ខេត្ត​ខុន​ខេន៖ ​ថ្មី​​ៗ​នេះ ក្រុម​អ្នក​ស្រាវ​ជ្រាវ​រក​ឃើញ​អ្វី​ដែល​គេ​អះអាង​ថា​ជាគ្រោង​ឆ្អឹង​សត្វ​ដាយណូសឺ​​មាន​អាយុ​កាល​​រហូត​ដល់​១១០​លាន​ឆ្នាំ​មក​ហើយ​​។ របក​គំហើញ​នេះ​នៅ​ស្រុក​ណាំ​ហ្វុង​ ខេត្ត​ខុន​ខេន​ (Khon Kaen) ស្ថិត​នៅ​ប្រទេស​ថៃ​ភាគ​ឦសាន​។ គេ​ជឿ​ជាក់​ថា​គ្រោង​ឆ្អឹង​ទាំង​នេះ​ប្រហែល​ជា​ពូជ​ដាយ​ណូសឺ​សូរ៉ូ​ផត់ និង​ស្ពីណូ​សូអ៊ីត (sauropod & spinosaurid)​។

យោង​តាម​នាយក​ដ្ឋាន​ធន​ធាន​រ៉ែ​របស់​ប្រទេស​ថៃ​, ក្រុម​អ្នក​ស្រាវ​ជ្រាវ​ដែល​ដឹក​នាំ​ដោយ​អ្នក​ជំនាញ​​បុរាណ​វិទ្យា​​មក​ពី​​​សារ​មន្ទីរ​សិរិន្ទ​ថន​ (Sirindhorn Dinosaur Museum) និង​មន្ត្រី​​ការិយាល័យ​​ធន​ធាន​រ៉ែប្រចាំ​ខេត្ត​ខុន​ខេន​បាន​ចុះ​ស្ទង់​មើល​ស្ថាន​ការណ៍​នៅ​ទី​តាំង​​ហ្វូស៊ីល​នោះ​ និង​ដាក់​រនាំង​ខណ្ឌ​ជុំ​វិញ​​ដើម្បី​កុំ​ឱ្យ​ក្រុម​អ្នក​​ភូមិ​ចូល​ទៅ​រំខាន​។​ ការ​ចុះ​ពិនិត្យ​មើល​ទី​នោះ​ចាប់​ផ្ដើម​ពី​ថ្ងៃ​ទី​៣១​ ខែ​មករា​​​បន្ទាប់​ពី​អ្នក​ភូមិ​ម្នាក់​បង្ហោះ​នៅ​លើ​ហ្វេស​ប៊ុក​របស់​ខ្លួន​ និង​យក​រឿង​នេះ​ប្រាប់​ទៅ​អាជ្ញា​ធរ​​។​​

ហ្វូស៊ីល​សត្វ​ដាយណូសឺ​ដែល​គេ​ជឿ​ជាក់​ថា​មាន​អាយុ​ចន្លោះ​ពី​១០០-​១១០​លាន​ឆ្នាំ​នោះ​​​​មាន​ទ្រនង់​ឆ្អឹង​ខ្នង​ដូច​ដាយ​ណូសឺ​សូរ៉ូផត់។​​ វា​ជា​ដាយ​ណូសឺ​ដែល​ស៊ី​រុក្ខ​ជាតិ​ជា​អាហារ​។ ដាយ​ណូសឺ​មួយ​ទៀត​ស៊ី​ត្រី​ជា​អាហារ​។ ក្រុម​អ្នក​ស្រាវ​ជ្រាវ​ក៏​រក​ឃើញ​ឆ្អឹង​ជំនីរ​នៃ​សត្វ​ចម្លែក​មួយ​ទៀត​ដែល​គេ​មិន​ទាន់​ដឹង​ថា​ជា​សត្វ​អ្វី​ពិ​តប្រាកដ​នៅ​ឡើយ​ទេ​។ សារ​មន្ទីរ​ខាង​លើ​នេះ​បាន​ប្រមូល​ហ្វូស៊ីល​ជា​ច្រើន​ប្រភេទ​ទៀត​ដើម្បី​​រក្សា​ទុក​ជា​ការ​អភិរក្ស​។

របក​គំហើញ​នេះ​ត្រូវ​គេ​ចាត់​ទុក​ថា​ជា​បេតិក​ភណ្ឌ​របស់​ជាតិ​ព្រោះ​វា​មិន​ត្រឹម​តែ​បង្ហាញ​ថា​ប្រទេស​ថៃ​ធ្លាប់​មាន​សត្វ​ដាយ​ណូសឺ​រស់​នៅ​ប៉ុណ្ណោះ​ទេ​ ប៉ុន្តែ​ថែម​ទាំង​បង្ហាញ​ថា​មាន​ទន្លេ​សម័យ​បុរាណ​មួយ​​ដែល​ធ្លាប់​ហូរ​កាត់​តំបន់​នេះ​។​​ ដោយ​សារ​គេ​រក​ឃើញ​ថ្ម​ខ្សាច់​នៅ​​ទី​តាំង​នោះ ​គេ​អាច​នឹង​កែ​សម្រួល​ទី​នេះ​ទៅ​ជា​ស្ថានីយ​បុរេ​ប្រវត្តិ​នា​ពេល​អនាគត​៕​

ប្រភព៖ Bangkok Post
https://www.bangkokpost.com/thailand/general/2738256/110m-year-old-dinosaur-fossils-found