«ក្រុមតាលីបង់លើកនេះលេងដៃធ្ងន់បន្តិច ប្រហារជីវិតមនុស្សរបៀបពួកម៉ាស់ផ្ចា (marfia) ឬពួកកាថែល (cartel) នៅម៉ិកស៊ីកូ។ ពួកគេឱ្យសាច់ញាតិជនរងគ្រោះបាញ់រះអ្នកទោសនៅចំពោះមុខមហាជនរាប់ពាន់នាក់ ជាលក្ខណៈអារកមាន់គំរាមស្វា។» ទីក្រុងកាប៊ុល៖ ថ្មីៗនេះ…
«ក្រុមតាលីបង់លើកនេះលេងដៃធ្ងន់បន្តិច ប្រហារជីវិតមនុស្សរបៀបពួកម៉ាស់ផ្ចា (marfia) ឬពួកកាថែល (cartel) នៅម៉ិកស៊ីកូ។ ពួកគេឱ្យសាច់ញាតិជនរងគ្រោះបាញ់រះអ្នកទោសនៅចំពោះមុខមហាជនរាប់ពាន់នាក់ ជាលក្ខណៈអារកមាន់គំរាមស្វា។»
ទីក្រុងកាប៊ុល៖ ថ្មីៗនេះ ក្រុមតាលីបង់ប្រហារជីវិតទណ្ឌិតពីរនាក់នៅចំពោះមុខមហាជនរាប់ពាន់នាក់ដែលអង្គុយរង់ចាំទស្សនាយ៉ាងត្រៀបត្រានៅពហុកីឡដ្ឋានមួយកន្លែង។ សារព័ត៌មានផ្សាយថាតាលីបង់អនុញ្ញាតឱ្យសាច់ញាតិរបស់ជនរងគ្រោះដែលស្លាប់ដោយសារការចាក់នឹងកាំបិតអាចប្រហារជីវិតអ្នកទោសទាំងពីរនាក់នោះដោយផ្ទាល់ដៃតែម្ដង។
តុលាការកំពូលតាលីបង់ចេញសេចក្ដីសម្រេចថា «អ្នកទោសទាំងពីរនាក់នោះពិតជាមានកំហុសពីបទចាក់សម្លាប់មនុស្សពីរនាក់នៅក្នុងហេតុការណ៍ពីរដាច់ដោយឡែកពីគ្នាដូចការចោទប្រកាន់មែន»។ អ្នកទោសទាំងពីរនាក់នោះម្នាក់ឈ្មោះស៊ីយេត យ៉ាម៉ាល់ (Syed Yamal) និងម្នាក់ទៀតហ្គោលខាន់ (Gul Khan)។ គេមិនទាន់ដឹងច្បាស់ថាតែជនដៃដល់ដែលចាក់សម្លាប់ជនរងគ្រោះនៅថ្ងៃកើតហេតុនោះជាជនជាប់ចោទពីរនាក់នេះ ឬក៏នរណាផ្សេង។
សេចក្ដីប្រកាសរបស់តុលាការកំពូលរៀបរាប់បន្តទៀតថាតុលាការចំនួនបីថ្នាក់រួចមកហើយ និងមេធំរបស់តាលីបង់បានចេញបញ្ជាឱ្យប្រហារជីវិតអ្នកទាំងពីរនេះដើម្បីសងបំណុលឈាមដែលពួកគេសម្លាប់ជនរងគ្រោះដោយអំពើឃោរឃៅ។ កាលពីថ្ងៃព្រហស្បតិ៍ម្សិលមិញ គេឃើញហ្វូងមនុស្សប្រមូលផ្ដុំគ្នាយ៉ាងពពាក់ពពូននៅពហុកីឡដ្ឋាននៃទីក្រុងហ្កាស់ស្ន៊ី (Ghazni)។ អ្នកខ្លះចង់មើលគេប្រហារជីវិតអ្នកទោសកណ្ដាលវាល។ ដូចនេះ ពួកគេខំតោងរបងពហុកីឡដ្ឋានដើម្បីចូល។
