ទីក្រុងព្យុងយ៉ាង៖ មេដឹកនាំកូរ៉េខាងជើង គីមជុងអ៊ុន ទើបតែទទួលបានអំណោយជារថយន្តមួយគ្រឿងពីលោកពូទីនជាចំណងដៃនៃមិត្តភាពដ៏រឹងមាំរវាងលោកទាំងពីរ។ ឡាននេះលោកពូទីនផ្ដល់ជូនជាកាដូសម្រាប់លោកគីមជុងអ៊ុនជិះផ្ទាល់ខ្លួន។ នេះបើយោងតាមការផ្សាយរបស់ទូរទស្សន៍កូរ៉េខាងជើង។ បើដូច្នេះមែន វាអាចជាការរំលោភសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិដែលរដ្ឋាភិបាលរុស្ស៊ីខ្លួនឯងក៏ចូលរួមនៅក្នុងសេចក្ដីសម្រេចនោះផងដែរ។
ប្រទេសទាំងពីរចាប់ផ្ដើមខិតជិតគ្នាកាន់តែខ្លាំងចាប់តាំងពីលោកគីម និងលោកពូទីនជួបគ្នាកាលពីខែកញ្ញា ឆ្នាំ២០២៣នៅទីក្រុងវ៉្លាឌីវ៉ូស្តុក (Vladivostok) ប្រទេសរុស្ស៊ី។ កាលនោះ ថ្នាក់ដឹកនាំទាំងពីរសន្យាថានឹងខិតខំពង្រឹងទំនាក់ទំនងលើគ្រប់វិស័យព្រោះប្រទេសទាំងកំពុងជិះនៅលើទូកតែមួយ និងកំពុងរស់នៅកំព្រាឯកោដូចគ្នា។ ប្រទេសរុស្ស៊ីត្រូវគេព្រួតគ្នារិះគន់ផង និងដាក់ទណ្ឌកម្មសេដ្ឋកិច្ចផងដោយសារការដុតបញ្ឆេះសង្គ្រាមអ៊ុយក្រែនដែលអូសបន្លាយជិត២ឆ្នាំមកហើយនៅខ្វះតែប៉ុន្មានថ្ងៃទៀតប៉ុណ្ណោះ។ ចំណែកកូរ៉េខាងជើងក៏ត្រូវគេដាក់ទណ្ឌកម្មពីបទផលិតអាវុធនុយក្លេអ៊ែរ និងគ្រាប់មីស៊ីលអន្តរទ្វីប។
នៅក្នុងទំនាក់ទំនងអន្តរជាតិ ប្រទេសនីមួយៗមិនអាចរស់នៅឯកោបានទេ។ ពួកគេត្រូវតែស្វះស្វែងរកមិត្តភក្តិដើម្បីជាខ្នងបង្អែក។ រថយន្តដែលជាកាដូសម្រាប់លោកគីមជុងអ៊ុននោះជាប្រភេទរថយន្តផលិតនៅប្រទេសរុស្ស៊ីផ្ទាល់តែម្ដង ហើយបញ្ជូនទៅឱ្យលោកគីមជុងអ៊ុនតាមរយៈជំនួយការរបស់លោកគីមកាលពីថ្ងៃទី១៨ ខែកុម្ភៈ។ នេះបើយោងតាមការផ្សាយរបស់ទូរទស្សន៍កូរ៉េខាងជើង។
ប្អូនស្រីលោកគីមបានពាំនាំនូវពាក្យពេចន៍អរគុណរបស់លោកទៅជម្រាបជូនលោកពូទីនតាមរយៈជំនួយការរបស់លោក។ លោកស្រីថ្លែងថាការផ្ដល់ជូនកាដូលើកនេះឆ្លុះបញ្ចាំងឱ្យឃើញថាទំនាក់ទំនងរវាងថ្នាក់ដឹកនាំទាំងពីរពិតជាវិសេសវិសាលណាស់។ ទូរទស្សន៍កូរ៉េខាងជើងមិនបានពិពណ៌នាលម្អិតថាតើនោះជារថយន្តម៉ាកអ្វី ឬក៏មានភិនភាគបែបណាទេ។
សូម្បីតែរថយន្តនោះដឹកពីរុស្ស៊ីទៅកូរ៉េខាងជើងតាមមធ្យោបាយអ្វីក៏គេមិនដឹងដែរ។ ប៉ុន្តែគេជឿជាក់ថាលោកគីមជាមនុស្សចូលចិត្តជីវិតហ៊ឺហារ និងស៊ីវិល័យរបៀបស្ទាវ។ ហើយគេដឹងថាគាត់ចូលចិត្តជិះឡានទំនើបៗ ថ្លៃៗ។ ឡាននៅផ្ទះរបស់គាត់មានមួយកំផ្លេ មានច្រើនម៉ាក សុទ្ធតែជាឡានផលិតនៅបរទេសដែលនាំចូលកូរ៉េខាងជើងដោយការគេចពន្ធ និងលួចលាក់។
កាលពីខែកញ្ញា នៅពេលលោកគីមទៅពិនិត្យមើលស្ថានីយបាញ់បង្ហោះយានអវកាសរុស្ស៊ី លោកក៏សម្លឹងមើលមិនដាក់ភ្នែកទៅលើរថយន្តប្រណីតរបស់លោកពូទីនម៉ាកអូរើស សេនា (Aurus Senat)។ ក្រោយមក លោកពូទីនក៏ហៅលោកគីមចូលក្នុងឡានដើម្បីរួមដំណើរជាមួយគ្នា។ កាលណោះ លោកគីមក៏បានបើកបរដោយផ្ទាល់ដៃរបស់លោកផងដែរនូវរថយន្តម៉ាកមេបាក់ (Maybach) ដែលគេបានដឹកតាមរថភ្លើងតាំងពីទីក្រុងព្យុងយ៉ាង ប្រទេសកូរ៉េខាងជើង ចូលទៅក្នុងទឹកដីរុស្ស៊ី។
គេកត់សម្គាល់ថារថយន្តដែលលោកគីមធ្លាប់ជិះមានដូចជាឡានម៊ែសឺដែស, រ៉ូលរ៉យមុខខ្មោច និងឡិចស៊ីស។ ទាំងនេះសុទ្ធតែជាឡានថ្លៃៗដែលក្រុមប្រឹក្សាសន្តិសុខអង្គការសហប្រជាជាតិដាក់បម្រាមមិនឱ្យនាំចូលប្រទេសកូរ៉េខាងជើងទេ។ ការដោះដូរគ្នារវាងប្រទេសរុស្ស៊ី និងកូរ៉េខាងជើងកើតមានជាហូរហែ។ គេជឿជាក់ថាកូរ៉េខាងជើងបន្តផ្ដល់ទៅឱ្យរុស្ស៊ីនូវកាំភ្លើងធំ, រ៉ុកកែត និងគ្រាប់មីស៊ីលដើម្បីយកទៅធ្វើសង្គ្រាមនៅអ៊ុយក្រែន។ ជាថ្នូរត្រឡប់មកវិញ រុស្ស៊ីជួយផ្នែកបច្ចេកទេសអាវុធ ផ្កាយរណប និងមីស៊ីល៕
ប្រភព៖ Reuters
https://www.reuters.com/world/north-koreas-kim-jong-un-receives-car-gift-putin-kcna-2024-02-19/
ចែករំលែកព័តមាននេះ