រាជធានីភ្នំពេញ ៖ ខ្ជិល គឺសំដៅលើភាពមិនចង់លំបាក ចង់តែស្រណុកសុខស្រួល មិនធ្វើអ្វីទាំងអស់ ក្រៅពីដេក និងហូប ។ តើអ្នកដឹងទេហេតុអ្វីបានជាមនុស្សយើងមានភាពខ្ជិលនៅក្នុងខ្លួន?…
រាជធានីភ្នំពេញ ៖ ខ្ជិល គឺសំដៅលើភាពមិនចង់លំបាក ចង់តែស្រណុកសុខស្រួល មិនធ្វើអ្វីទាំងអស់ ក្រៅពីដេក និងហូប ។ តើអ្នកដឹងទេហេតុអ្វីបានជាមនុស្សយើងមានភាពខ្ជិលនៅក្នុងខ្លួន?
ធាតុពិតមនុស្សយើងអ្នកណាក៏មានភាពខ្ជិលដែរ គ្រាន់តែថាម្នាក់ៗមានតាមកម្រិតរៀងៗខ្លួន ហើយក៏គ្មានអ្នកណាម្នាក់ចូលចិត្តមនុស្សខ្ជិលនោះដែរ ។ ភាពខ្ជិលច្រអូសនឹងនាំមនុស្សទៅរកភាពបរាជ័យមិនមានភាពរីកចម្រើន ព្រោះមិនមានភាពជោគជ័យណាកើតឡើងដោយសារភាពខ្ជិលឡើយ មានតែការខិតខំប្រឹងប្រែងតស៊ូជំនះឧបសគ្គលំបាកៗទេទើបថ្ងៃក្រោយអាចទទួលបានលទ្ធផលល្អជាទីគាប់ប្រសើរ។
ជាក់ស្តែងកាលពីពេលថ្មីៗនេះ លោក នឹម ឈុន្នី គ្រូបង្ហាត់ការធ្វើសមាធិម្នាក់បានចែករំលែកនូវចំណេះដឹង និងសារដល់បងប្អូនទាំងអស់ពីតិចនិក៤យ៉ាង កម្ចាត់ភាពខ្ជិលច្រអូសចោល ដើម្បីសម្រេចគោលដៅដែលអ្នកចង់បាន ។
តិចនិកទាំង០៤ ដើម្បីកម្ចាត់ និងយកឈ្នះភាពខ្ជិលទាំងនោះមានដូចជា ៖
ចំណុចទី១ ព្រះអង្គឲ្យឈ្មោះថា ឆន្ទៈ ៖ ឆន្ទៈមានន័យថា គោលបំណង ក្តីសុបិន ។ អ៊ីចឹងធ្វើស្អីក៏ដោយប្អូនមាន គោលបំណងជាក់លាក់ ហើយប្អូនយល់អំពីគុណតម្លៃនៃគោលបំណង យល់ពីគោលដៅដែលយើងចង់ធ្វើ ប្រហែលជារឿងអត់អាចខ្ជិលបានទេ ។ ពេលដែលយើងយល់វាច្បាស់ ពេលយើងធ្វើទៅ យើងនឹងទទួលបានផលម៉េចខ្លះសម្រាប់ខ្លួនឯង សម្រាប់ក្រុមគ្រួសាររបស់យើង និងសង្គមដែលយើងកំពុងតែរស់នៅ ។ អ៊ីចឹងបើយើងយល់វាច្បាស់ហើយ គោលបំណងជាក់លាក់ហើយយើងអត់អាចខ្ជិលបានទេ ព្រោះកាលណាយើងខ្ជិល វានឹងខាត់បង់ទៅដល់ពេលវេលា ខាត់បង់ទៅដល់ជីវិតយើងផងដែរ (វាខាត់ពេលក្នុងដំណើរជីវិតរបស់យើង )។
ចំណុចទី២ ព្រះអង្គឲ្យឈ្មោះថា វីរិយៈ មានន័យថា សេចក្តីព្យាយាម ការលះបង់ ការពុះពារនៅពេលដែលយើង មានគោលបំណងជាក់លាក់ហើយខ្វះសេចក្តីព្យាយាមអត់អាចទៅបានទេ ។ ពីព្រោះបុរាណបានលើកឡើងថា សេចក្តីព្យាយាមប្រៀបដូចជាអាវុធ ឬមួយប្រៀបដូចជាថាមពលដែលជំរុញយើងឲ្យទៅដល់គោលដៅដែលយើងចង់ទៅ ។
