គណៈកម្មការការពាររាជាណាចក្រថៃ ដែលមានលោកចម្លងស្រ៊ីមឿងជាមេខ្លោង និងគូកន បានធ្វើការទាមទារនូវលក្ខខណ្ឌបីយ៉ាងដាក់ជូនទៅមេបញ្ជាការយោធាជាន់ខ្ពស់ជើងគោក ជើងទឹក និងជើងអាកាសរបស់ថៃ ដូចការចុះផ្សាយតាមរយៈ ASTV Manager online កាលពីថ្ងៃទី២៦ ឧសភា ឆ្នាំ២០១១
គណៈកម្មការការពាររាជាណាចក្រថៃ ដែលមានលោកចម្លងស្រ៊ីមឿងជាមេខ្លោង និងគូកន បានធ្វើការទាមទារនូវលក្ខខណ្ឌបីយ៉ាងដាក់ជូនទៅមេបញ្ជាការយោធាជាន់ខ្ពស់ជើងគោក ជើងទឹក និងជើងអាកាសរបស់ថៃ ដូចការចុះផ្សាយតាមរយៈ ASTV Manager online កាលពីថ្ងៃទី២៦ ឧសភា ឆ្នាំ២០១១ ។
លក្ខខណ្ឌនៃការតវ៉ារបស់ពួកអាវលឿងរួមមាន ៖ ទី១-ទាមទារឱ្យរដ្ឋាភិបាលលុបចោលអនុស្សរណៈស្តីពីការពិនិត្យ និងបោះបង្គោលព្រំដែនគោករវាងរាជាណាចក្រថៃ ជាមួយកម្ពុជា ឆ្នាំ២០០០ ដើម្បីបញ្ចប់នូវការចាញ់ប្រៀបទាំងឡាយដែលកម្ពុជារំលោភ និងឈ្លានពានទឹកដីថៃ ទី២-ទាមទារឱ្យរដ្ឋាភិបាលថៃដកខ្លួនចេញពីភាគីអនុសញ្ញាបេតិកភណ្ឌពិភពលោក ដើម្បីបង្ហាញពីការតវ៉ា និងមិនទទួលស្គាល់កិច្ចដំណើរការតាមសំណើសុំរបស់ប្រទេសកម្ពុជា ដែលបានរំលោភលើអធិបតេយ្យថៃជាច្រើនលើកច្រើនសាក្នុងការចុះបញ្ជីប្រាសាទព្រះវិហារជាបេតិកភណ្ឌពិភពលោក និងការនាំយកផ្ទៃដីក្បែរប្រាសាទព្រះវិហារ ដែលពួកគេអះអាងថាជាទឹកដីរបស់ថៃឱ្យទៅជាសម្បត្តិបេតិកភណ្ឌពិភពលោករបស់កម្ពុជាជាឯកតោភាគី និងទី៣-ស្នើឱ្យរដ្ឋាភិបាលថៃ ដំណើរការរុញច្រានទាហាន និងទីប្រជុំជនកម្ពុជា ដែលបានឈ្លានពាន និងដណ្តើមកាន់កាប់ទឹកដីថៃ ដើម្បីទាមទារយកទឹកដីថៃដែលបានបាត់បង់ទៅកម្ពុជា អស់រយៈពេលស្ទើរតែ១១ឆ្នាំ ចាប់តាំងពីការចុះហត្ថលេខាលើអនុស្សរណៈឆ្នាំ២០០០រួចមក ។
តាមការលើកឡើងគ្មានមូលដ្ឋានរបស់ក្រុមអាវលឿង មានតម្លៃស្មើនឹងការរុញច្រានរដ្ឋាភិបាលថៃ ឱ្យកសាងនូវកំហុសកាន់តែធ្ងន់ធ្ងរឡើង ប្រសិនណារដ្ឋាភិបាលបន្តអនុវត្តតាមការទាមទារនេះ ដោយភ្លេចគិតពីភាពស្របច្បាប់នៃអធិបតេយ្យរបស់កម្ពុជា ។ ការលើកឡើងរបស់ក្រុមជ្រុលនិយមអាវលឿង ដឹកនាំដោយលោកចម្លងស្រ៊ិមឿង