រាជធានីភ្នំពេញ ៖ យុវជន២នាក់ បានជិះម៉ូតូ១គ្រឿង ឌុបគ្នា បើកបរក្នុងល្បឿនលឿន លុះពេលទៅដល់ត្រង់ចំណុចផ្លូវកែង បានចាប់ហ្វ្រាំងបន្ថយល្បឿន ដើម្បីបត់ស្ដាំ បណ្ដាលឲ្យផ្លាតចង្កូត រអិលដួលបោកផ្ទប់ថ្នល់ រងរបួសធ្ងន់ម្នាក់បាក់ភ្លៅ និងម្នាក់ទៀតរងរបួសស្រាល ។
ឧប្បត្តិហេតុគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង៤រសៀលថ្ងៃទី១៣ ខែមីនា ឆ្នាំ២០២៤ នៅតាមផ្លូវបេតុង ភូមិខ្វែ សង្កាត់ត្រពាំងក្រសាំង ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាន បានឲ្យដឹងថា យុវជនដែលរងរបួសធ្ងន់បាក់ភ្លៅនោះឈ្មោះ ប្រាក់ រ៉ូហ៊ីត អាយុ១៩ឆ្នាំ ជានិស្សិតឆ្នាំទី១ ចំណែកអ្នករងរបួសស្រាលឈ្មោះ ផុន ធារី អាយុ២០ឆ្នាំ ជានិស្សិតឆ្នាំ១ ដូចគ្នា។ អ្នកទាំង២ស្នាក់នៅផ្ទះជួល ភូមិត្រពាំងទួល សង្កាត់កំបូល ខណ្ឌកំបូល និងមានស្រុកកំណើត ភូមិទួលសាំង(ក) ឃុំអង្គរបុរី ស្រុកអង្គបុរី ខេត្តតាកែវ ។
ប្រភពដដែលបានប្រាប់ឲ្យដឹងថា នៅមុនពេលកើតហេតុ អ្នកទាំង២នាក់ ជិះម៉ូតូម៉ាកស៊ុយហ្ស៊ុយគីនិច ពណ៌ស ពាក់ស្លាកលេខ ភ្នំពេញ 1HW-5831 ១គ្រឿង បើកដោយយុវជនឈ្មោះប្រាក់ រ៉ូហ៊ីត ដោយធ្វើដំណើរ ក្នុងទិសដៅពីត្បូង ទៅជើង ក្នុងល្បឿនលឿន លុះពេលទៅដល់ត្រង់ចំណុចផ្លូវកែង ត្រូវបត់ផ្លូវស្ដាំ ឆ្ពោះទៅទិសខាងកើត ក៏បានចាប់ហ្វ្រាំងបន្ថយល្បឿនដើម្បីបត់ ស្រាប់តែរអិលផ្លាតដួលខ្លួនឯង បោកផ្ទប់ថ្នល់ និងត្រូវម៉ូតូសង្កត់ពីលើ រងរបួសធ្ងន់ម្នាក់ និងស្រាលម្នាក់ តែម្ដង ។
ប្រភពខាងលើបានប្រាប់បន្ថែមទៀតថា ខណៈនោះ ម៉ូតូបានរងការខូចខាត ប៉ុន្តែនៅអាចជិះបាន ហើយបានយកទៅផ្ញើរទុកនៅផ្ទះអ្នកូមិ ដែលស្ថិតនៅក្បែរកន្លែងកើតហេតុនោះ។ ហើយក្រោយពេលកើតហេតុ ក្រុមសង្គ្រោះរបស់អង្គភាព ៧១១ បានដឹកយកយុវជនរងគ្រោះទាំង២នាក់ បញ្ជូនទៅកាន់មន្ទីរពេទ្យព្រះកុសុមៈ ដើម្បីសង្គ្រោះបន្ទាន់ ៕
ចែករំលែកព័តមាននេះ