រាជធានីភ្នំពេញ ៖ សមាជិកសមាជិការរដ្ឋសភានៃព្រះរាជាណាចក្រកម្ពុជាបានបោះឆ្នោតតែង លោក ហ៊ុន ម៉ានី ជាឧបនាយករដ្ឋមន្ត្រី ខណៈតែងតាំងសមាជិករាជរដ្ឋាភិបាលចំនួន២រូបទៀត ជាទេសរដ្ឋមន្ត្រី ។…
រាជធានីភ្នំពេញ ៖ សមាជិកសមាជិការរដ្ឋសភានៃព្រះរាជាណាចក្រកម្ពុជាបានបោះឆ្នោតតែង លោក ហ៊ុន ម៉ានី ជាឧបនាយករដ្ឋមន្ត្រី ខណៈតែងតាំងសមាជិករាជរដ្ឋាភិបាលចំនួន២រូបទៀត ជាទេសរដ្ឋមន្ត្រី ។ ក្នុងនោះដែរ លោក ហ៊ុន ម៉ានី នឹងក្លាយជាឧបនាយករដ្ឋមន្ត្រីទី១១ ក្នុងរដ្ឋាភិបាលអាណត្តិទី៧ ដឹកនាំដោយសម្តេច ហ៊ុន ម៉ាណែត ។
ការបោះឆ្នោតនេះធ្វើឡើង ក្នុងសម័យប្រជុំរដ្ឋសភាជាវិសាមញ្ញ នាព្រឹកថ្ងៃ២១កុម្ភៈនេះ ដើម្បីបោះឆ្នោតតែងតាំងសមាជិករាជរដ្ឋាភិបាលចំនួនបីរូប ជាឧបនាយករដ្ឋមន្ត្រី និងទេសរដ្ឋមន្ត្រី ក្រោមអធិបតីភាព សម្តេចរដ្ឋសភាធិបតី ឃួន សុដារី ប្រធានរដ្ឋ សភាព្រមទាំងមានការអញ្ជើញចូលរួមពីសំណាក់សម្តេចពញ្ញាចក្រីហេង សំរិន សម្តេចតេជោ ហ៊ុន សែន សម្តេច ក្រឡាហោម ស ខេង សម្តេចធិបតី ហ៊ុន ម៉ាណែត ព្រមទាំងសមាជិកសមាជិការដ្ឋសភា សរុប១២០រូប ។
ជាក់ស្តែងនេះ លោក ហ៊ុន ម៉ានី នឹងក្លាយជាឧបនាយករដ្ឋមន្ត្រីទី១១ ក្នុងរដ្ឋាភិបាលអាណត្តិទី៧ ដឹកនាំដោយសម្តេច ហ៊ុន ម៉ាណែត ។ ហើយឧបនាយករដ្ឋមន្ត្រី១០រូប នាពេលបច្ចុប្បន្នមាន លោក នេត សាវឿន, លោក អូន ព័ន្ធមុនីរ័ត្ន, លោក សុខ ចិន្តាសោភា, លោក វង្សី វិសុទ្ធ, លោក កើត រិទ្ធ, លោក សាយ សំអាល់, លោក ទៀ សីហា, លោក ស សុខា, លោក ហង់ ជួនណារ៉ុន, លោក ស៊ុន ចាន់ថុល ។
សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជាបានដឹកនាំសម័យ ប្រជុំរដ្ឋសភាវិសាមញ្ញានីតិកាលទី៧ នាព្រឹកថ្ងៃពុធ ទី២១ ខែកុម្ភៈឆ្នាំ២០២៤ ដើម្បីបោះឆ្នោតផ្តល់សេចក្តីទុកចិត្តលើការតែងតាំងបំពេញបន្ថែមសមាសភាពរាជរដ្ឋាភិបាលចំនួន៣រូប ជាឧបនាយករដ្ឋមន្ត្រី និងទេសរដ្ឋមន្ត្រីរួមមាន ៖ – ឯកឧត្តម ហ៊ុន ម៉ានី ជាឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ ។
ឯកឧត្តម ស្រ៊ី ថាមរុង្គ ជាទេសរដ្ឋមន្ត្រី ទទួលបន្ទុកបេសកកម្មពិសេស – ឯកឧត្តម ប៉ែន វិបុល ជាទេសរដ្ឋមន្ត្រី ទទួលបន្ទុកបេសកកម្មពិសេស រដ្ឋសភានីតិកាលទី៧ ក្រោមការដឹកនាំរបស់សម្តេចរដ្ឋសភាធិបតី ឃួន សុដារី បានដំណើរការមកអស់រយៈពេលប្រមាណ៦ខែហើយ ៕
ចែករំលែកព័តមាននេះ