រាជធានីភ្នំពេញ៖ ពលរដ្ឋខ្មែរដែលកំពុងរស់នៅ និងធ្វើការនៅប្រទេសថៃ បានប្រកាសថ្លែងអំណគុណយ៉ាងកក់ក្តៅ ដល់រាជរដ្ឋាភិបាលកម្ពុជា ចំពោះការស្នើសុំឱ្យរាជរដ្ឋាភិបាលថៃ បញ្ចុះតម្លៃទិដ្ឋការជូនពលករខ្មែរ ។
![](https://kohsantepheapdaily.com.kh/wp-content/uploads/2024/02/d7f4f03938adf24b8649bb19931d173c.jpg)
ការចេញសារថ្លែងអំណរគុណនេះ ធ្វើឡើងក្នុងឱកាស ដែលសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នឹងដឹកនាំប្រតិភូកម្ពុជា អញ្ជើញទៅបំពេញទស្សនកិច្ចផ្លូវការនៅទីក្រុងបាងកក ប្រទេសថៃ នៅថ្ងៃទី៧ ខែកុម្ភៈ ឆ្នាំ២០២៤ ខាងមុខនេះ ។
![](https://kohsantepheapdaily.com.kh/wp-content/uploads/2024/02/3a7acb71b2bf8a4997deb3d2b6bcfbaa.jpg)
លោក ម៉ៃ វណ្ណៈ ពលករខ្មែរដែលកំពុងស្នាក់នៅ និងធ្វើការនៅខេត្តនគររាជសីម៉ា ប្រទេសថៃ បានលើកឡើងថា៖ «ខ្ញុំសូមថ្លែងអំណរគុណយ៉ាងក្រៃលែង ដល់សម្តេចបវរធីបតី ដែលបានស្នើសុំរាជរដ្ឋាភិបាលថៃឱ្យជួយបញ្ចុះតម្លៃវីសាពី ១៩០០ បាត មក ៥០០ បាត ជូនដល់បងប្អូនពលករខ្មែរយើង» ។
![](https://kohsantepheapdaily.com.kh/wp-content/uploads/2024/02/24c0eb3acdae42b9b7846097f416689f.jpg)
លោកយន់ សៃធូ ជាពលករដែលកំពុងស្នាក់នៅ និងធ្វើការនៅខេត្តសារៈបុរី ប្រទេសថៃក៏បានលើកឡើងដែរថា៖ «សូមថ្លែងអំណរគុណយ៉ាងក្រៃលែងដល់សម្តេចបវរធីបតី ដែលបានស្នើសុំរាជរដ្ឋាភិបាលថៃឱ្យជួយបញ្ចុះតម្លៃវីសាពី ១៩០០ បាត មក៥០០បាត ជូនដល់បងប្អូនពលករ ខ្មែរយើង ។ ជាចុងក្រោយ ខ្ញុំបាទ/នាងខ្ញុំ សូមគោរពជូនពរសម្តេចមហាបវរធិបតី ទទួលបានជោគជ័យ ក្នុងដំណើរទស្សនកិច្ចនេះ» ។
![](https://kohsantepheapdaily.com.kh/wp-content/uploads/2024/02/9e3d1afb119c95a8315f340ff5631ed3.jpg)
គួររំលឹកថា កាលពីថ្ងៃទី២៨ ខែកញ្ញា ឆ្នាំ២០២៣ តបតាមការអញ្ជើញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា លោក សេដ្ឋា ថាវីស៊ីន នាយករដ្ឋមន្ត្រីថៃ បានអញ្ជើញមកដល់រាជធានីភ្នំពេញ ដើម្បីបំពេញទស្សនកិច្ចផ្លូវការលើកដំបូងនៅកម្ពុជា ។
![](https://kohsantepheapdaily.com.kh/wp-content/uploads/2024/02/0b728f1af944eb34b9a8452642628f33.jpg)
ដំណើរទស្សនកិច្ចផ្លូវការលើកដំបូងរបស់ លោកនាយករដ្ឋមន្ត្រី សេដ្ឋា ថាវីស៊ីន មកកាន់កម្ពុជាបានពង្រឹងបន្ថែមទៀតនូវចំណងមិត្តភាពជាប្រពៃណី និងលើកកម្ពស់កិច្ចសហប្រតិបត្តិការពហុវិស័យ រវាងប្រទេសទាំងពីរ ស្របតាមស្មារតីនៃ «ការពង្រឹងភាពជាដៃគូដើម្បីសន្តិភាព និងវិបុលភាព» ដែលផ្តល់ផលប្រយោជន៍ទៅវិញទៅមក សម្រាប់ប្រជាជននៃប្រទេសទាំងពីរ ព្រមទាំងរួមចំណែកដល់ការលើកកម្ពស់សន្តិភាព ស្ថេរភាព និងវិបុលភាព ក្នុងសហគមន៍អាស៊ាន និងអន្តរជាតិ ៕ អត្ថបទសហការ
ចែករំលែកព័តមាននេះ