ខេត្តបាត់ដំបង ៖ បុរសម្នាក់ដែលមានប្រវត្តិសេពគ្រឿងញៀនដ៏ខ្លាំងក្លា និងទើបចេញពីមណ្ឌលបន្សាបគ្រឿងញៀនថ្មីៗនេះ ត្រូវបានសមត្ថកិច្ចឃាត់ខ្លួនភ្លាមៗ បន្ទាប់ពីជននេះទាញពូថៅកាប់ទៅលើអតីតភរិយាបណ្ដាលឲ្យស្លាប់នៅកន្លែងកើតហេតុ កាលពីវេលាម៉ោង១០ព្រឹកថ្ងៃទី២៤ កុម្ភៈ នៅក្នុងវត្តកំប្រ៉ង់ ស្ថិតក្នុងភូមិកំប្រ៉ង់ ឃុំតាក្រី ស្រុកកំរៀង ដែលគេអះអាងថា ផ្ដើមចេញពីរឿងគំនុំដ៏ក្ដៅគគុកក្នុងអំឡុងពេលជននេះជាប់ក្នុងមណ្ឌលបន្សាបគ្រឿងញៀន ។
តាមរយៈរបាយការណ៍សមត្ថកិច្ច ជនសង្ស័យឈ្មោះ នៅ វុទ្ធី អាយុ៤១ឆ្នាំ រស់នៅភូមិ ឃុំកើតហេតុ រីឯស្ត្រីរងគ្រោះឈ្មោះ សាយ ស៊ីធន អាយុ៤១ឆ្នាំ ។ ជនសង្ស័យនិងជនរងគ្រោះជាអតីតប្ដីប្រពន្ធនឹងគ្នា។ ប៉ុន្តែពួកគេបានបែកបាក់គ្នានៅក្នុងអំឡុងឆ្នាំ២០២៣ នៅពេលដែលជនសង្ស័យជាប់ក្នុងមណ្ឌលបន្សាបគ្រឿងញៀន។ នេះបើតាម លោក វេ គឹមចត់ អធិការស្រុកកំរៀងបាននិយាយប្រាប់បន្ថែមលើរបាយការណ៍ ។
របាយការណ៍បានឲ្យដឹងថា អតីតប្ដីបែកថ្នាំរូបនេះ បានប្រើប្រាស់ពូថៅកាប់ទៅលើអតិតភរិយាពីក្រោយមួយពូថៅពេលគាត់កំពុងជិះម៉ូតូចូលក្នុងវត្ត ក្បែរកន្លែងអតីតប្ដីនេះកំពុងធ្វើសំណង់ បណ្ដាលឲ្យដួលឈាមជោកជាំដី ហើយត្រូវជននេះកាប់បន្ថែមចំនួនពីរពូថៅទៀត រហូតដាច់ខ្យល់ស្លាប់ភ្លាមៗនៅកន្លែងកើតហេតុ ។
បើតាមសាក្សីបានរាយការណ៍ប្រាប់សមត្ថកិច្ចថា ក្រោយចេញពីមណ្ឌលបន្សាបគ្រឿងញៀនបានជាងមួយខែជនសង្ស័យឈ្មោះ នៅ វុទ្ធី បានទៅសុំគេធ្វើសំណង់នៅក្នុងវត្តកំប្រ៉ង់ ។ សាក្សីបន្តថា នៅព្រឹកកើតហេតុ ស្រាប់តែគេឃើញស្ត្រីឈ្មោះ សាយ ស៊ីធន ដែលជាអតិតប្រពន្ធជិះម៉ូតូចូលក្នុងវត្ត កាត់កន្លែងសំណង់ ខណៈដែលឈ្មោះ វុទ្ធី កំពុងធ្វើការ ។ ពេលក្រឡេកឃើញអតីតប្រពន្ធជិះកាត់មុខបែបនេះ ឈ្មោះ វុទ្ធី ក៏ទាញពូថៅស្ទុះទៅតាមកាប់ក្បាលពីក្រោយត្រូវមួយពូថៅធ្លាក់ពីលើម៉ូតូ រួចជននេះកាប់បន្ថែមពីរពូថៅទៀត រហូតជនរងគ្រោះដេកស្លាប់ក្នុងថ្លុកឈាមយ៉ាងរន្ធត់បំផុត ។
