លួ.ចកង់បីពីភ្នំពេញ ជិះគេចទៅខេត្ត មិនបានប៉ុន្មានផង ចប់ត្រឹមមិត្តភក្តិម្ចាស់កង់បី
- ភ្នំពេញ
រាជធានីភ្នំពេញ ៖ ជនសង្ស័យម្នាក់ត្រូវអស់លក្ខណ៍ក្នុងចំណោមបក្ខពួក២នាក់ ដែលរួមគំនិតគ្នាលួច
រាជធានីភ្នំពេញ ៖ ជនសង្ស័យម្នាក់ត្រូវអស់លក្ខណ៍ក្នុងចំណោមបក្ខពួក២នាក់ ដែលរួមគំនិតគ្នាលួចម៉ូតូកង់បីឥណ្ឌាមួយគ្រឿងនៅភ្នំពេញ ហើយបើករត់គេចទៅខេត្តកំពត ត្រូវបានសមត្ថកិច្ចខេត្តធ្វើការឃាត់ខ្លួនបានម្នាក់ ដែលហេតុការណ៍នេះបានកើតឡើងកាលពីវេលាម៉ោង៤ទៀបភ្លឺថ្ងៃទី១២ ខែកុម្ភៈ ឆ្នាំ២០២៤ នៅចំណុចភូមិព្រៃទា សង្កាត់ចោមចៅ៣ ខណ្ឌពោធិ៍សែនជ័យ រាជធានីភ្នំពេញ ។
ម៉ូតូកង់បីឥណ្ឌាមួយគ្រឿងដែលត្រូវជនសង្ស័យលួចយកនោះ ពណ៌ស ពាក់ស្លាកលេខ ព្រៃវែង1R-3018 ។
តាមប្រភពព័ត៌មានពីជនរងគ្រោះបានអោយដឹងថា នៅវេលាម៉ោងកើតហេតុខាងលើ ជនរងគ្រោះចូលក្នុងបន្ទប់រៀបចំទុកដាក់អីវ៉ាន់ លុះចេញមកខាងក្រៅវិញ ស្រាប់តែបាត់ម៉ូតូកង់បីមិនឃើញទើបផ្អើលឆោឡោរត់ទៅពាក្យបណ្ដឹងនៅប៉ុស្តិ៍ភ្លាមៗដើម្បីអោយសមត្ថកិច្ចមូលដ្ឋានជួយអន្តរាគមន៍ស្រាវជ្រាវរកមុខសញ្ញាខាងលើ ។ លុះនៅថ្ងៃទី១៣ ខែកុម្ភៈ ឆ្នាំ២០២៤ ស្រាប់តែមិត្តភ័ក្ដិរបស់ជនរងគ្រោះដែលនៅឯខេត្តបានប្រទះឃើញម៉ូតូកង់បី ត្រូវបានជនសង្ស័យកំពុងតែបើកនៅចំណុចភូមិឈូក ខេត្តកំពត ក៏ធ្វើការទាក់ទងប្រាប់មកជនរងគ្រោះភ្លាមៗ រួចពួកគាត់បាននាំគ្នាដេញតាមជនសង្ស័យហើយរាយការណ៍ទៅសមត្ថកិច្ចមូលដ្ឋានអោយជួយអន្តរាគមន៍ទើបស្ទាក់ឃាត់ខ្លួនជនសង្ស័យបានម្នាក់នាំយកទៅប៉ុស្តិ៍សួរនាំ ចំណែកបក្ខពួកម្នាក់ទៀតសមត្ថកិច្ចកំពុងតែស្រាវជ្រាវរកបន្ត។
បច្ចុប្បន្ន ជនសង្ស័យខាងលើ ត្រូវបានជនរងគ្រោះសហការជាមួយកំលាំងផ្នែកជំនាញព្រហ្មទណ្ឌនិងកម្លាំងនគរបាលប៉ុស្តិ៍ចោមចៅ៣ចុះទៅចង្អុលបង្ហាញម៉ូតូកង់បីរបស់ខ្លួន រួចនាំយកទាំងជនសង្ស័យត្រឡប់មកកាន់អធិការនគរបាលខណ្ឌពោធិ៍សែនជ័យវិញ ដើម្បីចាត់ការទៅតាមនិតិវិធីបន្តទៀត៕
ចែករំលែកព័តមាននេះ