តុលាការកំពូលថ្លែងថា «អ្នកធម៌ អ្នកអាថ៌ខាងសាសនាឥស្លាមបានស្នើសុំឱ្យសាច់ញាតិរបស់ជនរងគ្រោះអត់ឱនឱ្យពួកគេ (អ្នកទោស) និងអហោសិកម្មឱ្យគ្នាត្រឹមនេះចុះ។ ប៉ុន្តែសាច់ញាតិមិនព្រម។ ពួកគេចង់ទូទាត់បំណុលឈាម។ អ្នកនាំពាក្យស្នងការដ្ឋាននគរបាលខេត្តហ្កាស្ន៊ី (Ghazni) ប្រាប់ថាសាច់ញាតិជនរងគ្រោះប្រហារជីវិតបុរសទាំងពីរនាក់ដោយផ្ទាល់ដៃ។
អ្នកនាំពាក្យរូបនេះមិនបានបញ្ជាក់ថាតើពួកគេប្រើប្រាស់កាំភ្លើងម៉ាកអ្វីដើម្បីបាញ់ប្រហារអ្នកទោសទាំងនោះទេ។ នីតិវិធីប្រហារជីវិតចាប់ផ្ដើមមុនម៉ោង១រសៀលបន្តិច។ គេស្ដាប់ឮសំឡេងគ្រាប់កាំភ្លើងផ្ទុះលាន់កងរំពងពេញពហុកីឡដ្ឋាននោះចំនួន១៥គ្រាប់។ អ្នកទោសម្នាក់ត្រូវ៨គ្រាប់ និងម្នាក់ទៀតត្រូវ៧គ្រាប់។ ដូច្នេះ ពួកគេត្រូវគ្រាប់កាំភ្លើងឡើងសុសសាច់។
អ្នកនាំពាក្យតុលាការកំពូលបញ្ជាក់បន្ថែមថាអ្នកទោសទាំងនោះត្រូវគេដាក់ឱ្យបែរមុខទៅម្ខាងដើម្បីឱ្យគេបាញ់ពីក្រោយខ្នង។ ក្រោយពេលបាញ់រួចហើយ ឡានពេទ្យក៏បើកចូលទៅដឹកសាកសពចេញទៅបាត់។ គួរកត់សម្គាល់ថាអ្នកទោសទាំងពីរនាក់នេះជាអ្នកទីបី និងទីបួនដែលប្រហារជីវិតជាសាធារណៈចាប់តាំងពីក្រុមតាលីបង់ឡើងកាន់អំណាចកាលពីឆ្នាំ២០២១។អង្គការសហប្រជាជាតិប្រកាសថ្កោលទោសជាទម្ងន់ចំពោះការបដិបត្តិដាក់ទោសតាមស្ទាយ (style) របស់ក្រុមតាលីបង់។
ពោលគឺប្រហារជីវិតនៅកណ្ដាលវាល, វាយនឹងរំពាត់នៅកណ្ដាលវាល និងគប់នឹងដុំថ្មនៅកណ្ដាលវាល។ គួរកត់សម្គាល់ថាកាលពីពេលដឹកនាំប្រទេសអាហ្វហ្កានីស្ថានជំនាន់ទសវត្សទី៩០ (ជំនាន់រៀមច្បង) ក្រុមតាលីបង់ក៏មានទម្លាប់អនុវត្តវិធីដាក់ទោសប្រហារជីវិតមនុស្សជាសាធារណៈដោយគប់គ្រវែងនឹងដុំថ្ម ឬវាយនឹងរំពាត់ទៅលើអ្នកទោសរហូតដល់ស្លាប់ផងដែរ។ ដូច្នេះ ក្រុមឈាមថ្មីរបស់តាលីបង់ក៏យកកេរតំណែលនេះមកអនុវត្តនៅក្នុងរបបដឹកនាំរបស់ពួកគេនាសម័យបច្ចុប្បន្នជាបន្តទៀត៕
ប្រភព៖ Associated Press
https://apnews.com/article/afghanistan-taliban-public-execution-stadium-73a175aef085f26bd6b574465be34c6f
ចែករំលែកព័តមាននេះ