បើតាមលោក វេ គឹមចត់ អធិការស្រុកកំរៀង បានរំលឹកពីប្រវត្តិខ្លះរបស់ជនសង្ស័យ ដែលលោកបានសាកសួរបឋមនៅកន្លែងកើតហេតុបានឲ្យដឹងថា ឈ្មោះ នៅ វុទ្ធី ជាមនុស្សសកម្មបំផុតក្នុងការសេពថ្នាំញៀន ហើយកាលនោះប្ដីប្រពន្ធនេះមិនទាន់បែកបាក់គ្នាទេ ។ លោកថា ក្នុងឆ្នាំ២០២៣ ដោយសារជននេះជោកជាំទៅដោយគ្រឿងញៀនដែលមិនអាចបោះបង់បាន ស្ត្រីជាប្រពន្ធក៏ប្ដឹងសមត្ថកិច្ចឲ្យចាប់យកទៅដាក់មណ្ឌលបន្សាបគ្រឿងញៀន ។ ប៉ុន្តែនៅអំឡុងពេលប្ដីជាប់ក្នុងមណ្ឌល ស្រាប់តែប្រពន្ធឆក់ឱកាសលួចយកប្ដីថ្មីទៀតយ៉ាងរំភើយ ។
លោកអធិការបានបញ្ជាក់ថា នៅអំឡុងខែមករា ឆ្នាំ២០២៤ ឈ្មោះនៅ វុទ្ធី ក៏ត្រូវបានដោះលែងពីមណ្ឌលបន្សាបគ្រឿងញៀនវិញ លុះដឹងថា ប្រពន្ធយកប្ដីថ្មីចោលខ្លួនបាត់ ជននេះហាក់ខឹងយ៉ាងខ្លាំងរហូតតាមបង្កជម្លោះបន្តបន្ទាប់ ។ ជននេះហាក់ចងគំនុំក្ដៅក្រហល់ក្រហាយក្នុងខ្លួនរហូតមក ។
បើតាមចម្លើយសារភាពរបស់ជនសង្ស័យដែលលោកអធិការបានសាកសួរ ជនសង្ស័យរូបនេះបានសារភាពថា ខ្លួនពិតជាបានកាប់សម្លាប់អតីតប្រពន្ធនេះមែន ។ ជននេះបានលើកពីហេតុផលថា «ខ្ញុំចងគំនុំជាមួយអតីតប្រពន្ធម្នាក់នេះ គឺដោយសារតែ ទី១-វាប្ដឹងខ្ញុំ ឲ្យសមត្ថកិច្ចចាប់ខ្ញុំដាក់មណ្ឌលបន្សាបគ្រឿងញៀន និងទី-២ នៅពេលខ្ញុំកំពុងជាប់ក្នុងមណ្ឌលបន្សាបគ្រឿងញៀន បែរជាវាលួចយកប្ដីថ្មីបាត់ទៀត។ ដូច្នេះហើយ ទើបក្រោយចេញពីមណ្ឌលវិញ ខ្ញុំខឹងក៏តាមចងគំនុំរហូតទ្រាំមិនបាន ពេលឃើញអតីតប្រពន្ធរូបនេះជិះម៉ូតូកាត់កន្លែងធ្វើការក៏ផ្ទុះកំហឹងដូចភ្នំភ្លើងទាញពូថៅតាមកាប់សម្លាប់តែម្ដងទៅ» ។
លោក វេ គឹមចត់ បានបញ្ជាក់ដែរថា ក្រោយកើតហេតុភ្លាម កម្លាំងប៉ុស្ដ៏រដ្ឋបាល ឃុំតាក្រី បានចុះអន្តរាគមន៍ឃាត់ខ្លួនជនសង្ស័យភ្លាមៗដែរនៅកន្លែងកើតហេតុ ។ ពេលនេះ លោកស្នងការបានបញ្ជាឲ្យមន្ត្រីជំនាញសាកសួរជនសង្ស័យ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