ខេត្តកំពង់ចាម ៖ សកម្មភាពចាក់ថ្មចូលទន្លេមេគង្គនៅចំណុចភូមិព្រៃទទឹងឃុំឬស្សីស្រុក ដែលជាទង្វើខុសច្បាប់ ។ ចំណែកការសាងសង់ផ្ទះមួយអំពីថ្មបេតុងចាក់គ្រឹះចូលពយទន្លេនៅភូមិតាកយ ឃុំព្រែកដំបូក គឺសុទ្ធសឹងតែជាស្នាដៃរបស់ឧកញ៉ាពីរនាក់ ទង្វើបែបនេះ ត្រូវបានរដ្ឋបាលខេត្តកំពង់ចាមប្រៀបដូចទើបភ្ញាក់ពីដេកលក់បញ្ជាឲ្យរុះរើរក្សាសភាពដើមវិញ…
ខេត្តកំពង់ចាម ៖ សកម្មភាពចាក់ថ្មចូលទន្លេមេគង្គនៅចំណុចភូមិព្រៃទទឹងឃុំឬស្សីស្រុក ដែលជាទង្វើខុសច្បាប់ ។ ចំណែកការសាងសង់ផ្ទះមួយអំពីថ្មបេតុងចាក់គ្រឹះចូលពយទន្លេនៅភូមិតាកយ ឃុំព្រែកដំបូក គឺសុទ្ធសឹងតែជាស្នាដៃរបស់ឧកញ៉ាពីរនាក់ ទង្វើបែបនេះ ត្រូវបានរដ្ឋបាលខេត្តកំពង់ចាមប្រៀបដូចទើបភ្ញាក់ពីដេកលក់បញ្ជាឲ្យរុះរើរក្សាសភាពដើមវិញ ។ ព្រោះថា នៅក្នុងច្បាប់បានចែងយ៉ាងច្បាស់មាត់ទន្លេ គឺជាដីកម្មសិទ្ធិសាធារណៈរបស់រដ្ឋមិនអាចមានបុគ្គលណាមួយទៅរំលោភបំពានបាននោះទេ ។
លោក ផល វ៉ុន ជំទប់ទី១ ឃុំព្រែកដំបូក បានប្រាប់ឲ្យដឹងនាព្រឹកថ្ងៃទី២៦ កុម្ភៈ ឆ្នាំ២០២៤ ឲ្យដឹងថា ក្រុមគណៈកម្មការចម្រុះ ដឹកនាំដោយលោកអភិបាលរងស្រុកស្រីសន្ធរម្នាក់ មន្ត្រីបរិស្ថានអាជ្ញាធរមូលដ្ឋានព្រមទាំងកម្លាំងសមត្ថកិច្ចនៅវេលាម៉ោង៨ព្រឹកថ្ងៃទី២៦ កុម្ភៈ បានយកគ្រឿងចក្រទៅឈូសឆាយគ្រឹះសំណង់នៅចំណុចភូមិតាកយ ឃុំព្រែកដំបូក ដោយបានចំណាយពេលវេលាជាង១ម៉ោង ទើបរួចរាល់ហើយការចាក់គ្រឹះចូលទៅផ្ទៃទឹកដៃទន្លេមានប្រវែងប្រមាណ៣ម៉ែត្រពីមាត់ច្រាំង ដែលជាស្នាដៃរបស់ឧកញ៉ាម្នាក់ឈ្មោះនួន រិទ្ធី ។
លោកជំទប់ទីមួយ ឃុំព្រែកដំបូក ប្រាប់បន្តថា សំណង់នេះ គេទើបតែនឹងចាប់ផ្ដើមធ្វើតែប៉ុណ្ណោះ ដោយកូននៅរាជធានីភ្នំពេញ មានបំណងសាងសង់ផ្ទះនៅទីនេះ សម្រាប់ជូនម្ដាយចំណាស់ស្នាក់នៅ ។ លោកថា ដីមាត់ទន្លេគឺជាដីកម្មសិទ្ធិរបស់រដ្ឋ ដូច្នេះការសាងសង់នេះ បង្កឲ្យមានផលប៉ះពាល់ហើយ ត្រូវបានក្រុមគណៈកម្មការចម្រុះកម្ទេចចោលឱ្យដូចសភាពដើមធម្មតាវិញ ។
