(បាងកក)៖ គណៈរដ្ឋមន្ត្រីថៃ បានអនុម័តថវិកាពិសេសចំនួន ២,៩ លានដុល្លារ ដើម្បីរៀបចំពិធីបុណ្យមហាសង្ក្រាន្តលំដាប់ពិភពលោក។ កម្មវិធីនេះត្រូវបានគេរំពឹងថានឹងជួយឱ្យប្រទេសថៃក្លាយជាប្រទេសមួយក្នុងចំណោមប្រទេសទាំង១០ ដែលមានពិធីបុណ្យដ៏ទាក់ទាញបំផុត ទទួលការចាប់អារម្មណ៍ពីភ្ញៀវទេសចរណ៍ជាតិ និងអន្តរជាតិ។ នេះបើយោងតាមការចុះផ្សាយរបស់សារព័ត៌មាន vietnamplus នៅថ្ងៃទី២២ ខែកុម្ភៈ ឆ្នាំ២០២៤។
![](https://kohsantepheapdaily.com.kh/wp-content/uploads/2024/02/db35e44f7fa2f549224e16e3c86b8f40.jpg)
យោងតាមការិយាល័យរដ្ឋាភិបាលថៃ ពិធីបុណ្យមហាសង្ក្រាន្តលំដាប់ពិភពលោក មានគោលបំណងលើកកម្ពស់ប្រពៃណី និងវប្បធម៌ថៃ ក៏ដូចជាអបអរសាទរពិធីបុណ្យសង្ក្រាន្តថៃនេះ បានចូលជាបញ្ជី UNESCO។
ក្រសួងទេសចរណ៍ និងកីឡាថៃ សង្ឃឹមថា សកម្មភាពពិធីបុណ្យឆ្នាំនេះ នឹងទាក់ទាញមនុស្សជាង ២សែននាក់ និងបង្កើតប្រាក់ចំណូលបានជាង ៣ពាន់លានបាត (ស្មើនឹងប្រហែល ៨៧លានដុល្លារអាមេរិក)។
ក្រៅពីសកម្មភាពក្នុងពិធីបុណ្យសង្ក្រាន្តនេះ ប្រទេសថៃក៏កំពុងអនុវត្តគោលនយោបាយជាច្រើនដូចជា ការលើកលែងទិដ្ឋាការ ការបង្វិលសងពន្ធលើតម្លៃបន្ថែម និងកម្មវិធីធានារ៉ាប់រងសុខភាពថ្មីមួយសម្រាប់ភ្ញៀវទេសចរអន្តរជាតិដែលមានប្រាក់កម្រៃខ្ពស់បំផុតរហូតដល់ ១លានបាត មានបំណងទាក់ទាញភ្ញៀវទេសចរអន្តរជាតិប្រមាណ ៣៥លាននាក់នៅឆ្នាំនេះ ជាមួយនឹងប្រាក់ចំណូលប៉ាន់ស្មានប្រហែល ៩៧ពាន់លានដុល្លារ។
ស្ថិតិបង្ហាញថា ចាប់ពីដើមឆ្នាំរហូតដល់ដំណាច់ថ្ងៃទី ១៨ ខែកុម្ភៈ ប្រទេសថៃបានស្វាគមន៍ភ្ញៀវទេសចរអន្តរជាតិជាង ៥,២ លាននាក់ កើនឡើង ៤៩% ធៀបនឹងរយៈពេលដូចគ្នាក្នុងឆ្នាំ ២០២៣ និងនាំមកនូវប្រាក់ចំណូលជិត ២៥៥ ពាន់លានបាត។ ប្រទេសនិងដែនដីចំនួនប្រាំដែលមានភ្ញៀវទេសចរច្រើនចូលមកប្រទេសថៃក្នុងឱកាសនេះមានប្រទេសចិន ម៉ាឡេស៊ី រុស្សី កូរ៉េខាងត្បូង និងឥណ្ឌា៕
![](https://kohsantepheapdaily.com.kh/wp-content/uploads/2024/02/b15f16753d4b9c0d29be3bec32fece8e.jpg)
![](https://kohsantepheapdaily.com.kh/wp-content/uploads/2024/02/0033b10c611de7952b025e3def9cea74.webp)
ចែករំលែកព័តមាននេះ