រាជធានីភ្នំពេញ ៖ ខណៈមេឃកំពុងក្ដៅខ្លាំង និងមានខ្យល់បក់ម្ដងៗផងនោះ ម្ចាស់ដីឡូត៌មួយកន្លែងបានកាប់ឆ្ការព្រៃ និងស្មៅនៅក្នុងដីឡូត៌របស់ខ្លួន រួចក៏បានប្រមូលដុតចោល ក៏ស្រាប់តែបង្កឲ្យមានការឆាបឆេះសន្ធោសន្ធៅ និងឆេះរាលស្ទើរពេញក្នុងក្នុងដីឡូត៌តែម្ដង ។
ខណៈនោះបានបង្កឲ្យមានការភ្ញាក់ផ្អើលទាំងថ្ងៃ ហើយអ្នកភូមិ និងសមត្ថកិច្ចបានទៅជួយពន្លត់ដែរ ប៉ុន្តែអត់ឈ្នះទើបសុំជំនួយពីរថយន្តពន្លត់អគ្គិភ័យ២គ្រឿងចេញទៅអន្តរាគមន៍ពន្លត់ភ្លាមៗ ។ ព្រោះតែបារម្ភខ្លាចឆេះរាលដល់រោងចក្រ និងផ្ទះសម្បែងជុំវិញទីនោះ នេះបើយោងតាមការប្រាប់ឲ្យដឹងពីសំណាក់អ្នកភូមិខាងលើនោះ ។
ហេតុការណ៍ខាងលើបានកើតឡើង កាលពីវេលាម៉ោង៣រសៀល ថ្ងៃទី០៣ ខែមិនា ឆ្នាំ២០២៤ ខែមិនា ឆ្នាំ២០២៤ នៅក្នុងដីឡូត៌មួយកន្លែង ដែលមានទីតាំងស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
អ្នកភូមិដដែលបានប្រាប់ឲ្យដឹងបន្តទៀតថា នៅមុនពេលមានការភ្ញាក់ផ្អើលឡើងម្ចាស់ដីឡូត៌ខាងលើបានកាប់ឆ្ការព្រៃនៅក្នុងដីឡូត៌របស់ខ្លួននោះ បន្ទាប់មកក៏បានប្រមូលព្រៃដែលកាប់រួចបានមួយចំនួនដុតកម្ទេចចោល ។ ប៉ុន្តែពេលដុតបានធ្វើឲ្យឆាបឆេះខ្លាំង និងរាលដល់កន្លែផ្សេងទៀតសន្ធោសន្ធៅ ខណៈនោះបានបង្កឲ្យមានការភ្ញាក់ផ្អើលដល់អ្នកភូមិ និងសមត្ថកិច្ចជួយពន្លត់ តែមិនអាចពន្លត់ឈ្នះនោះឡើយ ។
ប្រភពដដែលបានប្រាប់ឲ្យដឹងបន្តទៀតថា ក្រោយមានហេតុការណ៍បែបនេះបានបង្កឲ្យមានការព្រួយបារម្ភយ៉ាងខ្លាំព្រោះនៅជុំវិញទីតាំងនោះមានរោងចក្រ និងផ្ទះសម្បែងច្រើនខ្នង ។ បន្ទាប់មកក៏បានសុំជំនួយពីក្រុមពន្លត់អគ្គិភ័យ បន្តិចក្រោយមកក៏រថយន្តពន្លត់អគ្គិភ័យ២គ្រឿងបានទៅដល់ជាបន្តបន្ទាប់ និងបានបាញ់ពន្លត់រហូតរលត់ទៅវិញ ព្រមទាំងអស់ការបារម្ភខ្លាចឆេះរាលដល់រោងចក្រនិងផ្ទះអ្នកភូមិទៀត ។
សមត្ថកិច្ចបាននិយាយថា នេះ គឺជាមេរៀនមួយផងដែរសម្រាប់ប្រជាពលរដ្ឋទូទៅ ត្រូវែប្រុងប្រយ័ត្នជានិច្ចមិនត្រូវដុតព្រៃ ស្មៅ ឬសំរាមផ្ដេសផ្ដាស់ ដែលអាចបបង្កជាអគ្គិភ័យបានគ្រប់ពេលនោះឡើយ ជាពិសេសរដូវរាំងស្ងួតត្រូវតែប្រយ័ត្នចំពោះភ្លើងគ្រប់ពេលតែម្ដង ៕
ចែករំលែកព័តមាននេះ