គឺវាផ្ទុយពីសម្តីរបស់លោកអាប់ភីស៊ីត វ៉េចាជីវ៉ា ដែលត្រូវបានដកស្រង់សម្តីចុះផ្សាយដោយទីភ្នាក់ងារព័ត៌មាន TNA កាលពីថ្ងៃទី២៣ ឧសភា ឆ្នាំ២០១១ ថា «ថៃមិនបាត់បង់ទឹកដីទេ»។ ដូច្នេះ បើថៃពុំមានបាត់បង់ទឹកដីទេ បានន័យថា ការទាមទាររបស់ក្រុមអាវលឿង គឺជាការជំរុញចលនាឱ្យមានការរំលោភឈ្លានពានទឹកដីកម្ពុជាយ៉ាងពិតប្រាកដ ហើយការវាយប្រហារដោយយោធាថៃមកលើទឹកដីកម្ពុជា គឺជាការអនុវត្តជាក់ស្តែងនូវផែនទីចោរ ដើម្បីចង់កាន់កាប់ទឹកដីកម្ពុជាដោយមិនអាចប្រកែកបានឡើយ ។
ប្រទេសថៃកំពុងជួបនូវវិបត្តិផ្ទៃក្នុងធ្ងន់ធ្ងរ ជាពិសេសការប្រកួតប្រជែងស្វែងរកសំឡេងឆ្នោតបាននិងកំពុងប្រកួតប្រជែងគ្នាយ៉ាងប្រកៀកប្រកិតរវាងគណបក្សនយោបាយរបស់លោក អាប់ភីស៊ីត និងគណបក្សភឿថៃ ដែលមានបេក្ខភាពនាយករដ្ឋមន្ត្រី គឺប្អូនស្រីរបស់អតីតនាយករដ្ឋមន្ត្រីថៃ ថាក់ស៊ីន ដែលនឹងឈានដល់ថ្ងៃបោះឆ្នោតនាថ្ងៃទី៣ កក្កដា ឆ្នាំ២០១១ ខាងមុខ។ ក្រុមអាវលឿងថៃត្រូវបានគេសង្ស័យថា ជាក្រុមធ្វើសកម្មភាពបន្ទរដើម្បីស្វែងរកសំឡេងឆ្នោតឱ្យគណបក្សប្រជាធិបតេយ្យរបស់លោកអាប់ភីស៊ីត ហើយក្រុមនេះតែងតែបង្កើតនូវគំនិតទាមទារទឹកដីដោយពុំឈរលើមូលដ្ឋានច្បាប់នោះទេ គឺពួកគេខិតខំបង្វែរវិបត្តិនៅបាងកក មកភ្ជាប់ជាមួយនឹងបញ្ហាព្រំដែន និងតំបន់ប្រាសាទព្រះវិហាររបស់ខ្មែរដែលជាទីកន្លែងរងគ្រោះដោយគ្រាប់កាំភ្លើងធំរបស់យោធាថៃ។
មេដឹកនាំក្រុមអាវលឿងមួយចំនួនក៏ត្រូវបានជាប់ឈ្មោះជាភេរវករដែលធ្លាប់ទម្លាក់រដ្ឋាភិបាលរបស់លោកថាក់ស៊ីន និងរដ្ឋាភិបាល ស៊ុន ដារ៉ាវេត ហើយក្នុងនោះក៏មានមេដឹកនាំអាវលឿងមួយចំនួនទៀតបានចូលរួមចលនាឡោមព័ទ្ធព្រលានយន្តហោះក្នុងការធ្វើបាតុកម្មនាពេលកន្លងមក ដែលពុំឃើញមានការបង្ក្រាបរបស់សមត្ថកិច្ចថៃនោះទេ ។ ដូចការកត់សម្គាល់ថា នៅក្នុងស្រុកថៃមាននូវរដ្ឋាភិបាល (Double Standard) ប្រកាន់បក្សពួក និងមានការបង្ក្រាបតែទៅលើក្រុមអាវក្រហមបណ្តាលឱ្យមានមនុស្សស្លាប់ និងរងរបួសជាច្រើននាក់ ។ ក្រុមអាវលឿងជាចលនាជាតិនិយមជ្រុលមួយនៅទីក្រុងបាងកក ដែលបានបង្កើតនូវបណ្តាញទាមទារទឹកដីដែលមិនមែនជារបស់ខ្លួន ។
