រាជធានីភ្នំពេញ ៖ ព្រះនាង នរោត្តម ចេនណា បានបង្ហាញគោលបំណងចង់ឃើញការស្លៀកសម្លៀកបំពាក់ប្រពៃណីខ្មែរ គួរត្រូវបានប្រើប្រាស់ឱ្យបានច្រើនទម្រង់ ច្រើនសណ្ឋានតាមលំនាំដើម ជាពិសេស ទំនៀមនៃការប្រើប្រាស់ស្បៃពានា …
រាជធានីភ្នំពេញ ៖ ព្រះនាង នរោត្តម ចេនណា បានបង្ហាញគោលបំណងចង់ឃើញការស្លៀកសម្លៀកបំពាក់ប្រពៃណីខ្មែរ គួរត្រូវបានប្រើប្រាស់ឱ្យបានច្រើនទម្រង់ ច្រើនសណ្ឋានតាមលំនាំដើម ជាពិសេស ទំនៀមនៃការប្រើប្រាស់ស្បៃពានា ខណៈពេលដែលកំពុងរងនូវហានិភ័យពីការទាមទារជាកម្មសិទ្ធិផ្ដាច់មុខ ក្នុងការប្រើប្រាស់ពីវប្បធម៌របស់ខ្មែរយើង ។
ការលើកឡើងពីព្រះនាងនាពេលនេះ បានធ្វើឡើងបន្ទាប់ពីប្រទេសជិតខាង ពោលគឺប្រទេសថៃ ដែលកំពុងតែទាមទារឈុតស្បៃជារបស់គេផ្តាច់មុខ ក្នុងពេលដែលក្រសួងវប្បធម៌ និងវិចិត្រសិល្បៈកម្ពុជាបានចេញបញ្ជាក់ថា «ស្បៃ» ជាផ្នែកសំខាន់មួយនៃការស្លៀកពាក់តុបតែងកាយស្ត្រីខ្មែរ ប្រើសម្រាប់ពានាក្នុងឈុតសម្លៀកបំពាក់ប្រពៃណី និងសម្លៀកបំពាក់អាពាហ៍ពិពាហ៍ ។
ជាមួយនឹងការគ្រងសម្លៀកបំពាក់ឈុតស្បៃខ្មែរ ដែលបានច្នៃឡើងសម្រាប់ប្រើក្នុងពិធីមង្គលការក្នុងសម័យបច្ចុប្បន្ន ជាមួយម្ចាស់បងព្រះនាង ចេនណា បានភ្ជាប់ជាមួយសំណេរបង្ហោះលើបណ្តាញសង្គមថា ថ្ងៃនេះ ខ្ញុំសូមបង្ហាញបងប្អូននូវឈុតស្បៃខ្មែរ ដែលបានច្នៃឡើងសម្រាប់ប្រើក្នុងពិធីមង្គលការក្នុងសម័យបច្ចុប្បន្នជាមួយម្ចាស់បងខ្ញុំ Emma Norodom ។ នេះគឺជាលើកទី១ ដែលម្ចាស់បងខ្ញុំគ្រងឈុតប្រពៃណីខ្មែរដ៏ល្អវិចិត្រនេះ ។
ព្រះនាងបន្ថែមថា តាមរយៈចម្លាក់នានានៅលើប្រាង្គប្រាសាទខ្មែរ តឹកតាងដែលបន្សល់ពីដូនតា ជាពិសេស រឿងព្រេងនិទាន ទាក់ទងនឹងការកកើតនគរខ្មែរ «ព្រះថោងនាងនាគ» បានតម្បាញបញ្ចូលក្នុងទំនៀមតោងស្បៃក្នុងពិធីអាវាហ៍វិវាហ៍មង្គលរបស់ខ្មែរដែសបញ្ជាក់ឱ្យឃើញថា ការពានាស្បៃ គឺជាទំនៀមទម្លាប់នៃការស្លៀកពាក់ ដ៏មានសារសំខាន់បំផុត ក្នុងប្រពៃណីស្ត្រីខ្មែរតាំងពីបុរាណកាល ។
ព្រះនាងបញ្ជាក់ថា ការស្លៀកសម្លៀកបំពាក់ ប្រពៃណីខ្មែរ គួរត្រូវបានប្រើប្រាស់ឱ្យបានច្រើនទម្រង់ ច្រើនសណ្ឋានតាមលំនាំដើម ជាពិសេស ទំនៀមនៃការប្រើប្រាស់ស្បៃពានា ដែលកំពុងរងនូវហានិភ័យពីការទាមទារជាកម្មសិទ្ធិផ្ដាច់មុខ ក្នុងការប្រើប្រាស់ពីវប្បធម៌របស់ខ្មែរយើង ។
ជាការកត់សម្គាល់ ចាប់តាំងពីការតវ៉ា និងទាមទារយកឈុតស្បៃខ្មែរធ្វើជាម្ចាស់កម្មសិទ្ធផ្តាច់មុខពីផ្ទះលេខ២នោះមក គេឃើញមានអ្នកសិល្បៈល្បីៗបាននាំគ្នាចេញមុខរៀបចំថតជាមួយឈុតស្បៃខ្មែរជាបន្តបន្ទាប់ ក្នុងន័យដើម្បីចង់បញ្ជាក់ថា ឈុតស្បៃនេះគឺម្ចាស់តែមួយគត់របស់ប្រទេសកម្ពុជាដែលមានតាំងពីយូរលង់ណាស់មកហើយ ។
ជាពិសេសទៀតនោះ ក្រោយផ្ទុះភាពចម្រូងចម្រាស់នេះកើតឡើង ក្រសួងវប្បធម៌និងវិចិត្រសិល្បៈនៃព្រះរាជាណាចក្រកម្ពុជាក៏បានចេញសេចក្តីប្រកាសថា «ស្បៃ» ដែលជាផ្នែកសំខាន់មួយនៃការស្លៀកពាក់តុបតែងកាយស្ត្រីខ្មែរ ប្រើសម្រាប់ពានាក្នុងឈុតសម្លៀកបំពាក់ប្រពៃណី និងសម្លៀកបំពាក់អាពាហ៍ពិពាហ៍ក្នុងកិច្ច «ព្រះថោងតោងស្បៃ»គឺផ្សារភ្ជាប់ទៅនឹងប្រវត្តិនៃអរិយធម៌ខ្មែរតាំងពីសម័យហ្វូណន ដែលប្រជាជនខ្មែរបានរក្សាទុក និងគោរពអនុវត្តគ្រប់ៗជំនាន់រហូតមកទល់បច្ចុប្បន្ន និងបានក្លាយជាផ្នែកមួយដ៏សំខាន់នៃប្រពៃណីទំនៀមទម្លាប់របស់ជាតិខ្មែរ ហើយក៏នៅតែបន្តជានិច្ចនិរន្តរ៍តាំងពីអតីតកាល បច្ចុប្បន្ន និងទៅអនាគត»។
ក្រសួងវប្បធម៌បានបញ្ជាក់ថា មរតកវប្បធម៌ខ្មែរដ៏សម្បូរបែបទាំងរូបី និងអរូបី រាប់បញ្ចូលទាំងសម្លៀកបំពាក់ប្រពៃណី និងសិល្បៈវប្បធម៌ផ្សេងៗសុទ្ធតែផ្សារភ្ជាប់យ៉ាងច្បាស់លាស់ជាមួយភស្តុតាងប្រវត្តិសាស្ត្រ និងបុរាណវិទ្យា ៕
ចែករំលែកព័តមាននេះ