ពេលដែលនិយាយអំពីសេចក្តីព្យាយាមកន្លែងនេះមានន័យថា មិនដាក់ចុះ នូវធុរៈទាំងឡាយទោះបីជួបប្រទះបញ្ហាលំបាកក្តី ក្តៅក្តី ពេលខ្លះអ្នកជិតខាងអត់ឲ្យតម្លៃអ្វីដែលយើងកំពុងតែធ្វើ ពេលខ្លះអាចមិត្តភក្តិ ក្រុមគ្រួសារបស់យើង អត់យល់អំពីអ្វីដែលយើងកំពុងតែធ្វើហើយអត់លើកទឹកចិត្តយើង អ៊ីចឹងទៅយើងអាចបាក់ទឹកចិត្ត អាចអន់ចិត្ត អត់សប្បាយចិត្តនូវអ្វីដែលយើងកំពុងធ្វើ ។ អ៊ីចឹងត្រឡប់មកទី១វិញថា យើងអត់យល់ច្បាស់ពីគោលបំណងដែលយើងចង់ធ្វើជាក់លាក់ទេ ។ជាក់លាក់អត់ទាន់គ្រប់គ្រាន់ទេ ត្រូវធ្វើសេចក្តីព្យាយាមដោយមិនដាក់ចុះ ។
ចំណុចទី៣ ព្រះអង្គលោកឲ្យឈ្មោះថា ចិត្តៈ មានន័យថា ផ្តោតយកចិត្តទុកដាក់ កិច្ចការហ្នឹងម្តងហើយម្តងទៀត ព្រោះកាលណាយើងចង់បានអ្វីមួយ សម្រេចនៅក្នុងដំណើរជីវិតរបស់យើង ។ បើយើងម្តងធ្វើនេះ ម្តងធ្វើនោះ តិចគិតនេះ តិចគិតនោះ យើងអត់បានផ្តោត យើងអត់អាចទទួលបានជោគជ័យទេ ។ អ៊ីចឹងសេចក្តីខ្ជិលច្រអូសនឹងវាកើតឡើងមកទៀតហើយ អ៊ីចឹងមកទៀតយើងអត់ឃើញប្រយោជន៍ចេញពីការខំប្រឹងទេ ។ ម្លោះហើយព្រះអង្គឲ្យយើងផ្តោតចិត្តមែនទែនណាស់ រឿងអីក៏យើងអាចធ្វើបានដែរ ។ អ៊ីចឹងកម្លាំងទី៣នេះ ខ្លាំងមែនទែន ។
ចំណុចទី៤ វិមំសា មានន័យថា ឲ្យយើងរៀនអង្គេត រៀនវាយតម្លៃ ទៅលើការងារដែលយើងកំពុងតែធ្វើ យើងធ្វើមួយអាទិត្យ ឬ២អាទិត្យ ១ខែ ឬ២ខខែអត់ទទួលបានផល យើងត្រូវផ្លាស់ប្តូររបៀបនៃការធ្វើ យកមកធ្វើការឆ្លុះបញ្ជាំង ។ ធ្វើការឆ្លុះបញ្ជាំង១ថ្ងៃ២ដង ពេលព្រឹកនិងពេលល្ងាច ហើយជាពិសេសមួយអាទិត្យ១ដង រៀងរាល់ថ្ងៃសុក្រម្តង ទៅលើសកម្មភាពពេញមួយសប្តាហ៍របស់យើង ។
អ៊ីចឹងសរុបសេចក្តីមក ទាំង៤នេះ ជាបច្ចេកទេសជាមូលដ្ឋានគ្រឹះដ៏សំខាន់ ដែលជួយយើងឲ្យយកឈ្នះ ទៅលើភាពខ្ជិលច្រអូស យកឈ្នះទៅលើការពន្យារពេលរបស់យើង ពីព្រោះការពន្យារពេលក្តី ភាពខ្ជិលច្រអូសក្តី វាអត់ងាយស្រួលទេ ទាំងខ្ញុំទាំងបងប្អូនក្តី វាបានកើតឡើងហើយ។ អ្វីដែលសំខាន់នោះត្រូវសួរខ្លួនឯងថា អ្វីដែលយើងចង់ធ្វើនោះយើងចង់ធ្វើមែនអត់? យើងស្រលាញ់វាមែនអត់?យើងយល់ពីគោលបំណងជាក់លាក់មែនអត់? ដូចភាសាមួយដែលគេនិយាយថា នៅពេលយើងឃ្លាន ឃ្លានខ្លាំងមែនទែនតែម្តងពេលយប់ រកអីប៉ះហ្នឹងញាំតែម្តង សូម្បីតែញាំមី មិនចាំបាច់មានទឹកក្តីក៏ញាំទៅឆ្ងាញ់ដែរ ។ ឃ្លានមែនទែន ៕
ចែករំលែកព័តមាននេះ