រាជធានីភ្នំពេញ ៖ ស្ត្រីម្នាក់បានបើករថយន្តម៉ាកTOYOTA Vitz ១គ្រឿង ដឹកកូនស្រីតូចម្នាក់ផង ស្រាប់តែវាក់ជាមួយអ្នកជិះម៉ូតូឆ្លងផ្លូវ កាត់ពីមុខ ហើយដោយសារតែខ្លាចបុកអ្នកជិះម៉ូតូនោះ រូបនាងបានបើកគេចចេញទាំងស្លន់ស្លោ ដែលជាហេតុធ្វើឲ្យរថយន្ត រេចង្កូតជ្រុលធ្លាក់ចូលទៅក្នុងប្រឡាយទឹកទាំកំរោលរងការខូចខាតតែម្ដង ប៉ុន្តែជាសំណាងល្អ រូបនាងនិងកូនស្រីមានសុវត្ថិភាព ពុំមានគ្រោះថ្នាក់អ្វីឡើយ ។
ឧប្បត្តិហេតុនេះ បានកើតឡើងកាលពីវេលាម៉ោង២និង១៥នាទីរសៀលថ្ងៃទី០១ ខែមីនា ឆ្នាំ២០២៤ នៅតាមផ្លូវជាតិលេខ៤ ស្ថិតនៅក្នុងភូមិអូរដឹម សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពព័ត៌មាន បានឲ្យដឹងថា នៅមុនពេលកើតហេតុ ស្ត្រីខាងលើបានបើករថយន្តម៉ាក TOYOTA Vitz ១គ្រឿង ពណ៌ស ពាក់ស្លាកលេខ ក្រចេះ 2B-9009 ធ្វើដំណើរពីកើតទៅលិច លុះពេលទៅដល់ត្រង់ចំណុចកើតហេតុ ស្រាប់តែមានអ្នកជិះម៉ូតូ១គ្រឿង ឆ្លងផ្លូវ ក្នុងទិសដៅពីត្បូងទៅជើង រួចសំដៅ ទៅទិសខាងលិចវិញ ហើយដោយសារតែខ្លាចបុកអ្នកជិះម៉ូតូឆ្លងផ្លូវនោះ ទើបនាងខំកាច់ចង្កូតគេចចេញ ហើយក៏រេចង្កូតជ្រុលធ្លាក់ចូលក្នុងប្រឡាយទឹក តែម្ដង ។
ប្រភពខាងលើ បានប្រាប់ឲ្យដឹងបន្ថែមទៀតថា ពេលនោះរថយន្ត បានរងការខូចខាតយ៉ាងដំណំ ចំណែកឯស្ត្រីរូបនោះ រួមជាមួយកូនស្រីតូចរបស់នាងម្នាក់ទៀត ជួបសំណាងល្អ ពុំបានរងរបួសឡើយ ។
ក្រោយពេលកើតហេតុ កម្លាំងនគរបាលប៉ុស្តិ៍ចោមចៅទី៣ បានចុះទៅពិនិត្យជាក់ស្តែងហើយឃើញថា រថយន្តនេះមនបង្កឲ្យមានគ្រោះថ្នាក់ដល់អ្នកដទៃ ក៏បានឲ្យម្ចាស់ជួលរថយន្តស្ទូចយកទៅធ្វើការជួសជុលឡើងវិញដោយខ្លួនឯង ៕
ចែករំលែកព័តមាននេះ