ខេត្តព្រះសីហនុ ៖ រដ្ឋបាលក្រុងកោះរ៉ុង នៅថ្ងៃទី០៦ ខែកុម្ភៈ ឆ្នាំ២០២៤នេះ បានចេញសេចក្តីជូនដំណឹង ដើម្បីស្វែងរកម្ចាស់ទូកកន្ទុយវែង ដែលបានអណ្ដែតមកទើរនៅលើឆ្នេរ នៅចំណុចឆ្នេរកោះរ៉ុង (Hill Beach Resort) ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ។
រដ្ឋបាលក្រុងកោះរ៉ុង បានអោយដឹងថា កាលពីថ្ងៃទី២៦ ខែមករា ឆ្នាំ២០២៤កន្លងមកនេះ មានទូកកន្ទុយវែង ០១គ្រឿង បានអណ្ដែតមកទើរនៅលើឆ្នេរ នៅចំណុចឆ្នេរកោះរ៉ុង(Hill Beach Resort) ស្ថិតនៅភូមិដើមថ្កូវ សង្កាត់កោះរ៉ុង ក្រុងកោះរ៉ុង ខេត្តព្រះសីហនុ ហើយរហូតមកដល់ថ្ងៃទី០៦ ខែកុម្ភៈ ឆ្នាំ២០២៤នេះ ពុំឃើញមានម្ចាស់ មកយកទៅរក្សាទុក នៅឡើយទេ ជាហេតុធ្វើអោយមានការប៉ះពាល់ដល់សោភ័ណភាព និងបរិស្ថានតំបន់ឆ្នេរសមុទ្រ ដែលជាតំបន់ទេសចរណ៍ដ៏មានសក្ដានុពល និងទាក់ទាញភ្ញៀវទេសចរណ៍ ដែលមកលេងកំសាន្តក្នុងក្រុងកោះរ៉ុង ។
ក្នុងន័យនេះ ដើម្បីធានាបាននូវសោភ័ណភាព និងបរិស្ថានស្អាតគួរជាទីទាក់ទាញសម្រាប់ភ្ញៀវទេសចរជាតិ និងអន្តរជាតិ មកលេងកម្សាន្តសប្បាយ និងធ្វើអោយតំបន់ឆ្នេរ សក្តិសមជាតំបន់ឆ្នេរទេសចរណ៍ដ៏ស្រស់ស្អាត រដ្ឋបាលក្រុង ស្នើអោយម្ចាស់ទូកខាងលើ មកយកទូកកន្ទុយវែងនេះចេញ ដោយទុករយៈពេល០៧ថ្ងៃ គិតចាប់ពីថ្ងៃទី០៧ ខែកុម្ភៈ ឆ្នាំ២០២៤ រហូតដល់ថ្ងៃទី១៤ ខែកុម្ភៈ ឆ្នាំ២០២៤ ជាកំហិត ។
ក្នុងករណីផុតថ្ងៃកំណត់ខាងលើ ម្ចាស់ទូកនៅតែពុំមកយកទូកចេញពីទីតាំងឆ្នេរទេ រដ្ឋបាលក្រុងនឹងចាត់វិធានការយកទូកខាងលើចេញ ដោយពុំទទួលខុសត្រូវ នូវរាល់ការខូចខាតនោះឡើយ ហើយរាល់ការចំណាយខាងលើនេះ ជាបន្ទុករបស់ម្ចាស់ទូកទាំងស្រុង ៕
ចែករំលែកព័តមាននេះ