ម៉ាល់ឌីវ, ថៃ និងសិង្ហបុរី គឺជាគោលដៅទេសចរណ៍ចូលឆ្នាំចិនដ៏ពេញនិយមបំផុត
ចិន ៖ ការស្ទង់មតិដ៏សំខាន់មួយបានរកឃើញថា ម៉ាល់ឌីវ គឺជាគោលដៅទេសចរណ៍ក្រៅប្រទេស
ចិន ៖ ការស្ទង់មតិដ៏សំខាន់មួយបានរកឃើញថា ម៉ាល់ឌីវ គឺជាគោលដៅទេសចរណ៍ក្រៅប្រទេសកំពូលសម្រាប់ភ្ញៀវទេសចរចិន អំឡុងពេលថ្ងៃឈប់សម្រាកនៃពិធីបុណ្យចូលឆ្នាំថ្មីប្រពៃណីចិនខាងមុខនេះ ហើយបន្ទាប់មកគឺប្រទេសថៃ និងសិង្ហបុរី។
ការស្ទង់មតិលើអ្នកឆ្លើយសំនួរចំនួន២៥,០០០នាក់ ដែលធ្វើឡើងដោយកាសែតចិន Global Times បានបង្ហាញថា ប្រទេសរុស្ស៊ីស្ថិតនៅលំដាប់ទី ៤ បន្ទាប់មកគឺប្រទេសជប៉ុន និងនូវែលសេឡង់។ នៅសេសសល់នៃតារាងទាំង ១០ គឺ អ៊ីស្លង់ ស្វីស បារាំង និង អ៊ីតាលី។
កាលពីថ្មីៗនេះ ប្រទេសថៃ និងសិង្ហបុរី ទើបតែបានប្រកាសពីការលើកលែងទិដ្ឋាការសម្រាប់ភ្ញៀវទេសចរចិន ស្របពេលដែលម៉ាល់ឌីវក៏បានសម្រួលដល់ការមកដល់របស់ភ្ញៀវទេសចិនផងដែរ។ ពិធីបុណ្យចូលឆ្នាំថ្មីប្រពៃណីចិន ត្រូវនឹងថ្ងៃសៅរ៍ ទី១០ ខែកុម្ភៈ ហើយត្រូវបានប្រារព្ធយ៉ាងទូលំទូលាយនៅក្នុងប្រទេសអាស៊ីមួយចំនួន រួមទាំងប្រទេសវៀតណាមផងដែរ។
ទិន្នន័យចេញពីទីភ្នាក់ងារទេសចរណ៍តាមប្រ័ពន្ធអ៊ីនធឺណិតរបស់ប្រទេសចិន Ctrip បានបង្ហាញថា ការកក់សំបុត្រសម្រាប់ដំណើរទេសចរណ៍ទៅកាន់តំបន់អាស៊ីអាគ្នេយ៍បានកើនឡើងរហូតដល់ ១,០២៦% បើធៀបនឹងកាលពីឆ្នាំមុន ហើយការធ្វើដំណើរតាមយន្តហោះបានកើនឡើងរហូតដល់ ៨៦៤% ឯណោះ។
អ្នកតំណាងក្នុងឧស្សាហកម្មនេះ បានលើកឡើងថា ការស្ទុះងើបឡើងវិញនៃវិស័យទេសចរណ៍ក៏ត្រូវបានកំណត់ផងដែរ ដើម្បីជំរុញការងើបឡើងវិញនៃសេដ្ឋកិច្ចដែលនឹងជំរុញដល់ទំនុកចិត្តសាធារណៈ។ ក្រៅពីនេះ មូលដ្ឋានគ្រឹះសេដ្ឋកិច្ចដ៏រឹងមាំរបស់ប្រទេសចិន ការសម្របសម្រួលទិដ្ឋាការ និងចំនួនប្រជាជនដ៏ច្រើន ជាកត្តាអំណោយផលសម្រាប់ការអភិវឌ្ឍន៍រយៈពេលវែងនៃទីផ្សារទេសចរណ៍ក្រៅប្រទេស។
នៅក្នុងឱកាសវិស្សមកាលពិធីបុណ្យនិទាឃរដូវឆ្នាំនេះ ចំណុចច្រកចេញចូលអន្តរជាតិនឹងឃើញចំនួនអ្នកធ្វើដំណើរក្នុង និងក្រៅប្រទេសមានបរិមាណច្រើន។ រដ្ឋបាលអន្តោប្រវេសន៍ជាតិរបស់ប្រទេសចិន NIA បានព្យាករណ៍ថា ចំនួនជាមធ្យមប្រចាំថ្ងៃនៃអ្នកដំណើរនៅអន្តរជាតិត្រូវបានរំពឹងថា នឹងកើនឡើងដល់ ១.៨លាននាក់ ដែលប្រហែល ៣.៣ដងខ្ពស់ជាងពិធីបុណ្យនិទាឃរដូវកាលពីឆ្នាំមុន ដែលស្មើនឹងកម្រិតពិធីបុណ្យនិទាឃរដូវកាលពីឆ្នាំ ២០១៩ ។
NIA បានអះអាងថា អាកាសយានដ្ឋានអន្តរជាតិធំៗត្រូវបានរំពឹងថា នឹងមានលំហូរអ្នកដំណើរខ្ពស់បំផុតចាប់ពីថ្ងៃទី៨ ដល់ថ្ងៃទី១១ ខែកុម្ភៈ និងចាប់ពីថ្ងៃទី១៦ ដល់ថ្ងៃទី១៧ ខែកុម្ភៈ។ កំពង់ផែទៅកាន់ទីក្រុងហុងកុង និងម៉ាកាវ ត្រូវបានរំពឹងថានឹងមើលឃើញលំហូរអ្នកដំណើរខ្ពស់បំផុតចាប់ពីថ្ងៃទី១១ ដល់ថ្ងៃទី១៥ ខែកុម្ភៈ ជាមួយនឹងចំនួនអ្នកដំណើរប្រចាំថ្ងៃប៉ាន់ស្មាននៅឯកន្លែងគយ Shenzhen Luohu ជាប់ព្រំដែនហុងកុង កំណត់ឡើងដល់ ១៩៨,០០០នាក់៕ (ប្រភព ៖ Global Times និង VNExpress)
ចែករំលែកព័តមាននេះ