ខេត្តប៉ៃលិន ៖ រហូតមកដល់ព្រឹកថ្ងៃទី៨ ខែកុម្ភ: ឆ្នាំ២០២៤នេះ គេសង្កេតឃើញការលក់ដូររបស់អាជីវករនៅក្នុងផ្សារសាមគ្គី ហៅប៉ាហ៊ី មានការថយចុះខ្លាំង ជាងឆ្នាំមុនៗ ដោយមិនសូវឃើញមានអតិថិជនចូលទៅទិញគ្រឿងសែនព្រេន…
ខេត្តប៉ៃលិន ៖ រហូតមកដល់ព្រឹកថ្ងៃទី៨ ខែកុម្ភ: ឆ្នាំ២០២៤នេះ គេសង្កេតឃើញការលក់ដូររបស់អាជីវករនៅក្នុងផ្សារសាមគ្គី ហៅប៉ាហ៊ី មានការថយចុះខ្លាំង ជាងឆ្នាំមុនៗ ដោយមិនសូវឃើញមានអតិថិជនចូលទៅទិញគ្រឿងសែនព្រេន ដូចជា ក្រដាសប្រាក់សែន នំចំណី ផ្កាអង្គារសីល និងគ្រឿងសែនចិនផ្សេងៗទៀតផងដែរ ។
បើតាមការរៀបរាប់ពីអាជីវករម្នាក់ ឈ្មោះ ស្រី បានឱ្យដឹងថា ៖ ការលក់ដូរសម្ភារសម្រាប់សែនព្រេនដល់ជីដូនជីតាកុងម៉ា ដែលប្រជាពលរដ្ឋកាត់ខ្សែស្រឡាយចិន នាពេលនេះ មិនសូវដាច់នោះឡើយ ពោលគឺ អត់សូវឃើញមានប្រជាពលរដ្ឋ ឬអតិថិជនចូលទៅទិញច្រើនដូចរាល់ឆ្នាំ ។
ប្រភពបន្តទៀតថា ដោយថ្ងៃសែនចិន កាន់តែខិតជិតមកដល់ ប្រជាពលរដ្ឋ ដែលកាត់ខ្សែចិន មិនមានការសម្រុក ចូលទៅក្នុងផ្សារទិញរបស់របរយកទៅសែន ដូចកាលពីឆ្នាំមុនៗទេ។ មូលហេតុ បែបនេះ ដោយគាត់សង្ស័យមកពីការប្រកបរបរកសិកម្មធ្វើចំការ មិនសូវទទួលបានផល ដោយម្នាក់ៗ អត់សូវមានលុយកាក់ សម្រាប់ទិញគ្រឿងសម្ភារៈ ទាំងនោះយកទៅសែន។ អ្នកខ្លះទិញតិចតួចដូចជានំ និងផ្លែឈើ ព្រមទាំងក្រដាសប្រាក់សែន យកទៅឧបកិច្ច ឱ្យតែបានៗ តែប៉ុណ្ណោះ ។
ចំណែកប្រជាពលរដ្ឋម្នាក់ ដែលជាប់ខ្សែស្រឡាយចិន ឈ្មោះ សែ ភេទប្រុស បានឱ្យដឹងថា ៖ ការសែនព្រេនរបស់គាត់ នៅតែធ្វើដូចឆ្នាំមុនៗដែរ តែដោយសារតែការធ្វើចំការអត់បានផលច្រើន មិនសូវមានលុយកាក់សម្រាប់ទិញគ្រឿង សែនច្រើនដូចឆ្នាំមុនៗទេ។ ដូច្នេះ ហើយទើបគាត់នាំប្រពន្ធកូនមកទិញគ្រឿងសែនតែបន្តិចបន្តួចតាមទំនៀមទម្លាប់ចិនប៉ុណ្ណោះ ដើម្បីកុំឱ្យកើតមានបញ្ហាទៅថ្ងៃខាងមុខ ។
ចំណែកអាជីវករផ្សេងៗទៀត ក៏លើកឡើងដូចៗគ្នាថា មិនត្រឹមតែការលក់ដូរគ្រឿងសែនមានការស្ងប់ស្ងាត់ម៉ូយប៉ុណ្ណោះទេ សូម្បីតែការលក់ដូរសម្ភារ:ទូទៅដូចជា គ្រឿងហូប ចាន ឆ្នាំ សម្លៀកបំពាក់ ក៏អត់សូវមានម៉ូយចូលទិញក្នុងផ្សារច្រើនដូចឆ្នាំមុនៗដែរ។ ការលក់ដូររបស់ពួកគាត់ក៏មានការធ្លាក់ចុះខ្លាំង ស្ទើរតែរកថវិកាបង់ថ្លៃតូប ឬសងជំពាក់បំណុលគេមិនគ្រប់នោះឡើយ។ ទោះបីជាយ៉ាងណាក៏ ដោយ ព្រោះតែគ្មានមុខរបរណាផ្សេង ទើបពួកគាត់បន្តស៊ូទ្រាំលក់ដូរ ដោយ១ថ្ងៃចំណេញតិចតួច សន្សំ ទុកបង់សងថ្លៃជំពាក់បំណុលគេ។ ពេលសល់ថវិកាតិចតួច ក៏នាំគ្នាទុកសម្រាប់ទិញម្ហូបអាហារផ្គត់ផ្គង់ជីវ ភាពប្រចាំថ្ងៃ ៕
ចែករំលែកព័តមាននេះ