រាជធានីភ្នំពេញ ៖ បុរសម្នាក់ ជាអ្នករត់ម៉ូតូកង់៣ បានចូលបត់ជើងក្នុងបន្ទប់ទឹក នៅស្ថាននីយ៍ប្រេងតេលា អស់រយៈពេលប្រមាណជាង១ម៉ោង ក៏មានការសង្ស័យ នាំគ្នា គាស់ទ្វារ ស្រាប់តែប្រទះឃើញស្លា.ប់អង្គុយនៅលើបង្គន់ ។
ហេតុការណ៍នេះ បង្កអោយមានការភ្ញាក់ផ្អើលកាលពីវេលាម៉ោង០៤និង៤០នាទីរសៀលថ្ងៃទី០១ ខែមីនា ឆ្នាំ២០២៤ នៅក្នុងបន្ទប់ទឹក ស្ថាននីយ៍ប្រេងតេលា ដែលស្ថិតនៅតាមផ្លូវលេខ១៩៦២ ខាងកើតសាលាសង្កាត់ក្រាំងធ្នង់ ក្នុងភូមិក្រាំងអង្ក្រង់ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ ។
ស.ពមានឈ្មោះ អ៊ូ សុវណ្ណារិទ្ធ ភេទប្រុស អាយុ៤០ឆ្នាំ មានប្រពន្ធ និងកូនប្រុស៣នាក់ ស្នាក់នៅភូមិព្រៃមូល សង្កាត់ក្រាំងធ្នង់ ខណ្ឌសែនសុខ ។
បើតាមគ្រួសារសព បានអោយដឹងថា ជនរងគ្រោះជាទូទៅ គាត់រត់ម៉ូតូកង់៣ ប្រចាំនៅមុខមណ្ឌលសុខភាពក្រាំងធ្នង់ ដែលស្ថិតនៅទល់មុខ នឹងស្ថាននីយ៍ប្រេងខាងលើ ។
អ្នកលក់ដូរនៅក្បែរកន្លែងកើតហេតុ បានអោយដឹងថា នៅវេលាម៉ោងប្រមាណ៣រសៀល ឃើញអ្នករត់ម៉ូតូកង់៣ ទំនងមិនស្រួលខ្លួន ក៏បានដើរឆ្លងផ្លូវទៅបត់ជើង ទៅក្នុងបន្ទប់ទឹកស្ថាននីយ៍ខាងលើ ហើយចូលទៅបាត់ប្រមាណជាង១ម៉ោង មិនឃើញ ចេញនោះទេ។ ដោយបាត់យូរ ម្ចាស់ស្ថាននីយ៍ ក៍បានទៅគោះទ្វារហៅមិនឆ្លើយ ទើបមានការសង្ស័យ ក៏ឲ្យបុគ្គលិកគាស់ទ្វារ បន្ទប់ស្រាប់តែ ឃើញជនរងគ្រោះអង្គុយស្លា.ប់នៅលើបង្កន់ ហើយក៏បានរាយការណ៍ប្រាប់សមត្ថកិច្ចចុះត្រួតពិនិត្យ ។
បន្ទាប់ពីត្រួតពិនិត្យ នគរបាលការិយាល័យបច្ចេកទេស និងវិទ្យាសាស្ត្រ បានសន្និដ្ឋាន អ្នករត់ម៉ូតូកង់៣រូបនោះ ស្លា.ប់ដោយសារតែគាំងបេះដូង (ខ្យល់គរ) ។ ស.ពត្រូវបានក្រុមគ្រួសារ នាំយកទៅធ្វើបុណ្យតាមប្រពៃណី ៕
ចែករំលែកព័តមាននេះ