«កំពុងផ្ទុះការចាប់អារម្មណ៍នឹងមេកានិចជនជាតិថៃម្នាក់ដែលអះអាងថាគាត់រកឃើញបច្ចេកវិទ្យាថ្មីអាចប្រើឡានចាក់ទឹកលាយសាំង។»
ទីក្រុងបាងកក៖ នៅប្រទេសថៃកំពុងល្បីបុរសម្នាក់ជំនាញខាងមេកានិចអះអាងថាគាត់រកឃើញបច្ចេកវិទ្យាថ្មីអាចប្រើទឹកលាយសាំង ឬប្រេងម៉ាស៊ូតដើម្បីចាក់នៅក្នុងឡានរបស់គាត់ ហើយអាចបើកទៅមុខបានជាធម្មតា។ ដំណឹងនេះលេចឮដល់រដ្ឋាភិបាលថៃ។ ថៃចាប់អារម្មណ៍រឿងនេះ និងចាត់មន្ត្រីពីរនាក់ទៅផ្ទះរបស់មេកានិចរូបនោះដើម្បីស៊ើបសួរព័ត៌មានលម្អិត។
![](https://kohsantepheapdaily.com.kh/wp-content/uploads/2024/02/3de994b14a7c3267539a5c67499cb37a.jpg)
លោកភូមីន រ៉ាត់សាមី (Poomin Ratsami) វ័យ៥៦ឆ្នាំ ជាមេកានិចរស់នៅខេត្តរ៉ាក់យ៉ង។ គាត់សាកពិសោធបច្ចេកវិទ្យាដែលទើបរកឃើញនេះនៅលើឡានមួយគ្រឿងប្រើសាំង។ មន្ត្រីរដ្ឋាភិបាលថៃពន្យល់ថាការបង្កើតថ្មីរបស់លោកភូមីនគឺត្រូវបម្លែងម៉ូលេគីលរបស់ទឹកទៅជាខ្យល់។ បន្ទាប់ពីកើតជាខ្យល់ហើយត្រូវរុញខ្យល់នោះចូលទៅពីស្តុងដើម្បីបម្លែងទៅជាថាមពល។
![](https://kohsantepheapdaily.com.kh/wp-content/uploads/2024/02/effad0a8db592b74d0eaaa6e0ad03ba9.jpg)
មន្ត្រីនាយកដ្ឋានជាតិស្រាវជ្រាវវិទ្យាសាស្ត្រ និងបច្ចេកវិទ្យា និងមន្ត្រីក្រសួងអប់រំបានឡើងជិះឡាននោះដើម្បីបើកបរសាកល្បង (test drive)។ ពួកគេសួរនាំលោកមេកានិចរូបនេះជាច្រើនដើម្បីឱ្យគាត់ពន្យល់អំពីការកែច្នៃរបស់គាត់។ លោកភូមីនប្រាប់ថាបន្ទាប់ពីរៀបចប់ផ្នែកគ្រឿងយន្ត គាត់ក៏ចូលបម្រើការនៅក្នុងរោងចក្រមួយ។
មន្ត្រីរាជរដ្ឋាភិបាលថៃដែលចុះទៅផ្ទះរបស់ជនជាតិថៃដើម្បីសាកសួរអំពីការរកឃើញរបស់គាត់ធ្វើការនៅទីនោះ គាត់ឆ្លៀតពេលស្រាវជ្រាវបន្ថែមដើម្បីចង់ដឹងថាបើយើងយកទឹកប្រើផ្សំជាមួយសាំងដើម្បីចាក់ឡានតើអាចទៅរួចទេ។ គាត់ក៏បន្តការស្រាវជ្រាវ និងពិសោធចុះឡើងៗជាច្រើនលើកច្រើនសាជិតម្ភៃឆ្នាំ។ នៅទីបញ្ចប់ គាត់ក៏អាចឈានដល់ការសម្រេចសមិទ្ធផលនេះឡើង។ គាត់ប្រាប់ថាឡាននៅតែមិនអាចខ្វះសាំងបានឡើយ គ្រាន់តែថាយើងប្រើប្រាស់ទឹកដើម្បីផ្សំបង្កើតបានជាឥន្ធនៈចំហេះ។
![](https://kohsantepheapdaily.com.kh/wp-content/uploads/2024/02/d96273da5f6d5bb7739578dbc528c62e.jpg)
វិធីផ្សំគ្នាបែបនេះបង្កើតបានជាឥន្ធនៈខ្លាំងអស្ចារ្យ អាចធ្វើឱ្យម៉ាស៊ីនឡានឆេះបានល្អ និងស្ទុះទៅមុខខ្លាំង។ ម៉្យាងទៀត កាកសំណល់ចំហេះដែលហុយចេញពីបំពង់ស៊ីម៉ាំងគឺចំហាយទឹក។ ដូចនេះ ជួយកាត់បន្ថយការប្រើសាំង និងកាត់បន្ថយការបញ្ចេញឧស្ម័នកាបូនិចទៅក្នុងបរិយាកាស។ លោកភូមីនចង់ឱ្យស្ថាប័នរាជរដ្ឋាភិបាលជួយផ្សព្វផ្សាយ-លើកកម្ពស់របកគំហើញរបស់គាត់ និងលើកទឹកចិត្តឱ្យរោងចក្រផលិតរថយន្តយកបច្ចេកវិទ្យានេះទៅអនុវត្តនៅក្នុងការផលិតឡានរបស់ខ្លួន។
![](https://kohsantepheapdaily.com.kh/wp-content/uploads/2024/02/0f1cc5c51ea6e329d33d5b6ade13eda0.jpg)
វិធីនេះធ្វើឱ្យឡានស៊ីសាំងតិចដូចករណីយើងយកទឹកទៅបាញ់ពន្លត់ភ្លើងដូច្នេះដែរ។ គ្រាន់តែថាករណីនេះយើងប្រើប្រាស់ទឹកមិនមែនពន្លត់ម៉ាស៊ីនទេ ប៉ុន្តែធ្វើឱ្យម៉ាស៊ីនស្ទុះកាន់តែខ្លាំង។ ចំណុចពិសេសនៃបច្ចេកវិទ្យាដែលរកឃើញនេះនៅត្រង់ថាឡានទូទៅពេលបើកបរនៅតាមផ្លូវបញ្ចេញខ្យល់ពុល ប៉ុន្តែឡានប្រើសាំងលាយទឹកនេះវិញ ពេលបើកបរនៅតាមផ្លូវបញ្ចេញចំហាយទឹក។ ដូច្នេះ ល្អចំពោះបរិស្ថាន។
![](https://kohsantepheapdaily.com.kh/wp-content/uploads/2024/02/6508c4b1c66f34ae8e9ce796c600214d.jpg)
ឧបមាថាចំហេះនៅក្នុងម៉ាស៊ីនមិនអាចឆេះសព្វ អាចសល់កាកសំណល់ផ្សេងៗ។ កាកសំណល់នោះនឹងលាយគ្នាជាមួយចំហាយទឹកចេញតាមបំពង់ស៊ីម៉ាំងមកក្រៅវិញ។ ដូច្នេះ វាមិនបញ្ចេញឧស្ម័នពុលទេ។ មន្ត្រីរដ្ឋាភិបាលថៃខាងលើនេះនឹងរកមើលទីតាំងណាសមរម្យដើម្បីអភិវឌ្ឍបច្ចេកវិទ្យានេះបន្ថែមទៀត៕
ប្រភព៖ The Nation Thailand
https://www.nationthailand.com/blogs/thailand/general/40035248
ចែករំលែកព័តមាននេះ