រាជធានីភ្នំពេញ ៖ សមាគមឧកញ៉ាកម្ពុជា កំពុងសិក្សាលទ្ធភាពក្នុងការចាត់វិធានការផ្លូវច្បាប់ លើបុគ្គលមួយចំនួន ដែលយកងារជា ឧកញ៉ា ទៅប្រព្រឹត្តខុសច្បាប់ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមវន្តជាឧកញ៉ាដទៃទៀត ។…
រាជធានីភ្នំពេញ ៖ សមាគមឧកញ៉ាកម្ពុជា កំពុងសិក្សាលទ្ធភាពក្នុងការចាត់វិធានការផ្លូវច្បាប់ លើបុគ្គលមួយចំនួន ដែលយកងារជា ឧកញ៉ា ទៅប្រព្រឹត្តខុសច្បាប់ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់គោរមវន្តជាឧកញ៉ាដទៃទៀត ។
បើតាមសេចក្តីប្រកាសព័ត៌មានរបស់សមាគមឧកញ៉ាកម្ពុជា ចុះថ្ងៃទី១៣ ខែមីនា ឆ្នាំ២០២៤ បានលើកឡើងថា សមាគមឧកញ៉ាកម្ពុជា បានសង្កេត និងតាមដានយ៉ាងយកចិត្តទុកដាក់ ចំពោះការផ្សព្វផ្សាយព័ត៌មានរបស់បុគ្គល ឬអង្គភាពព័ត៌មានមួយចំនួន នៅតាមបណ្តាញទំនាក់ទំនងសង្គម ដូចជា ហ្វេសប៊ុក និងតិកគុកជាដើម ពាក់ព័ន្ធនឹងរឿងរ៉ាវរបស់គោរមវន្ត ដែលមានងារជា ឧកញ៉ា។ ក្រោយពីបានពិនិត្យ ទៅលើបរិបទ និងខ្លឹមសារទាំងនោះ សមាគមឧកញ៉ាកម្ពុជា បានកត់សម្គាល់ ឃើញថា ការផ្សព្វផ្សាយទាំងនោះ ហាក់មានភាពទូលំទូលាយពេក ដោយមិនផ្ដោតចំពោះគោរមវន្តរូបណាមួយ ដែលនាំឱ្យមានការវាយប្រហារ ឬយល់ច្រឡំខុស និងធ្វើឱ្យប៉ះពាល់ដល់សេចក្ដីថ្លៃថ្នូរ ព្រមទាំងកិត្តិយសគោរមវន្តផ្សេងទៀត ដែលមិនបានជាប់ពាក់ព័ន្ធ នៅក្នុងរឿងរ៉ាវទាំងនោះ ទាល់តែសោះ។ ដូច្នេះ សមាគមឧកញ៉ាកម្ពុជា សូមស្នើដល់បុគ្គល ឬអង្គភាពព័ត៌មានធ្វើការផ្សព្វផ្សាយ ដោយចំពោះបុគ្គល ដែលប្រព្រឹត្តខុស និងពុំគួរភ្ជាប់សាច់រឿងអាស្រូវទាំងនោះ ជាមួយនឹងគោរមងារ ឧកញ៉ា ទូទៅឡើយ ពីព្រោះ មានឧកញ៉ា ច្រើនលើសលុប គឺជាអ្នក ដែលបានខិតខំថែរក្សាការពារសេចក្តីថ្លៃថ្នូររបស់គោរមវន្ត ចូលរួមជួយដល់កិច្ចការមនុស្សធម៌ និងរួមចំណែកលើកកម្ពស់ពាណិជ្ជកម្ម វិនិយោគ ក៏ដូចជាការអភិវឌ្ឍសេដ្ឋកិច្ចជាតិ រួមជាមួយរាជរដ្ឋាភិបាលកម្ពុជា យ៉ាងសស្រាក់ សស្រាំ តាំងតែពីដើមរៀងមក ។
សមាគមឧកញ៉ាកម្ពុជា គឺជាស្ថាប័ន តែមួយគត់ ដែលតំណាងឱ្យគោរមវន្តទាំងអស់នៅកម្ពុជា និងការពារផលប្រយោជន៍ ស្របច្បាប់ និងកិត្តិយសរបស់ ឧកញ៉ា ជាសមាជិក និងមានគោលបំណង ទស្សនវិស័យ និងបេសកកម្មច្បាស់លាស់។ ទន្ទឹមនឹងនេះដែរ សមាគមឧកញ៉ាកម្ពុជា កំពុងសិក្សាពីលទ្ធភាព ក្នុងការចាត់វិធានការផ្លូវច្បាប់ លើបុគ្គលមួយចំនួន ដែលយកងារជា ឧកញ៉ា ទៅប្រព្រឹត្តខុសច្បាប់ ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូរររបស់គោរមវន្តឧកញ៉ាដទៃ។ ដូច្នេះ សមាគមឧកញ៉ាកម្ពុជា សូមស្នើឱ្យម្ចាស់គណនីទាំងនោះ ធ្វើការលុបចោលជាបន្ទាន់ នូវការចុះផ្សាយព័ត៌មាននោះ និងបញ្ឈប់ការចែករំលែកបន្ត នូវព័ត៌មានទាំងនោះ ។
សមាគមឧកញ៉ាកម្ពុជា សូមស្វាគមន៍ និងលើកទឹកចិត្តរាល់ការចុះផ្សាយព័ត៌មានទាក់ទងនឹងគោរមវន្ត ប៉ុន្តែសូមធ្វើការចុះផ្សាយតែព័ត៌មានណា ដែលពិតប្រាកដ ត្រឹមត្រូវ ដោយចំពោះ និងប្រកបដោយសុចរិតភាព ជាពិសេសត្រូវគោរព និងប្រកាន់ខ្ជាប់ នូវច្បាប់ និងបទប្បញ្ញត្តិពាក់ព័ន្ធនឹងសារព័ត៌មាន និងឯកជនភាពបុគ្គល ដោយមិនត្រូវយករឿងបុគ្គលម្នាក់ទៅវាយតម្លៃធ្វើឱ្យប៉ះពាល់ ដល់ស្ថាប័នទាំងមូលឡើយ ៕
ចែករំលែកព័តមាននេះ