វៀតណាម ៖ ប៉ូលិសខេត្ត នៅភាគកណ្តាលប្រទេសវៀតណាម បានចាប់ខ្លួនបុរសម្នាក់ ដែលចាញ់ល្បែងអនឡាញវ័ណ្ឌ.ក ហើយបានចូលទៅប្លន់លុយចំនួន៤៦លានដុង (១,៩០០ដុល្លារអាមេរិក) ពីសាខាធនាគារ Vietinbank…
វៀតណាម ៖ ប៉ូលិសខេត្ត នៅភាគកណ្តាលប្រទេសវៀតណាម បានចាប់ខ្លួនបុរសម្នាក់ ដែលចាញ់ល្បែងអនឡាញវ័ណ្ឌ.ក ហើយបានចូលទៅប្លន់លុយចំនួន៤៦លានដុង (១,៩០០ដុល្លារអាមេរិក) ពីសាខាធនាគារ Vietinbank ដើម្បីសងបំណុលគេ មុនចូលឆ្នាំថ្មី នេះបើយោងតាមសារព័ត៌មាន Vn.express ។
ប៉ូលីសបាននិយាយកាលពីថ្ងៃអាទិត្យ ទី០៤ ខែកុម្ភៈ ថា ជនសង្ស័យមាន Dinh Khuong Linh អាយុ៣៨ឆ្នាំ ជាអ្នករស់នៅទីក្រុងវិញ ក្នុងខេត្តង៉ឺអាន កំពុងប្រឈមមុខនឹងការចោទប្រកាន់ពីបទប្លន់ធនាគារ ។ ទោសនៃបទល្មើសនេះ ជនសង្ស័យប្រឈមនឹងជាប់ពន្ធនាគារពី ៣ឆ្នាំ ទៅ១០ឆ្នាំ ។
ជនសង្ស័យបានសារភាពថា ខ្លួនបានយកកាំបិត ចូលទៅក្នុងសាខាធនាគារ Vietinbank ក្នុងក្រុងកៅឡូ ដើម្បីប្រព្រឹត្តអំពើប្លន់ ពិតប្រាកដមែន ដោយសារតែរូបគាត់លេងល្បែងអនឡាញចាញ់វ័ណ្ឌ.ក ហើយមានបំណងប្លន់ធនាគារ ដើម្បីសងបំណុលល្បែង ។
ហេតុការណ៍ប្លន់ធនាគារនេះបានកើតឡើង កាលពីម៉ោងប្រហែល៤រសៀល ថ្ងៃទី០១ ខែកុម្ភៈ ឆ្នាំ២០២៤ ជនសង្ស័យពាក់ម៉ាស និងអាវធំ និងកាន់កាំបិត បានចូលទៅក្នុងសាខាធនាគារ ហើយស្រែកថា “អ្នកទាំងអស់គ្នានៅឲ្យស្ងៀម!” និងគំរាមបុគ្គលិកទាមទារឲ្យប្រគល់ប្រាក់ ។ ខណៈនៅក្នុងធនាគារនោះ មានមនុស្សប្រហែល២០នាក់ រួមទាំងអតិថិជន និងបុគ្គលិក ។
បន្ទាប់ពីស្រែកគំរាម ជនសង្ស័យបានលោតឡើងផ្លោះពីលើតុ រួចចូលយកលុយចំនួន៤៦លានដុង ហើយរត់ចេញពីធនាគារ ជិះម៉ូតូគេចខ្លួនបាត់ ។ ភ្លាមៗ បុគ្គលិកធនាគារ និងសន្តិសុខ បានដេញតាមពីក្រោយដែរ ប៉ុន្តែជនសង្ស័យជិះរត់គេចបាត់ ប៉ុន្មានរយម៉ែត្រពីធនាគារ ។
ក្រោយកើតហេតុ កម្លាំងប៉ូលិសមូលដ្ឋានជាច្រើនបានចល័តចេញ និងដាក់ពង្រាយ ដើម្បីបិទផ្លូវទាំងអស់ ដើម្បីតាមចាប់ខ្លួនជនសង្ស័យ។ រហូតដល់រសៀលថ្ងៃទី៣ ខែកុម្ភៈ ទើបប៉ូលិសចាប់ខ្លួនជនសង្ស័យរូបនេះបាន ដែលលាក់ខ្លួននៅក្បែរផ្លូវជាតិលេខ១ ក្នុងតំបន់នោះ ។
ដំបូងឡើយ ជនសង្ស័យមិនបានសារភាពថា ជាអ្នកប្រព្រឹត្តអំពើប្លន់នោះទេ។ នៅថ្ងៃបន្ទាប់ ទើបជនសង្ស័យព្រមសារភាពដោយបញ្ជាក់ថា រូបគេបានជំពាក់ប្រាក់ មនុស្សជាច្រើននាក់ ដោយសារតែលេងល្បែងអនឡាញ ហើយអស់សង្ឃឹមមិនអាចសងម្ចាស់បំណុលបាន ទើបរូបគេមានគំនិតយកកាំបិតមួយដើម ចូលទៅសាខាធនាគារ Vietinbank ដើម្បីប្ល.ន់យកលុយ សងបំណុល មុនថ្ងៃបុណ្យចូលឆ្នាំថ្មី នឹងមកដល់ចុងសប្តាហ៍នេះ ៕
ចែករំលែកព័តមាននេះ