សម្តេចសង្ឃទីបេ ដាឡៃឡាម៉ា បានបោះបង់ចោលតួនាទីនយោបាយជាផ្លូវការហើយ ។ នេះបើតាមការឱ្យដឹងដោយអ្នកនាំពាក្យរបស់ព្រះអង្គ ។ មេដឹកនាំសាសនាទីបេរូបនេះបានផ្តល់ការអនុម័តវិសោធនកម្មរដ្ឋធម្មនុញ្ញ ដើម្បីអាចឱ្យព្រះអង្គលះបង់ការទទួលខុសត្រូវផ្នែកនយោបាយទៅឱ្យមេដឹកនាំសហគមន៍ដែលជាប់ឆ្នោត ។
អ្នកនាំពាក្យសម្តេចសង្ឃដាឡៃឡាម៉ា លោក Labsang Choedak និយាយថា ការផ្លាស់ប្តូរនេះត្រូវបានធ្វើឡើងក្នុងអំឡុងពេលនៃការប្រជុំសភារយៈពេល៣ថ្ងៃ រៀបចំឡើងនៅតំបន់ប្រជុំជន ដារ៉ាម សាលា ក្នុងប្រទេសឥណ្ឌា។ ចំណែកវិសោធនកម្មរដ្ឋធម្មនុញ្ញធ្វើឡើងក្រោយពីសភាពិសេសទីបេទទូចដល់សម្តេចសង្ឃដាឡៃឡាម៉ា ពិចារណាមើលឡើងវិញនូវសេចក្តីសម្រេចចិត្តរបស់ព្រះអង្គក្នុងការបោះបង់ចោលអំណាច។
សម្តេចសង្ឃដាឡៃឡាម៉ា បោះបង់ចោលអំណាចនយោបាយ ប៉ុន្តែនៅតែជាមេដឹកនាំសាសនាដដែល ។ កាលពីខែមីនាកន្លងមកនេះសម្តេចសង្ឃដាឡៃឡាម៉ា បានប្រកាសពីផែនការចូលនិវត្តន៍ពីតួនាទីជាមេដឹកនាំនយោបាយនៃចលនានិរទេសទីបេ ដោយសម្តេចព្រះអង្គមានសង្ឃដីកាថា សហគមន៍ទីបេត្រូវការមេដឹកនាំជាប់ឆ្នោតថ្មី ។ សម្តេចសង្ឃដាឡៃឡាម៉ា បានភៀសខ្លួនពីប្រទេសចិនកាលពី៥២ឆ្នាំ មុនគឺនៅថ្ងៃទី១០ មីនា ឆ្នាំ១៩៥៩ ក្រោយពីដឹកនាំការបះបោរប្រឆាំងនឹងការគ្រប់គ្រងរបស់ចិន មិនបានសម្រេច៕
ចែករំលែកព័តមាននេះ