គេបានកត់សម្គាល់ឃើញថា បើរដ្ឋាភិបាលថៃនៅតែបណ្តែតបណ្តោយឱ្យក្រុមអាវលឿងធ្វើអ្វីស្រេចតែអំពើចិត្តទៀតនោះ ប្រទេសថៃនឹងមិនមាននូវសេចក្តីសុខបានទេ ពីព្រោះក្រុមនេះគឺជាអ្នកដុតបញ្ឆេះកំហឹង និងនាំឱ្យមានភាពល្អក់កករជាខ្លាំងដល់ទំនាក់ទំនងជាមួយប្រទេសកម្ពុជាក្នុងពេលចុងក្រោយនេះ ។
សូម្បីតែការទាមទារបីចំណុចរបស់ពួកគេ គឺពុំបានឆ្លុះបញ្ចាំងពីការពិតដើម្បីជាផលប្រយោជន៍ដល់សង្គមជាតិទាំងពីរកម្ពុជា-ថៃនោះដែរ ។ ការស្នើឱ្យលុបកិច្ចព្រមព្រៀងរវាងកម្ពុជា-ថៃ (MOU ឆ្នាំ២០០០) គឺជារឿងខុសឆ្គងខ្លាំងណាស់ ពីព្រោះបើយោងតាមស្មារតីនៃកិច្ចព្រមព្រៀងនោះ គឺបង្កើតឡើងសម្រាប់តែការងារស្វែងរកបង្គោល និងបន្តបោះបង្គោលព្រំដែនតែប៉ុណ្ណោះ ដែលចាំបាច់ប្រទេសទាំងអស់នៅក្នុងតំបន់ និងពិភពលោកត្រូវតែមានបង្គោលព្រំដែនខណ្ឌសីមាត្រឹមត្រូវ ដើម្បីបញ្ចៀសនូវអរិភាពនឹងគ្នា ។ ចំណែកឯការស្នើឱ្យរដ្ឋាភិបាលថៃលាចេញពីកិច្ចការងារបេតិកភណ្ឌ ក៏ជារឿងខុសមួយទៀត ពីព្រោះប្រទេសថៃក៏ត្រូវជាប់កាតព្វកិច្ចក្នុងការការពារសម្បត្តិបេតិកភណ្ឌពិភពលោកដែរ មិនមែនជាប់កាតព្វកិច្ចក្នុងការបំផ្លាញទេ ។ ដោយឡែក ចំពោះការទាមទាររបស់ពួកក្រុមអាវលឿងថៃ ឱ្យរដ្ឋាភិបាលរបស់ខ្លួនបណ្តេញខ្មែរចេញពីទឹកដីរបស់កម្ពុជាខ្លួនឯង គឺជារឿងរំលោភច្បាប់ជ្រុលពេកហើយ ដែលកម្ពុជានឹងមិនអនុញ្ញាតឱ្យប្រទេសថៃ រំលោភលើអធិបតេយ្យ និងរដ្ឋឯករាជ្យបានជាដាច់ខាត គឺកម្ពុជានឹងប្រើប្រាស់សិទ្ធិគ្រប់បែបយ៉ាងក្នុងស្វ័យការពារពីសត្រូវឈ្លានពាន និងបន្តគោរពអនុវត្តទៅតាមច្បាប់អន្តរជាតិប្រឆាំងទប់ទល់នឹងមហិច្ឆតាវាតទីនិយមរបស់ថៃ លុះដល់ដំណាក់កាលចុងក្រោយ ។
ដូច្នេះអាចនិយាយបានថា ពួកក្រុមចលនាអាវលឿងរបស់ថៃ គឺមានតែសកម្មភាពដុតបញ្ឆេះកំហឹងរដ្ឋាភិបាលថៃ ដោយពុំបានគោរពច្បាប់អន្តរជាតិ និងកិច្ចព្រមព្រៀងទាំងឡាយដែលបានឯកភាពគ្នានោះទេ ៕
( លីគាំ )
ចែករំលែកព័តមាននេះ