ទីក្រុងបាងកក៖ ថ្ងៃនេះ ការិយាល័យព្រះរាជអាជ្ញាបញ្ជាក់ថាអតីតនាយករដ្ឋមន្ត្រីថៃ លោកថាក់ស៊ីន ពិតជាកំពុងធ្លាក់ខ្លួនឈឺពិតមែន, មិនមែនធ្វើពុតទេ។ ជាក់ស្ដែង គាត់បានចូលជួបព្រះរាជអាជ្ញាកាលពីព្រឹកមិញ ហើយគាត់និយាយចេញមកមានសំឡេងខ្សាវៗ ស្ដាប់សឹងតែមិនឮ…
ទីក្រុងបាងកក៖ ថ្ងៃនេះ ការិយាល័យព្រះរាជអាជ្ញាបញ្ជាក់ថាអតីតនាយករដ្ឋមន្ត្រីថៃ លោកថាក់ស៊ីន ពិតជាកំពុងធ្លាក់ខ្លួនឈឺពិតមែន, មិនមែនធ្វើពុតទេ។ ជាក់ស្ដែង គាត់បានចូលជួបព្រះរាជអាជ្ញាកាលពីព្រឹកមិញ ហើយគាត់និយាយចេញមកមានសំឡេងខ្សាវៗ ស្ដាប់សឹងតែមិនឮ ទាល់តែឱនត្រចៀកទៅជិតមាត់គាត់ទើបអាចស្ដាប់បាន។ ពេលនោះ ការិយាល័យព្រះរាជអាជ្ញាកោះហៅគាត់ទៅជម្រាបជូនថាមានគេប្ដឹងគាត់មួយករណីថ្មីទៀតពាក់ព័ន្ធនឹងការប្រមាថព្រះមហាក្សត្រ។
ដូច្នេះ ការដោះលែងលោកថាក់ស៊ីនឱ្យនៅក្រៅឃុំកាលពីម្សិលមិញនោះចប់មួយវគ្គហើយ ហើយឆ្លងចូលពាក្យបណ្ដឹងថ្មីមួយទៀត។ ការឆ្លើយបំភ្លឺរបស់ព្រះរាជអាជ្ញានៅថ្ងៃនេះដើម្បីតបទៅនឹងអ្វីដែលជាក្ដីកង្វល់របស់ក្រុមអ្នកប្រឆាំងនឹងលោកថាក់ស៊ីនដែលពួកគេចេះតែមានចម្ងល់ថាតើលោកថាក់ស៊ីនពិតជាមានជំងឺមែន ឬក៏ធ្វើពុតជាឈឺដើម្បីបាននៅក្រៅឃុំ?
កាលពីព្រឹកមិញ ក្រុមគ្រួសារបានដឹកលោកថាក់ស៊ីនតាមរថយន្តចូលការិយាល័យព្រះរាជអាជ្ញាតាំងពីព្រឹកព្រលឹមតែម្ដង។ នៅពេលទៅដល់ គេបានលើកលោកថាក់ស៊ីនដាក់នៅលើរទេះកង់ដើម្បីរុញគាត់បន្តចូលក្នុងបន្ទប់ប្រជុំ។ មន្ត្រីតំណាងអយ្យការជាន់ខ្ពស់ម្នាក់ទទួលស្គាល់ថាលោកថាក់ស៊ីនកំពុងមានជំងឺពិតមែន។ ឈឺលើកនេះមិនមែនឈឺលំៗទេគឺឈឺខ្លាំងគួរសម។
រហូតមកដល់ពេលនេះ គេឮតែលោកមានជំងឺប្រចាំកាយជាច្រើនមុខ។ ប៉ុន្តែក្រុមគ្រួសាររបស់លោក និងក្រុមគ្រូពេទ្យពុំដែលទម្លាយអាថ៌កំបាំងថាលោកមានជំងឺអ្វីខ្លះទេ។ ប្រធានការិយាល័យព្រះរាជអាជ្ញាប្រាប់ថាគាត់បាននិយាយជាមួយលោកថាក់ស៊ីនកាលពីព្រឹកមិញ ហើយពិនិត្យឃើញថាលោកថាក់ស៊ីននិយាយឮខ្សិបៗ។ គាត់ពាក់ប្រដាប់ការពារកញ្ចឹងក និងពាក់ឧបករណ៍សម្រាប់ទ្រកែងដៃ។ គាត់ដើរមិនកើតទេនៅពេលនោះ។
សូមរំលឹកថាកាលពីខែសីហា ឆ្នាំ២០២៣ លោកថាក់ស៊ីនវិលត្រឡប់ចូលប្រទេសថៃដ៏គួរឱ្យភ្ញាក់ផ្អើល។ ពោលគឺលោកសេដ្ឋា ថាក់វិស៊ីនត្រូវរដ្ឋសភា និងព្រឹទ្ធសភាបោះឆ្នោតផ្ដល់សេចក្ដីទុកចិត្តជានាយករដ្ឋមន្ត្រីនៅក្នុងថ្ងៃនោះដែរ។ គ្រាន់តែទៅដល់ព្រលានយន្តហោះភ្លាម អាជ្ញាធរក៏ដឹកលោកថាក់ស៊ីនទៅតុលាការកំពូលដើម្បីស្ដាប់សេចក្ដីសម្រេច។ បន្ទាប់មក គេក៏ដឹកលោកទៅអនុវត្តទោសនៅក្នុងពន្ធនាគារ។ នៅរាត្រីនោះ លោកថាក់ស៊ីនចាប់ផ្ដើមឈឺទ្រូង ហើយត្រូវគេដឹកទៅសម្រាកព្យាបាលនៅមន្ទីរពេទ្យអគ្គស្នងការដ្ឋាននគរបាលជាតិ។ កាលនោះ គ្រូពេទ្យប្រាប់ថាលោកមានជំងឺលើសសម្ពាធឈាម និងឈឺខ្នង។
ចំពោះការចូលពិភាក្សាជាមួយការិយាល័យព្រះរាជអាជ្ញាកាលពីព្រឹកមិញនោះ ខាងព្រះរាជអាជ្ញាមិនទាន់មានវិធានការអ្វីទេ។ ព្រះរាជអាជ្ញាយល់ថាគេត្រូវការពេលវេលាបន្ថែមទៀតដើម្បីស៊ើបអង្កេតសំណុំរឿងរបស់លោកថាក់ស៊ីនថ្មីនេះតបតាមពាក្យបណ្ដឹងដែលចោទថាលោកបានប្រមាថព្រះមហាក្សត្រ។ ពាក្យចោទប្រកាន់នោះដោយសម្អាងទៅលើបទសម្ភាសដែលលោកថាក់ស៊ីនបានផ្ដល់ជូនអ្នកសារព័ត៌មានកាលពីឆ្នាំ២០១៥នៅពេលលោកធ្វើដំណើរទៅទីក្រុងសេអ៊ូល ប្រទេសកូរ៉េខាងត្បូង៕
ប្រភព៖ Channel News Asia
https://www.channelnewsasia.com/asia/thailand-thaksin-shinawatra-appears-truly-ill-4133616
ចែករំលែកព័តមាននេះ