បន្ទាប់ពីការបង្ហាញមុខតាមរយៈវត្តមាននៅកូតឌីវ័រដើម្បីជួយការពារក្តីអតីតប្រធានាធិបតីលោកឡូរ៉ង់ ហ្សេបាបូ មេធាវីលោករ៉ូឡង់ ឌុយម៉ាស់ និងលោក JACQUES VERGES បច្ចុប្បន្នកំពុងស្ថិតនៅប្រទេសលីប៊ី។
អតីតរដ្ឋមន្ត្រីការបរទេសបារាំងលោករ៉ូឡង់ឌុយម៉ាស់នៅលីប៊ីក្នុងឋានៈជាមេធាវីគឺដើម្បីរៀបចំសំណុំរឿងតុលាការមួយក្នុងនាមជនរងគ្រោះទាំងឡាយដោយសារការវាយប្រហាររបស់អូតង់។ លោកថ្លែងថា ត្រៀមការពារលោកមូអាម៉ាកាដាហ្វី ប្រសិនបើមេដឹកនាំលីប៊ីរូបនេះថ្ងៃណាមួយត្រូវបញ្ជូនទៅកាត់ទោសនៅក្រុងឡាអេ។
អតីតប្រមុខការទូតបារាំងក្រោមប្រធានាធិបតីលោកហ្វ្រង់ស្វ័រមីតេរ៉ង់រូបនេះថ្លែងថា លោកបានឃើញជនរងគ្រោះស៊ីវិលយ៉ាងច្រើនដោយសារការទម្លាក់គ្រាប់បែករបស់អូតង់នៅមនី្ទរពេទ្យមួយ ហើយទទួលសេចក្តីរាយការណ៍ពីគ្រូពេទ្យថា ជនរងគ្រោះមានដល់ទៅ២០.០០០នាក់ឯណោះ។
អង្គការអូតង់ដែលដឹកនាំប្រតិបត្តិការយោធាប្រឆាំងលីប៊ីចាប់តាំងពីដំណាច់ខែមីនាមកនិយាយថា ទម្រង់ការវាយប្រហារតែលើគោលដៅយោធាប៉ុណ្ណោះ។ ទោះបីមានការសន្យាជាប់មិនដាច់របស់អូតង់ក៏ដោយ ក៏អាជ្ញាធរបានបង្ហាញដល់បណ្តាអ្នកកាសែតដែលប្រចាំការនៅក្រុងទ្រី ប៉ូលីនូវភស្តុតាងទាំងឡាយនៃជនរងគ្រោះជាច្រើននាក់ ដោយសារការវាយប្រហារតាមអាកាសរបស់អូតង់។
លោកឡូរ៉ង់ ឌុយម៉ាស់ ថ្លែងថា នេះជាការឈ្លានពានយ៉ាងសាហាវ និងព្រៃផ្សៃប្រឆាំងនឹងប្រទេសអធិបតេយ្យមួយ ៕
ចែករំលែកព័តមាននេះ