មន្ត្រីជំនាញសង្កាត់រដ្ឋបាលព្រៃឈើអ្នកលឿងបានឲ្យដឹងថា រថយន្តដឹកធ្យូងមួយគ្រឿងនេះ ក្រុមឈ្មួញបានប្រើប្រាស់ដឹកធ្យូងចេញពីខេត្តត្បូងឃ្មុំ យកទៅលក់ក្នុងប្រទេសវៀតណាម តាមច្រកទ្វាព្រំដែនអន្តរជាតិក្អមសំណរ ក្នុងស្រុកលើកដែក ខេត្តកណ្ដាល ជាច្រើនដងមកហើយ ។
ជាក់ស្តែង នៅយប់ថ្ងៃទី១៣ មិនានេះ ក្រុមឈ្មួញបានផ្លាស់ប្តូរផ្លូវ ដោយធ្វើសកម្មភាពដឹកធ្យូងបម្រុងនាំចេញទៅប្រទេសវៀតណាម តាមច្រកទ្វាព្រំដែនអន្តរជាតិកោះរការវិញ តែត្រូវបានកម្លាំងកងរាជអាវុធហត្ថលើផ្ទៃប្រទេសដឹង ហើយក៏ដេញតាមតាំងពីខេត្តត្បូងឃ្មុំ រហូតមកដល់ឃុំអ្នកលឿង ស្រុកពាមរក៍ ខេត្តព្រៃវែង ទើបធ្វើការចាប់ឃាត់បាន ហើយក៏ប្រគល់វត្ថុតាងមកឲ្យមន្ត្រីជំនាញរដ្ឋបាលព្រៃឈើចាត់ការបន្តតែម្ដង ។
មន្ត្រីជំនាញសង្កាត់រដ្ឋបាលព្រៃឈើអ្នកលឿង បានបញ្ជាក់ថា ធ្យូងទាំងអស់ត្រូវរឹបអូសទុកជាសម្បត្តិរដ្ឋ ដោយឡែករថយន្តកែច្នៃ មន្ត្រីជំនាញកំពុងទាក់ទងហៅម្ចាស់រថយន្តចូលខ្លួនមកទទួលការពិន័យអន្តរកាល ទៅតាមច្បាប់ស្ដីពីព្រៃឈើ ៕
ចែករំលែកព័តមាននេះ