ការផ្ទុះគ្រាប់ថ្មីៗជាច្រើនគ្រាប់ត្រូវបានគេឮទៀតកាលពីព្រឹកថ្ងៃទី៣១ ឧសភា ក្បែរទីក្រុងទ្រីប៉ូលី រដ្ឋធានីលីប៊ី រយៈពេលតែប៉ុន្មានម៉ោងក្រោយពីប្រធានាធិបតីអាហ្វ្រិកខាងត្បូង លោក Jacob Zuma បើកការចរចាជាមួយមេដឹកនាំផ្តាច់ការលីប៊ីវរសេនីយ៍ឯកមូអាម៉ា កាដាហ្វី ហើយផ្តល់សញ្ញាថា លោកកាដាហ្វី បានត្រៀមខ្លួនជាស្រេច ដើម្បីទទួលយកផែនការដែលផ្តួចផ្តើមឡើងដោយសហភាពអាហ្វ្រិកសម្រាប់បទឈប់បាញ់គ្នាមួយ ។
តាមប្រភពព័ត៌មានថា នៅវេលាម៉ោង១២និង៤៥នាទីឈានចូលថ្ងៃទី៣១ ឧសភា ការផ្ទុះ គ្រាប់២លើកត្រូវបានគេឮចន្លោះពេល៥នាទីពីគ្នាខណៈពេលដែលយន្តហោះចម្បាំងជាច្រើនគ្រឿងហោះពីលើរដ្ឋធានីទ្រីប៉ូលី។
មន្ត្រីរដ្ឋាភិបាលលីប៊ីនិយាយថា ការផ្ទុះគ្រាប់ទាំងនេះជាការវាយប្រហារតាមអាកាសត្រូវកន្លែងអតីតបន្ទាយយោធាមួយស្ថិតនៅចម្ងាយជិត១០គីឡូម៉ែត្រ ពីកណ្តាលក្រុង។
ប្រធានាធិបតីអាហ្វ្រិកខាងត្បូង លោក Jacob Zuma បានអញ្ជើញទៅកាន់រដ្ឋធានីទ្រីប៉ូលី កាលពីថ្ងៃទី៣០ ឧសភា កន្លងមក ។ រយៈពេលប៉ុន្មានម៉ោងក្រោយពីមានការផ្ទុះគ្រាប់ លោក Zuma បានចេញពីជំនួបពិភាក្សាជាមួយលោកកាដាហ្វី ហើយអះអាងថា ពេលនេះលោកកាដាហ្វី បានត្រៀមខ្លួនរួចជាស្រេច ដើម្បីបញ្ចប់ការប្រយុទ្ធគ្នា ដែលមានដូចជា ការវាយប្រហារតាមអាកាស និងការប្រយុទ្ធគ្នាដែលកើតឡើងជាបន្តរវាងកងកម្លាំង ដែលមានភក្តីភាពចំពោះលោកកាដាហ្វី ជាមួយក្រុមប្រឆាំងនៅក្នុងទីក្រុងបេនហ្គាហ្ស៊ី ។ ប៉ុន្តែលោក Zuma មិនបានឱ្យដឹងថា លោកកាដាហ្វី យល់ព្រមចុះចេញពីតំណែងឬក៏អត់នោះទេ។
លោក Zuma គូសបញ្ជាក់ថា លោកកាដាហ្វី ថ្លែងថា បទឈប់បាញ់គ្នាត្រូវតែយកមកអនុវត្តសម្រាប់ភាគីទាំងអស់ ។ ទោះបីជាបែបណា លោក Zuma មិនដូចបណ្តាេមដឹកនាំពិភពលោកដទៃទៀតទេ មិនអំពាវនាវឱ្យលោកកាដាហ្វី លាលែងចេញពីតំណែងឡើយ។
លោក Jacob Zuma បានអញ្ជើញទៅកាន់ប្រទេសលីប៊ី ដើម្បីបើកការចរចាជាមួយមេដឹកនាំប្រទេសនេះ លោកកាដាហ្វី ខណៈពេលការក្រាញអំណាចរបស់លោកកាដាហ្វីហាក់ដូចជាចុះខ្សោយទៅៗដោយសារការវាយប្រហារតាមអាកាសរបស់អង្គការអូតង់។
លោក Zuma ថ្លែងថា ពេលនេះ លោកកាដាហ្វី ត្រៀមខ្លួនរួចជាស្រេច ដើម្បីអនុវត្តផែនទីបង្ហាញផ្លូវដោះស្រាយវិបត្តិក្នុងប្រទេស។ លោកថ្លែងក្នុងសន្និសីទកាសែតមួយមុនពេលចាកចេញពីរដ្ឋធានីទ្រីប៉ូលីថា «ខ្ញុំអាចនិយាយថា មេដឹកនាំលីប៊ីត្រៀមខ្លួនជាស្រេចដើម្បីអនុវត្តនូវអ្វីដែលគេហៅថា «ផែនទីបង្ហាញផ្លូវ» ដែលសម្របសម្រួលបានដោយសហភាពអាហ្វ្រិក»៕
ចែករំលែកព័តមាននេះ