លោកស៊ីម គង់ អភិបាលស្រុកស្រីសន្ធរប្រាប់តាមទូរសព្ទឱ្យដឹង នាព្រឹកថ្ងៃទី២៦ កុម្ភៈ ថា តាមពិតម្ចាស់ផ្ទះគាត់មានដីកេរ្ត៏ដោយបានទាក់ទងមកអាជ្ញាធរមូលដ្ឋានភូមិឃុំ ដើម្បីសាងសង់ផ្ទះនៅ តែសកម្មភាពចាក់គ្រឹះបេតុងរំលោភចេញពីច្រាំងទន្លេបង្កឲ្យមានផលប៉ះពាល់ពិតប្រាកដណាស់ ។ គេសង់ផ្ទះនេះមិនបានទាក់ទងមកស្រុកឡើយ ។
មានមតិជាច្រើននិយាយថា ខេត្តកំពង់ចាម បើមានអភិបាលស្រុកតែម្នាក់ទៀត ដូចជាស្រុកស្រីសន្ធរ ប្រាកដជាគ្មានរីកចម្រើនទេខេត្តកំពង់ចាម ។ លោកអភិបាលស្រុកសំងំដេកលក់ស្រួលណាស់ ទុកឱ្យអ្នកមានប្រាក់រំលោភច្បាប់រដ្ឋតាមចិត្ត ។
សូមបញ្ជាក់ថា រឿងរំលោភធំមួយទៀត ដែលរដ្ឋបាលខេត្តកំពង់ចាមបានចេញសេចក្តីប្រកាស ដោយតម្រូវឲ្យម្ចាស់ទីតាំងដែលចាក់ថ្មចូលទៅក្នុងផ្ទៃទឹកទន្លេ នៅចំណុចភូមិព្រៃទទឹង ឃុំឬស្សី ស្រុកស្រីសន្ធរ ដែលមានទទឹង៥៥ម៉ែត្រ និងបណ្ដោយ១៣០ម៉ែត្រ ជាមួយនោះក៏បានដាក់ឱសានវ៉ាតរយៈពេល៧០ថ្ងៃ តម្រូវឲ្យម្ចាស់ទីតាំងដែលគេស្គាល់ជារបស់ឧកញ៉ាម្នាក់ឈ្មោះទន់ ឆៃអ៊ាង ត្រូវតែប្រើគ្រឿងចក្រកាយយកថ្មចេញពីក្នុងទឹកទន្លេ ដើម្បីធ្វើយ៉ាងណាកុំឱ្យប៉ះពាល់ចរន្តទឹក
ហូរ ។
បន្ទាប់ពីទទួលបានការណែនាំនេះ នៅថ្ងៃទី២៥ កុម្ភៈ គេឃើញរថយន្តបែន និងអេស្កាវ៉ាទ័របានចូកយកកម្ទេចថ្មចេញពីទន្លេ និងសាឡង់ដឹកអេស្កាវ៉ាទ័រមកចូកយកកម្ទេចថ្មដែលចាក់រំលោភបំពានច្បាប់កាយចេញជាបណ្ដើរៗហើយដែរ ។
ចំណែកលោកស្រី សុភ័ក្ត្រ អភិបាលរងខេត្តវិញ បានឲ្យដឹងដែរថា នៅព្រឹកថ្ងៃទី២៦ កុម្ភៈ ឆ្នាំ២០២៤ រូបលោកបានដឹកនាំសហការីជាច្រើននាក់ ដោយបានចុះតាមដានផ្ទាល់ពីសកម្មភាពគ្រឿងចក្រដែលកំពុងកាយយកថ្មចេញពីក្នុងទន្លេបណ្តើរៗហើយដែរ ។
មហាជនច្រើននាក់និយាយថា ប្រសិនបើរដ្ឋអំណាចស្រុកមានសមត្ថភាពគ្រប់គ្រងស្រុកបានល្អ ប្រាកដជាគ្មានបញ្ហាបែបនេះកើតឡើងឡើយ ។ ប្រសិនបើមានព័ត៌មានប្លែកនឹងមានផ្សាយជូនបន្តទៀត ។
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